Kapu 27

Kubingama ya Matayo

MWA ntangu fyoti na nima ya kubelula kikata, Yezu mekatuka na Kapernaumi sambu na kukwenda na Nzadi ya Galilea. Kibuka ya bantu kekwisa dyaka na yandi, mpi yandi meyantika na kulonga bau. Na ntangu yandi ketambula, yandi memona Matayo, yina bau kebingaka mpi Levi, ya kuvanda na biro ya mpaku. Imvitasio ya Yezu kele nde: “Kwisa landa mono.”

Yau kemonana nde, Matayo meyikanaka ti malongi ya Yezu, bonso Piere, Andre, Yakobo, ti Yoane kuvandaka ntangu bau kubingamaka. Mpi bonso bau, Matayo mendima imvitasio na mbala mosi. Yandi metelama, meyambula mikumba na yandi ya kikalaki ya mpaku, mpi melanda Yezu.

Na nima, mbala ya nkaka sambu na kusala feti ya kubingama na yandi, Matayo mesadisa nkinsi ya nene nanzo na yandi. Katula Yezu ti balongoki na Yandi, banduku ya Matayo ya ntama kele pana. Na kutuba ya mbote, bantu yai kevwenzamaka na bampangi na bau Bayuda sambu bau kebakaka mpaku sambu na bamfumu ya Roma yina ya bau kemengaka. Kuluta dyaka, mbala mingi bau kelombaka bantu mbongo ya kuluta mpaku yina ya fwete kupesama na masonga kibeni.

Ntangu bau memona Yezu na feti ti bantu ya mutindu yina, Bafarize meyufula balongoki nde: “Sambu na nki longi na beno ke dia mesa mosi ti bakalaki ya mpaku mpi bantu [ya masumu, NW]?” Yezu mewa ngyufula yango, yandi mevutudila Bafarize nde: “Bantu yina ke na maladi ve, bo ke na mfunu ya munganga ve. Kansi bayina ke na maladi, bo bantu ke na mfunu ya munganga. Beno kwenda kulonguka disongidila ya mambu yai, . . . : ‘Mono ke zolaka ve nde bantu kupesa mono makabu ya menga, kansi mono ke zolaka nde bantu kuwila bantu ya nkaka mawa.’ Sambu mono kwisaka ve sambu na kubinga bantu ya mbote kansi bantu ya masumu.”

Ziku Matayo mebingisa bakalaki yai ya mpaku na inzo na yandi na mpila nde bau lenda kuwidikila Yezu mpi kubeluka na kimpeve. Ebuna Yezu mevukana ti bau sambu na kusadisa bau na kuzwa kuwakana ya mbote ti Nzambi. Yezu kevwenza ve bantu ya mutindu yina, bonso Bafarize yina kekudimonaka bantu ya lunungu kesala yau. Kansi ya kyeleka, na mawa na yandi yonso, yandi kesala bonso munganga ya kimpeve sambu na bau.

Ata mpila yina, mawa ya Yezu sambu na bantu ya masumu ketendula ve kukanga meso na masumu na bau, kansi mawi ya mawa ya kufwanana na yina ya yandi kumonisaka na bambefo ya kinsuni. Mu mbandu, yibuka ntangu yandi kutandulaka diboko mpi kusimbaka muntu ya lepre na mawa yonso, na kutubaka nde: “Mono me zola, [gedisama, NW].” Bika beto mpi kumonisa mawa ya mutindu mosi na kusadisaka bantu yina kele na mfunu ya lusadisu, mingimingi na kusadisaka bau na mutindu mosi ya kimpeve. Matayo 8:3; 9:​9-13; Marko 2:​13-17; Luka 5:​27-32.

▪ Matayo kele na wapi ntangu Yezu memona yandi?

▪ Inki kele kisalu ya Matayo, mpi sambu na inki Bayuda kevwenzaka bantu ya mutindu yina?

▪ Inki mabokuta bantu mebokutila Yezu, mpi inki mutindu yandi mevutula?

▪ Sambu na inki Yezu mevukana ti bantu ya masumu?