Kiese Ke Vandaka Mingi Kana Nsumuki Me Balula Ntima

Mbala mingi ntangu Yezu vandaka kusamuna, yandi vandaka kutubila mfunu ya kudikulumusa. (Luka 14:8-11) Yandi ke sosa babakala mpi bankento yina ke zola kusadila Nzambi ti kudikulumusa yonso. Kansi tii ntangu yai, bankaka na kati na bo kele bansumuki ya ngolo.

Bafarize ti bansekudi me mona nde bantu yango disongidila, bayina Bafarize ti bansekudi ke tadilaka nde bo kele ve mfunu, ke kwisa na Yezu mpi ke widikila nsangu na yandi. Yo yina, bo me bokuta nde: “Muntu yai ke yamba bansumuki mpi ke dia ti bo.” (Luka 15:2) Bafarize ti bansekudi ke monaka nde bo kele mfunu kuluta bantu ya nkaka mpi bo ke monaka bantu ya kukonda mfunu bonso mvindu yina kele na nsi ya makulu na bo. Sambu na kumonisa nde bo ke mengaka bantu ya mutindu yai, bamfumu ke sadilaka ngogo ya Kiebreo ‛am ha·’aʹrets, “bantu ya insi [ntoto],” sambu na kutubila bo.

Kansi, Yezu ke monisila bantu yonso ya kukonda mfunu luzitu, ntima ya mbote mpi mawa. Yo yina, bantu mingi na kati ya bansukami mpi bayina me zabanaka nde bo ke salaka masumu, ke kwisa kuwidikila yandi. Kansi, inki mutindu Yezu ke wa sambu na mambu ya mbi yina bo ke tubila yandi sambu yandi ke sadisa bansukami yai, mpi nki mvutu yandi me pesa?

Mvutu na yandi me monana pwelele na mbandu yina yandi me pesa ya ke simba ntima; mbandu yango me fwanana ti yina yandi pesaka na Kapernaumi. (Matayo 18:12-14) Yezu me tubila mambu na mutindu yina ke monisa nde Bafarize kele bantu ya lunungu mpi bo kele na lutaninu na kati ya kibuka ya mameme ya Nzambi. Kansi bantu ya kukonda mfunu kele mameme yina me yambula kibuka mpi me vila. Yezu me tuba nde:

“Inki muntu na kati na beno yina kele ti mameme 100, kana yandi vidisa dimeme mosi, yandi ta bikisa ve mameme 99 na ntoto ya zelo na zelo mpi yandi ta kwenda kusosa dimeme yina vilaka tii kuna yandi ta mona yo? Kana yandi mona yo, yandi ta tula yo na mapeka na yandi mpi ta yangalala. Mpi kana yandi vutuka na nzo, yandi ta binga banduku na yandi mpi bantu ya ke zingaka pene-pene na yandi, ebuna yandi ta tubila bo nde, ‘Beno yangalala ti mono, sambu mono me mona dimeme na mono yina vilaka.’”—Luka 15:4-6.

Inki ntendula Yezu me pesa sambu na mbandu yai? Yandi me tuba nde: “Mono ke tubila beno nde na mutindu yina, kiese ta vanda mingi na zulu sambu na nsumuki mosi yina me balula ntima kuluta sambu na bantu ya lunungu 99 yina kele ve na mfunu ya kubalula ntima.”—Luka 15:7.

Mutindu Yezu me tubila kubalula ntima fwete benda dikebi ya Bafarize. Bo ke kudimonaka nde bo kele bantu ya lunungu mpi nde bo kele ve ti mfunu ya kubalula ntima. Ntangu bantu ya nkaka na kati na bo vwezaka Yezu bamvula zole me luta sambu yandi vandaka kudia ti bakalaki ya mpaku mpi bansumuki, yandi songaka bo nde: “Mono kwisaka ve sambu na kubinga bantu ya lunungu, kansi bansumuki.” (Marko 2:15-17) Bafarize yina ke kudimonaka nde bo kele bantu ya lunungu ke bakisa ve nde bo fwete balula ntima, yo yina kiese ke vandaka ve na zulu. Kansi, kana bansumuki me balula kibeni ntima, kiese ke vandaka mingi na zulu.

Yezu me pesa mbandu ya nkaka sambu na kumonisa nde kana nsumuki me balula ntima, kiese ke vandaka mingi na zulu; mbandu yango ke tubila diambu yina me salama na nzo mosi. Yandi me tuba nde: “Nki nkento yina kele ti mbongo ya bibende ya badrakime kumi, kana yandi vidisa drakime mosi, ta pedisa ve mwinda, ta komba ve nzo na yandi, mpi ta sosa ve na dikebi yonso tii kuna yandi ta mona yo? Mpi kana yandi mona yo, yandi ta binga banduku na yandi mpi bantu ya ke zingaka pene-pene na yandi, ebuna yandi ta tuba nde, ‘Beno yangalala ti mono, sambu mono me mona drakime ya kibende yina mono vidisaka.’”—Luka 15:8, 9.

Ntendula yina Yezu me pesa kele kiteso mosi ti yina yandi pesaka sambu na mbandu ya dimeme yina vilaka. Yandi me tuba nde: “Mutindu mosi mpi, mono ke tubila beno nde, bawanzio ya Nzambi ke vandaka na kiese mingi sambu na nsumuki mosi yina me balula ntima.”—Luka 15:10.

Yindula diambu yai: bawanzio ya Nzambi ke tulaka dikebi ya mingi kana nsumuki me balula ntima. Yo kele kibeni mfunu, sambu nsumuki yina me balula ntima mpi me kuma na ndonga ya bantu yina ta yala na Kimfumu ya Nzambi na zulu ta vanda na kiyeka ya mingi kuluta bawanzio. (1 Bakorinto 6:2, 3) Ata mpidina, bawanzio ke waka ve kimpala. Ebuna, inki mutindu beto fwete wa kana nsumuki mosi me balula ntima na masonga yonso mpi me vutuka na Nzambi?