Kapu 35

Disolo ya Kuluta Masolo Yonso ya Mesalamaka

DYAMBU yai kele mosi na kati ya mambu ya nkenda ya Biblia ya bantu kevilaka ve: Yezu kufongaka na lweka ya ngumba, na kusalaka Disolo na yandi ya kuluta kitoko na zulu ya Ngumba. Kisika yango kele penepene na Nzadi ya Galilea, mbala ya nkaka mfinama na Kapernaumi. Na nima ya kulutisa mpimpa ya mvimba na kusamba, Yezu mekatuka kusola bolongoki 12 na kati ya balongoki na yandi sambu na kukuma bantumwa. Ebuna, kumosi ti bau yonso, yandi mekulumuka na kisika ya lelensi yai ya ngumba.

Ntangu yai, nge lenda kuyindula nde, Yezu fwete kuvanda ya kulemba mingi mpenza mpi yandi tazola kulala ndambu. Kansi bibuka ya nene mekwisa, bamosi mekatuka na bandambu yonso ya Yudea mpi ya Yeruzalemi, na kiteso ya bakilometere kubanda na 100 tii 110. Bankaka mekatuka na ndambu ya Tire ti Sidoni bansi yina kele na mbela ya nordi ya nzadi. Bau mekwisa sambu na kuwa Yezu mpi na kubelulama na bamaladi na bau. Nkutu bantu ya kenyokwamaka na bampeve ya mbi, bawanzyo ya mbi ya Satana, kele pana.

Ntangu Yezu mekulumuka, bantu ya maladi kefinama sambu na kusimba yandi, mpi yandi kebelula bau yonso. Na nima na yau, yau kemonana nde Yezu memata na kisika ya kuluta nda ya ngumba yango. Kuna yandi mefonga mpi meyantika na kulonga bibuka yina kele ya kutandama na kisika ya lelensi na ntwala na yandi. Mpi yindula mambu yai! Ntangu yai, ata muntu mosi ve na kati ya bawi kenyokwama na kimbefo ya ngolo!

Bantu yango kele na mpusa ya ngolo ya kuwa longi yina mekuka na kusala bimangu yai ya kuyituka. Kansi, Yezu kepesa disolo na yandi mingimingi sambu na mambote ya balongoki na yandi, yina mbala ya nkaka mevukana na nzyunga penepene mpenza ti yandi. Kansi na mpila nde beto mpi kubakila yau mambote, Matayo ti Luka mesonikaka yau.

Mambu ya disolo yango ya Matayo kusonikaka kele nda mbala iya kuluta ya Luka. Dyaka, Bitini ya mambu yina Matayo kusonikaka, Luka kemonisa yau bonso nde Yezu kutubaka yau na ntangu ya nkaka ya kisalu na yandi, mutindu yau lenda kumonana na kufwanisaka Matayo 6:​9-13 ti Luka 11:​1-4, mpi Matayo 6:​25-34 ti Luka 12:​22-31. Kansi, dyambu yai lenda kuyitukisa ve. Na ntembe ve, Yezu kulongaka mambu ya mutindu mosi mbala mingi, mpi Luka kuponaka na kusonika mambu ya nkaka ya malongi yai na kisika ya kuswaswana.

Kima kekumisa disolo ya Yezu mfunu mingi kele mudindu ya mambu na yau ya kimpeve kaka ve kansi mpi mutindu yandi kemonisa bakyeleka yai nkatu mpasi mpi pwelele. Yandi kesadila mambu yina kelutaka konso kilumbu mpi kesadila mambu ya bantu meyikanaka na yau, mpila yina, na kusalaka nde bangindu na yandi kubakisama mbote na bayina yonso kesosa luzingu ya kuluta mbote na nzila ya Nzambi.

Banani Kele Mpenza na Kyese?

