Kapu 10

Nzyetolo na Yeruzalemi

NSUNGI ya printemps melunga. Mpi ntangu melunga sambu dibuta ya Yozefi, kumosi ti banduku mpi bampangi, kusala nzyetolo ya konso mvula ya nsungi ya printemps na Yeruzalemi sambu na kuta nkinsi ya Paki. Ti kyese ya kukwendila, bau mekota na nzyetolo ya bakilometere kiteso ya 100. Yezu melungisa ntangu yai bamvula 12, mpi yandi kevingila feti ti dikebi ya ngolo.

Sambu na Yezu ti dibuta na yandi, Paki kele ve dyambu ya kilumbu mosi kaka. Bau kebikalaka dyaka bilumbu nsambwadi na nima ya Nkinsi ya Bagato ya Kukonda Kifunisu, yina bau ketadilaka bonso kitini ya nsungi ya Paki. Na kimvuka, nzyetolo yonso katuka na bwala na bau na Nazareti, ti ntangu ya bau mevanda na Yeruzalemi, kebakaka kiteso ya bamposo zole. Kansi mvula yai, sambu na dyambu mosi yina ketala Yezu, yau kebaka ntangu mingi.

Dikambu mekwisa kumonana na nzyetolo ya kukatuka na Yeruzalemi sambu na kuvutuka. Yozefi ti Maria keyindula nde Yezu kele ti kibuka ya bampangi mpi banduku yina kesala nzyetolo kumosi. Kansi ntangu bau metelema sambu na mpimpa yandi memonana ve, bau mekwenda kusosa yandi na kati ya bankundi ya bau kesala ti bau nzyetolo. Bau memona yandi ve ata kisika mosi. Ebuna Yozefi ti Maria mevutuka na Yeruzalemi sambu na kusosa yandi.

Bau mesosa yandi kilumbu ya mvimba, kansi bau memona yandi ve. Na kilumbu ya zole bau mekuka kaka ve na kumona yandi. Na nsukansuka, na kilumbu ya tatu, bau mekwenda na tempelo. Kuna, na mosi na kati ya banzo na yau, bau memona Yezu ya kuvanda na katikati ya balongi ya bayuda, na kuwidikilaka bau mpi na kuyufulaka bau bangyufula.

Maria meyufula nde: “Mwana, sambu na nki nge me sala beto mpidiyai? Tala, beto ti tata na nge, beto me mona mpasi mingi na kwenda kusosa nge.”

Yezu meyituka na kuzaba nde bau zabaka ve kisika ya bau fwete kumona yandi. Yandi meyufula nde: “Sambu na nki beno vandaka kusosa mono? Beno zabaka ve nde mono fweti vanda na nzo ya Tata na mono?”

Yezu kekuka ve kubakisa sambu na inki bibuti na yandi lendaka ve kuzaba mambu yai. Na yau, Yezu mevutuka na bwala na bau ti bibuti na yandi mpi yandi melanda na kulemfukila bau. Yandi mefula na kuyela na mayele mpi na kinsuni mpi na lemvo na meso ya Nzambi ti ya bantu. Ee, kubanda na bumwana, Yezu kesonga mbandu ya mbote sambu na mambote ya kimpeve kaka ve kansi mpi na kumonisaka luzitu na bibuti na yandi. Luka 2:​40-52; 22:⁠7.

▪ Inki Nzyetolo ya nsungi ya printemps Yezu kesalaka mbala na mbala ti dibuta na yandi mpi yau kebakaka bantangu ikwa?

▪ Inki mambu mesalama na nzyetolo ya bau mesala ntangu Yezu melungisa bamvula 12?

▪ Inki mbandu Yezu mebikisa sambu na batoko ya bubu yai?