Kapu 31

Bau Mebuka Mbuma na Kisabatu

NTAMA ve, Yezu ti balongoki na yandi mekatuka na Yeruzalemi sambu na kuvutuka na Galilea. Yai kele printemps mpi na bilanga bambuma ya ble meyela. Balongoki kewa nzala. Ebuna bau kebuka bambuma mpi bau kedya. Kansi bonso yau kele Kisabatu, mambu ya bau kesala mezabana.

Bamfumu ya mabundu na Yeruzalemi mekatuka kusosa na kufwa Yezu sambu bau ketuba nde yandi kevwenza nsiku ya Kisabatu. Ntangu yai Bafarize mefunda nde: “Tala, balonguki na nge ke sala mambu yina kele nsiku na kusala yo na [kisabatu, NW].”

Bafarize ketuba nde kubuka bambuma ti kunika yau na maboko sambu na kudya kele kisalu ya kukatula bambuma mpi kututa yau. Kansi ntendula na bau ya ngolo na yina metala yina fwete kubingama kisalu mekumisa Kisabatu mpasi, kansi yau pesamaka sambu yau kuvanda ntangu ya kyese, ya nsyamisa na kimpeve. Ebuna Yezu mesadila bambandu ya Masonuku sambu na kusonga nde Yehowa Nzambi mekanaka ntete ve nsadilu ya ngolo ya mutindu yina sambu na nsiku na Yandi ya Kisabatu.

Yezu ketuba nde ntangu Davidi ti bantu na yandi kuvandaka na nzala, bau telamaka na nkela ya santu mpi bau dyaka mampa yina bau kutambikaka. Mampa yina vandaka meyita kukatulama na ntwala ya Yehowa mpi ya nkaka ya mpa meyingisama, mpi na kutuba ya mbote yau vandaka sambu na banganga-Nzambi, bau bantu vandaka kudya yau. Kansi, sambu na dyambu yango, Davidi ti bantu na yandi kulolamaka ve sambu bau kudyaka yau.

Na kupesaka mbandu ya nkaka Yezu metuba nde: “Keti beno me tangaka ve na mikanda ya Bansiku . . . nde konso [kisabatu, NW] banganga-Nzambi ke landaka ve nsiku ya [kisabatu na tempelo, NW]? Kansi yo kele mbi ve na meso ya Nzambi!” Ee, ata na Kisabatu banganga-Nzambi kelandaka kuzenga bambisi mingungu mpi na kusala bisalu ya nkaka na kati ya tempelo sambu na kuyidika bimenga ya bambisi! Yezu metuba nde: “Mono ke tubila beno nde, yina kele awa me luta [tempelo, NW] na mfunu.”

Na kunganinaka Bafarize Yezu kelanda nde: “ ‘Mono ke zolaka ve bantu kupesa mono makabu ya bambisi; mambu yina ya mono ke zolaka yo kele nde bantu kuwila bantu ya nkaka mawa’ kana beno zabaka disongidila ya mambu yina, beno zolaka kubedisa ve bantu yina me sala mbi ve.” Ebuna yandi mesukisa nde: “Mwana-muntu kele mfumu ya [kisabatu, NW].” Inki Yezu kezola kutuba na mambu yina? Yezu ketubila luyalu ya Kimfumu na yandi ya ngemba ya bamvula funda.

Bamvula 6000 meluta ntangu yai, bantu ke na kumonaka mpasi na kimpika ya Satana Dyabulu, ti mubulu mpi bamvita ya mekumaka mambu ya konso kilumbu. Na ndambu ya nkaka, luyalu ya Kisabatu ya nene ya Kristu takatula bantu na mpasi ti munyokudi. Matayo 12:​1-8; Levi 24:​5-9; 1 Samuele 21:​1-6; Kutanga 28:9; Ozea 6:⁠6.

▪ Na inki dyambu balongoki ya Yezu mefundama, mpi inki mutindu Yezu mevutula mvutu na yau?

▪ Inki mbi ya Bafarize Yezu memonisa?

▪ Na inki sansa Yezu kele “Mfumu ya Kisabatu”?