Muntu yonso kezolaka kuvanda na kyese. Na kuzabaka mambu yai, Yezu meyantika Disolo na yandi na zulu ya Ngumba na kutendulaka bayina kele mpenza na kyese. Bonso beto lenda kuyindula, dyambu yai kebenda mbala mosi dikebi ya bawi na yandi ya mingi. Kansi bangogo na yandi ya nkotilu fwete kumonana ya kukonda kuwakana sambu na bantu mingi.

Na kutubilaka balongoki na yandi, Yezu meyantika nde: “Kiese na beno bansukami, sambu Kimfumu ya Nzambi kele ya beno! Kiese na beno bantu ke waka nzala ntangu yai, sambu Nzambi ta pesa beno madia mingi! Kiese na beno bantu ke dilaka ntangu yai, sambu beno ta seka! Kiese na beno kana bantu kukota beno kimbeni . . . kana mambu yina kubwa, beno fweti sepela, beno fweti pumbuka na kiese sambu beno ta baka matabisi ya nene na zulu.”

Yai kele mambu ya Luka kusonikaka sambu na yina metala bangogo ya luyantiku ya disolo ya Yezu. Kansi na kutadilaka mambu ya Matayo kusonikaka, Yezu ketuba mpi nde bantu ya ndembama, ya ntima ya mawa, ya kugedila na ntima, mpi ya ngemba kele na kyese. Yezu kemonisa nde bau kele na kyese sambu bau tabaka ntoto, bau tawila bau mawa, bau tamona Nzambi, mpi bau tabingama bana ya Nzambi.

Kansi, dyambu ya Yezu kezola kutuba na yina metadila kuvanda na kyese, kele ve kaka kusepela to kuyangalala, bonso na ntangu muntu kesakanaka. Mambote ya kyeleka kele mudindu kibeni, yau kepesa ngindu ya kuyangalala, sansa ya luyangalalu ti ndungisa ya luzingu.

Ebuna Yezu kemonisa nde bayina kele mpenza na kyese, kele bantu yina kebanzila mpusa na bau ya kimpeve, bayina kekudiwa mawa sambu na nkadilu na bau ya masumu, mpi kekwisaka kuzaba mpi kusadila Nzambi. Ebuna, ata nkutu bau keyinama to kenyokwama sambu bau kesala luzolo ya Nzambi, bau kele na kyese sambu bau kezaba nde bau keyangidika Nzambi mpi tabaka nsendo na yandi ya luzingu ya mvula na mvula.

Kansi, bamingi na kati ya bawi ya Yezu, kaka bonso bantu ya nkaka bubu yai, kekwikilaka nde kuvanda mvwama mpi kuyangalala na byese kele yau yina kenatinaka muntu kyese. Yezu kuzaba mambu mutindu ya nkaka. Na kumonisaka dyambu ya kuswaswana yina fwete kuyitukisa bamingi na kati ya bawi na yandi, yandi ketuba nde:

“Mawa na beno bamvwama, sambu beno me monaka ntama kiese na beno! Mawa na beno bantu ke na madia mingi ntangu yai, sambu beno ta wa nzala! Mawa na beno bantu ke sekaka ntangu yai, sambu beno ta vanda na mawa, beno ta dila! Mawa na beno kana bantu yonso kutuba mambu ya mbote sambu na beno, sambu bankaka na bo ya ntama tubaka mutindu mosi sambu na baprofete ya luvunu.”

Inki Yezu kezola kutendula? Sambu na inki kuvanda na bimvwama, kusosa byese ti bwimi yonso, mpi kusosa kukumisama na bantu kenataka mawa? Yau kele sambu ntangu muntu kele ti bima yai mpi kezola yau kuluta, ebuna kisalu ya Nzambi, kisika mosi kaka ya kenataka mambote ya kyeleka, mekatulama na luzingu na yandi. Na mbala mosi, Yezu kutubaka ve nde kaka kuvanda nsukami, nzala, mpi na kudila kenatilaka muntu kyese. Kansi, mbala mingi, bantu ya kuvwenzama ya mutindu yina lenda kulanda malongi ya Yezu, mpi mpila yina, bau kesambulama ti mambote ya kyeleka.

