Kapu 33

Yezu Melungisa Mbikudulu ya Yezaya

NTANGU Yezu mezaba nde Bafarize ti kibuka ya bantu ya Erode mesala pula sambu na kufwa yandi, yandi ti balongoki na yandi metina na Nzadi ya Galilea. Awa bibuka ya nene ya kekatuka na bandambu yonso ya Palestine, mpi luta bandilu na yau, kekwisa na yandi. Yandi kebelula bamingi, na mpila nde bayina yonso kuvandaka na maladi ya ngolo kenwanina sambu na kusimba yandi.

Sambu bibuka kele ya nene kibeni, Yezu metubila balongoki na yandi na kutudila yandi bwatu konso ntangu sambu na kisalu na yandi. Na kukatukaka na lweka ya masa, yandi lenda kukandikila bibuka na kupusa yandi. Yandi lenda kulonga bau tuka na bwatu to kukwenda na ndambu ya nkaka na lweka ya masa sambu na kusadisa bantu kuna.

Longoki Matayo kemonisa nde kisalu ya Yezu kelungisa “mambu yina ya profete Yezaya tubaka.” Ebuna Matayo ketubila mbikudulu ya Yezu melungisa nde:

“[Tala! Nsadi na mono ya mono mesolaka, ya zolwa, yina ya moyo na mono mendimaka, NW]! Mono ta pesa yandi [m]peve na mono, Ebuna yandi ta zabisa bantu ya bansi yonso [lunungu na mono, NW]. Yandi ta tulaka ntembe ve, yandi ta salaka makelele ve, ata muntu mosi ve ta waka ndinga na yandi na babalabala. Yandi ta zengaka ve dititi ya kukonama, yandi ta fwaka tiya ve na nsinga ya mwinda ke pela mbote ve. Yandi ta landa kaka tii kuna ya yandi ta nungisa mambu ya kieleka. Ebuna bantu yonso ta tula ntima na yandi.”

Ya kyeleka, Yezu kele nsadi ya zolwa ya Nzambi mendimaka. Mpi Yezu memonisa pwelele lunungu ya kyeleka kele inki, yina bansiku ya bammbuta ya lusambu ya luvunu kekumisa mudidi. Sambu na nsadilu na bau ya mbi ya nsiku ya Nzambi, nkutu Bafarize tasadisa ve muntu yina kebela na Kisabatu! Na kumonisaka lunungu ya Nzambi pwelele, Yezu kekatula bantu na kizitu ya bansiku ya bambuta ya kukonda lunungu, mpi sambu na dyambu yai, bamfumu ya dibundu kesosa na kufwa yandi.

‘Yandi ta tulaka ntembe ve, yandi ta salaka makelele ve, ata muntu mosi ve ta waka ndinga na yandi na babalabala,’ ketendula inki? Ntangu yandi kebelula bantu, Yezu ‘ke pesa bo atasio nde bo lenda zabisa bantu ya nkaka ve nde yandi kele nani.’ Yandi kezola ve kuwa makelele ya lusikisu sambu na yandi mosi na kati ya babalabala to nde bantu kumwanga balapolo ya luvunu.

Dyaka, Yezu kenata nsangu na yandi ya kusyamisa na bantu yina kele na mutindu ya kifwani bonso dititi ya kukonama, ya kukonika mpi ya menyatama na nsi ya makulu. Bau kele bonso nsinga ya mwinda yina kebasisa midinga, yina kitini ya nsuka ya luzingu na yandi mekuma penepene na kufwa. Yezu mepasula ve dititi ya kukonama to kufwa kamwa tiya ya nsinga ya mwinda. Kansi ti bumbote yonso, ti zola yonso, yandi kele na mayele ya kupesa kikesa na bantu ya kudikulumusa. Ya kyeleka, Yezu kele muntu yina makanda fwete kutudila kivuvu! Matayo 12:​15-21; Marko 3:​7-12; Yezaya 42:​1-4.

▪ Inki mutindu Yezu kemonisa lunungu pwelele, nkatu kutula ntembe to kutula makelele na babalabala?

▪ Banani kele bonso dititi ya kukonama mpi nsinga ya mwinda ya kepela mbote ve mpi inki mutindu Yezu ketadilaka bau?