Kapu 85

Yandi Kesosa Bantu Yina Mevilaka

YEZU kele kibeni na mpusa ya ngolo ya kusosa mpi ya kuzwa bayina tasadila Nzambi na kudikulumusa yonso. Ebuna yandi kesosa mpi kesolula ti muntu yonso, ata nkutu bansumuki ya ngolo, mambu yina metala Kimfumu. Ntangu yai, bantu ya mutindu yina kefinama sambu na kuwidikila yandi.

Na ntangu bau memona dyambu yai, Bafarize ketonga Yezu sambu yandi kesala kinduku ti bantu yina bau kemonaka ya kukonda mfunu. Bau kebokuta nde: “Muntu yai ke yambaka bantu ya mbi, yandi ke diaka mpi ti bo!” Bau mosi lenda kudikulumusa mutindu yina ve ata fyoti! Bafarize ti balongi ya Bansiku kemonaka bantu ya mpamba bonso mvindu na nsi ya makulu na bau. Yau mpi, bau kesadilaka ntubilu ya Kiebreo ‛am ha·’aʹrets, “bantu ya nsi [ntoto],” sambu na kumonisa luvwezo ya bau kele na yau sambu na bantu ya mutindu yina.

Na ndambu ya nkaka, Yezu kebakaka muntu yonso ti lukumu, bumbote, mpi nkenda. Yau yina, bamingi na kati ya bantu yai ya kudikulumusa, ti bantu yina ya mezabanaka mbote nde bau kesalaka mambi, kele na mpusa ya ngolo ya kuwidikila yandi. Kansi beto tatuba inki sambu na matongi ya Bafarize nde Yezu kesala bikesa sambu na bayina bau kemonaka nde bau kele ve ti mbalu?

Yezu kepesa mvutu na kubuya na bau na kusadilaka kingana. Yandi ketuba na kutadila mboninu ya Bafarize bau mosi, bonso nde bau kuvandaka bantu ya lunungu mpi bau kele na lutaninu na lweka ya Nzambi, ya kuswaswana ti bantu ya kuvwenzama to ba ‛am ha·’aʹrets yina kele na nkadilu ya mvengumuka mpi ya kuvila. Widikila mpila yandi keyufula:

“Kana muntu mosi na kati na beno ke na mameme nkama mosi, ebuna dimeme mosi kuvila, yandi ta sala inki? Keti yandi ta bikisa ve mameme ya nkaka yina makumi uvwa na uvwa na matiti, sambu na kwenda kusosa dimeme yina me vila, tii kuna yandi mona yo? Ebuna kana yandi mona yo, yandi ta tula yo na mapeka na yandi na kiese, ebuna yandi ta vutuka na nzo na yandi. Kana yandi kuma na nzo, yandi ta binga banduku na yandi ti bantu ke vandaka penepene na nzo na yandi. Ebuna yandi ta tubila bo nde: ‘Beno kwisa kusepela ti mono, sambu mono me mona dimeme na mono yina vilaka.’ ”

Ebuna Yezu mesadila disolo na yandi, na kutendulaka nde: “Mono ke tubila beno nde mutindu mosi mpi [zulu, NW] ta mona kiese mingi sambu na muntu mosi ya masumu yina me balula ntima. Kiese . . . yina ta luta kiese . . . ya bantu makumi uvwa na uvwa ya mbote yina ke na mfunu ve ya kubalula ntima.”

Bafarize kekudimonaka nde bau kele bantu ya lunungu mpi yau yina bau kele ve ti mfunu ya kubalula ntima. Ntangu bantu ya nkaka na kati na bau kutongaka Yezu bamvula zole na ntwala nde yandi dyaka ti bakalaki ya mpaku mpi bantu ya masumu, yandi kutubilaka bau nde: “Mono kwisaka ve sambu na kubinga bantu ya mbote kansi bantu ya masumu.” Bafarize yina kekudimonaka bantu ya lunungu, kemona ve mfunu ya kubalula ntima, kenata ve kiese na zulu. Kansi bantu yina kebalula mpenza ntima kenata yau.

Sambu na kutubila mingi dyambu yina kemonisa nde kuvutulama ya bansumuki ya kuvilaka kele kikuma ya kuwila kyese mingi, Yezu meta kingana ya nkaka. Yandi ketuba nde: “Kana nkento mosi ke na [badrakami kumi, NW], ebuna yandi vidisa kibende mosi [ya drakami, NW] yandi ta sala nki? Yandi ta pedisa mwinda, yandi ta komba nzo, yandi ta sosa [drakami, NW] yina mbote-mbote tii kuna ya yandi ta mona yo. Ebuna kana yandi mona yo, yandi ta binga banduku na yandi ya bankento ti bankento yina ke vandaka penepene na nzo na yandi. Ebuna yandi ta tubila bo nde: ‘Beno kwisa kusepela ti mono, sambu mono me mona kibende [ya drakami, NW] na mono . . . yina vilaka.’ ”

Ebuna, Yezu mesadila yau kiteso mosi. Yandi melanda na kutuba nde: “Mutindu mosi mpi, mono ke tubila beno nde bawanzio ya Nzambi ta mona kiese sambu na muntu mosi ya masumu yina me balula ntima.”

Dyambu ya kubenda ya inki mutindu na kumona nde bawanzyo ya Nzambi kekudibanzaka sambu na kuvutulama ya bansumuki ya mevilaka! Mingimingi yau kele mpila yina sambu na bantu yai, ba ‛am ha·’aʹrets ya kudikulumusa, ya kuvwenzama kele na dibaku ya kukuma nsukansuka bamambere na Kimfumu ya zulu ya Nzambi. Yau yina, bau tabaka pozisyo ya zulu ya kuluta yina ya bawanzyo bau mosi! Kansi na kisika ya kuwa kimpala to mpasi na ntima, bawanzyo kesepelaka na kudikulumusa yonso mutindu bantu yai ya masumu mekutanaka ti makambu na luzingu na bau mpi menungaka yau, yina tasadisa bau na kusala bonso bantotila ya zulu mpi banganga-Nzambi ya mawa mpi ya kelolulaka. Luka 15:​1-10; Matayo 9:13; 1 Korinto 6:​2, 3; Kusonga 20:⁠6.

▪ Sambu na inki Yezu kesala kinduku ti bantu yina mezabanaka bonso bansumuki, mpi inki mutindu Bafarize metonga yandi?

▪ Inki mutindu Bafarize ketadilaka bantu ya mpamba?

▪ Inki bingana Yezu mesadila, mpi inki dilongi beto lenda kubakila yau?

▪ Sambu na inki kyese ya bawanzyo kele ya mingi?