Na nima, na kutubilaka balongoki na yandi, Yezu ketuba nde: “Beno kele . . . mungwa ya [ntoto, NW].” Ya kyeleka, yandi kezola kutuba ve nde bau kele mungwa ya kyeleka. Kansi, mungwa kele kitaninu. Kita ya nene ya mungwa kevandaka penepene na mesa ya kimenga ya tempelo ya Yehowa, mpi banganga-Nzambi ya kesalaka kuna kesadilaka yau sambu na kutula na bankayilu.

Balongoki ya Yezu kele “mungwa ya ntoto” na sansa nde bau kele na bupusi ya lutaninu na zulu ya bantu. Ya kyeleka, nsangu ya bau kenata tatanina myoyo ya bayina yonso kendima yau! Yau tanata na kati ya luzingu ya bantu ya mutindu yina bankadulu ya ntangu yonso, lunungu, ti kwikama, na kutaninaka bau na konso mbebisa yina ya kimpeve mpi ya mabanza.

Yezu metubila balongoki na yandi nde: “Beno kele [nsemo ya inza, NW].” Mwinda bau ketulaka yau ve na nsi ya kitunga kansi bau ketulaka yau na zulu ya mesa ya mwinda, yau yina Yezu ketuba nde: “Mutindu mosi mpi, [nsemo, NW] na beno fweti pela na meso ya bantu.” Balongoki ya Yezu kesala dyambu yai na kutaka kimbangi na bau na bantu yonso, mpi na kusalaka bonso bambandu ya kesema na bikalulu ya kewakana ti minsiku ya Biblia.

Malombu ya Kuzanguka Sambu na Balongoki na Yandi

Bamfumu ya mabundu kebaka Yezu bonso nkuludi ya Nsiku ya Nzambi mpi bau mekatuka nkutu na kusala mfundu sambu na kufwa yandi. Yau yina, ntangu Yezu kelanda Disolo na yandi na zulu ya Ngumba, yandi ketendula nde: “Beno banza ve nde mono kwisaka sambu na kufwa [Nsiku to Bambikudi. Mono kwisaka, sambu na kufwa yau ve kansi sambu na kulungisa, NW].”

Yezu kele na luzitu ya kuluta ngolo sambu na Nsiku ya Nzambi mpi yandi kesyamisa bantu ya nkaka na kuvanda na luzitu ya mutindu mosi. Yau yina, yandi ketuba nde: “Konso muntu yina ke landaka ve ata mambu mosi ya kuluta fioti na bansiku yai, ke longaka mpi bantu ya nkaka na kusala mutindu mosi, [yandi tabingama muntu ya kuluta ‘fyoti,’ NW] na Kimfumu ya [zulu].” Disongidila nde muntu ya mutindu yina lenda kukota ve na Kimfumu ata fyoti.

Nkatu kuvanda na ngindu ya kuvwenza Nsiku ya Nzambi, Yezu kebedisa nkutu nkadilu ya lenda kunata muntu na kukulula yau. Na nima ya kumonisa mambu ya Nsiku ketuba nde, “Kufwa muntu ve,” Yezu keyika nde: “Kansi mono ke tubila beno nde: Konso muntu yina me wila mpangi na yandi makasi, bo ta sambisa yandi.”

Sambu kulanda na kuwila mpangi makasi kele kigonsa ya nene, mbala ya nkaka na kunataka nkutu na kugonda, Yezu meta kingana sambu na kumonisa tii na wapi beto fwete kukwenda sambu na kutula ngemba. Yandi ketuma nde: “Ebuna, kana nge ke nata makabu [ya kimenga] na Nzambi, ebuna ntangu nge me kuma na kisika kele mesa-kimenga, nge me yibuka nde mpangi na nge ke na makambu ti nge, bikisa makabu na nge pana na ntwala ya mesa-kimenga, kwenda ntete kuwakana ti mpangi na nge; na nima, vutuka, pesa makabu na nge.”

