Kubuka Bambuma na Kisabatu

Ntangu yai, Yezu ti balongoki na yandi ke kwenda na nordi ya Galilea. Yo kele nsungi ya madidi mpi bambuma me yantika kubasika na banti na bilanga. Balongoki me wa nzala mpi bo me yantika kubuka ba-ntu ya ble mpi kudia. Kansi yo kele Kisabatu, mpi Bafarize ke mona mambu yina balongoki ke sala.

Yibuka nde ntama mingi ve, Bayuda ya nkaka sosaka kufwa Yezu na Yeruzalemi; bo tubaka nde yandi fwaka nsiku ya Kisabatu. Ntangu yai, Bafarize me kwisa kufunda balongoki ya Yezu sambu na mambu yina bo ke sala. Bo me tuba nde: “Tala! Balongoki na nge ke sala mambu yina nsiku ke pesa ve nswa ya kusala na Kisabatu.”—Matayo 12:2.

Bafarize ke tuba nde kubuka bambuma mpi kukatula yo bimpusu sambu na kudia kele kiteso mosi ti kisalu ya kukatula bambuma mpi kukatula yo bimpusu. (Kubasika 34:21) Mutindu na bo ya kutadila kisalu ke kumisa Kisabatu kizitu. Kansi na kutadila dibanza ya Nzambi, Kisabatu fwete vanda kilumbu ya kiese mpi ya kukumisa kimpeve ngolo. Sambu na kubedisa bangindu na bo ya mbi, Yezu me pesa bambandu yina ke monisa nde Yehowa Nzambi tubaka ve nde bo fwete sadila nsiku na yandi ya Kisabatu mutindu yina.

Mbandu ya Davidi ti bantu na yandi kele mosi na kati ya bambandu yina Yezu me tubila. Ntangu bo waka nzala, bo kwendaka na nzo-tenta mpi bo diaka mampa yina bo pesaka na Nzambi. Banganga-nzambi mpamba vandaka ti nswa ya kudia mampa yina na nima ya kukatula yo na ntwala ya Yehowa mpi ya kuyingisa yo na mampa ya nkaka. Yo yina, sambu Davidi ti bantu na yandi waka nzala, nsiku bedisaka bo ve mutindu bo diaka mampa yina.—Levi 24:5-9; 1 Samuele 21:1-6.

Yezu me pesa mbandu ya zole; yandi me tuba nde: “Keti beno me tangaka ve na Nsiku nde na Bisabatu banganga-nzambi na tempelo ke zitisaka ve Kisabatu, kansi bo ke salaka mbi ve?” Yezu me monisa nde ata na Kisabatu, banganga-nzambi vandaka kufwa bambisi sambu na kupesa bimenga mpi bo vandaka kusala bisalu ya nkaka na tempelo. Na nima yandi me tuba nde: “Kansi mono ke tubila beno nde awa kele ti muntu yina me luta tempelo.”—Matayo 12:5, 6; Kutanga 28:9.

Yezu me sadila Masonuku sambu na kutendula dibanza na yandi, yandi me tuba nde: “Kana beno bakisaka disongidila ya mambu yai: ‘Mono ke zolaka mawa, kansi kimenga ve,’ beno zolaka ve kubedisa bantu yina me sala mbi ve.” Sambu na kusukisa, yandi me tuba nde: “Sambu Mwana ya muntu kele Mfumu ya Kisabatu.” Yezu ke tubila kukwisa ya Kimfumu na yandi ya ngemba yina ta sala bamvula funda.—Matayo 12:7, 8; Ozea 6:6.

Banda bamvula mingi, bantu ke mona mpasi ya ngolo na nsi ya kimpika ya luyalu ya Satana ya me fuluka ti mubulu mpi bitumba. Mambu yai yonso ta vanda diaka ve na nsi ya Kisabatu ya nene, luyalu ya Kristu yina ta pesa beto kupema ya beto ke vingila mpi ya beto kele na yo mfunu.