Na kubendaka dikebi na nsiku ya nsambwadi na kati ya Bansiku Kumi, Yezu kelanda nde: “Beno me waka nde Nzambi tubaka nde: ‘Kusala [bizumba, NW] ve.’ ” Kansi, Yezu mebuya nkutu ti nkadilu ya bulembu na yina metala bizumba. “Mono ke tubila beno nde: Konso muntu yina [kelanda na kutala, NW] nkento ya ngani ti nzala ya kuladisa yandi, yandi me sala [bizumba, NW] ti yandi na ntima na yandi na ntangu yina.”

Awa Yezu ketubila ve kaka ngindu ya mambi ya lenda kuluta kansi yandi ketubila ‘kulanda na kutala.’ Kulanda na kutala ya mutindu yina ketedimisaka mpusa ya ngolo, yina, kana dibaku memonana, lenda kusuka na bizumba. Inki mutindu muntu lenda kusala sambu na kukandikila mambu yai na kusalama? Yezu memonisa na kingana inki mutindu balukanu ya ngolo lenda kuvanda mfunu, na kutubaka nde: “Ebuna kana disu na nge ya kibakala ke benda nge na kusala masumu, tumuna yo, losa yo! . . . Mutindu mosi, kana diboko na nge ya kibakala ke benda nge na kusala masumu, zenga yo, losa yo!”

Mbala mingi bantu kendimaka na kutambika kinama mosi ya nitu yina kele na maladi sambu na kugulusa luzingu na bau. Kansi, na kutadila Yezu, yau kele nkutu mfunu mingi na ‘kulosa’ konso kima yina, ata nkutu kima ya mfunu kibeni bonso disu to diboko, sambu na kutina ngindu mpi bisalu ya mansoni. Kana ve, Yezu ketendula nde, bantu ya mutindu yina talosama na Gehena (kisika ya bau vandaka kuyokila bamvindu penepene na Yeruzalemi), yina kele kimfwani ya mbungulu ya mvula na mvula.

Yezu kemonisa mpi mutindu ya kusadila na ntwala ya bantu yina kesosa na kukota beto nsoki to na kusala beto mbi. Ndongisila na yandi kele nde: “[Kutelamanina ve muntu ya mbi, NW]. Kana muntu me bula nge mbata na ditama ya kibakala, pesa yandi nzila na kubula nge na ditama ya kinkento mpi.” Yezu kezola kutuba ve nde muntu lenda ve kuditanina to kutanina dibuta na yandi kana yau menwanisama. Mbata kepesamaka ve sambu na kulwadisa nitu, kansi sambu na kufinga. Kima ya Yezu kezola kutuba kele nde kana konso muntu yina memeka na kusosa kubasisa maswana to kunwana, yau kuvanda na kupesaka mpenza mbata to na kubasisaka bangogo ya mafingu, yau tavanda mbi na kuvutula.

Na nima ya kubenda dikebi na Nsiku ya Nzambi sambu na kuzola mfinangani, Yezu ketuba nde: “Kansi mono ke tubila beno nde: Beno [landa na kuzola, NW] bambeni na beno, samba Nzambi sambu na bantu yina ke monisaka beno mpasi.” Na kupesaka kikuma ya ngolo sambu na kusala mutindu yina, yandi keyika nde: “Mpidina beno ta vanda mpenza bana ya Tata na beno yina kele na zulu. Sambu yandi ke basisaka ntangu na yandi na zulu sambu na bantu ya mbi ti na bantu ya mbote.”

Yezu mesukisa kitini yai ya disolo na yandi na kusyamisaka nde: “Beno fwete kuvanda bantu ya kukuka, bonso Tata na beno ya zulu kele ya kukuka.” (NW) Yezu kezola kutuba ve nde bantu lenda kuvanda ya kukuka na mambu yonso. Kansi, bau lenda, na kulanda mbandu ya Nzambi, kuyalumuna zola na bau ata nkutu sambu na kuyamba bambeni na bau. Mambu ya mutindu mosi ya Luka kusonikaka ketubila bangogo ya Yezu mutindu yai: “Beno [landa na kuwila, NW] bantu ya nkaka mawa mutindu Tata na beno ke wilaka bantu mawa.”

Kisambu, mpi Kutula Ntima na Nzambi

Mutindu Yezu kelanda ti disolo na yandi, yandi mebedisa luvunu ya bantu yina kesikisaka vumi na bau. Yandi ketuba nde: “Kana nge ke pesa makabu ya nsukami, kubula tango ve; yina mutindu bantu ya luvunu ke salaka.”

Yezu melanda: “Kana beno ke samba Nzambi, beno vanda ve bonso bantu ya luvunu. Bo ke zolaka kuvanda ya kutelama sambu na kusamba na banzo ya bisambu ti na bampambu ya nzila sambu bantu yonso kumona bo.” Kansi, yandi kepesa ndongisila nde: “Kana nge ke zola kusamba, kota na suku na nge, kanga kielo, ebuna samba Tata na nge yina ke monikaka ve.” Yezu yandi mosi kusalaka bisambu na meso ya bantu yonso, ebuna yandi kebuya yau ve. Dyambu ya yandi kebuya kele bisambu ya kesalamaka sambu na kuyitukisa bawi mpi na kusosa lusikisu na bau.

Na nima Yezu kepesa ndongisila yai: “Ntangu nge kesamba, kuvutukilaka ve kaka mambu mosi mbala na mbala, bonso bantu ya makanda kesalaka.” (NW) Yezu kezola kutuba ve nde kuvutukila kele mbi. Na okazyo mosi, yandi mosi kuvutukilaka mbala mingi “ndinga ya mutindu mosi” ntangu yandi vandaka kusamba. Kansi dyambu ya yandi kebuya kele “kuvutukila mbala na mbala” bandinga ya mesimbamaka na ntu, mutindu bayina ketangaka syapele na kusimbaka dimbuma mosi mosi na musapi na ntangu bau kevutukila bisambu nkatu kuyindula.

Sambu na kusadisa bawi na yandi na kusamba, Yezu mepesa mbandu ya kisambu yina kele ti malombu nsambwadi. Ya ntete tatu kepesa mpenza ntonda na kimfumu ya Nzambi ti na balukanu na yandi. Yau kele malombilu sambu zina ya Nzambi kukumisama, Kimfumu na yandi kukwisa, mpi luzolo na yandi kusalama. Yina iya ya mebikala kele malombilu ya muntu na muntu, mingimingi, sambu na madya ya konso kilumbu, sambu na ndolula ya masumu, sambu na kokonda kupukumuka kuluta kiteso ya mvibudulu na beto, mpi sambu na kukatulama na nkwa mambi.

Na kulandaka, Yezu ketubila mutambu ya kutula mbalu ya kuluta mingi na bima ya kinsuni. Yandi kepesa ndongisila yai: “Beno bumba kimvwama awa na nsi-ntoto ve. Awa na nsi-ntoto baniama ke diaka yo, yo ke bwaka matadi, bamiyibi ke kotaka na nzo na ngolo na kwenda kuyiba yo.” Bimvwama ya mutindu yina kefwaka kaka ve, kansi na meso ya Nzambi yau keyikaka ve ata mafwana.

Yau yina, Yezu ketuba nde: “Beno bumba kimvwama na zulu.” Dyambu yai kesalamaka na kutulaka kisalu ya Nzambi na kisika ya ntete na luzingu na nge. Ata muntu mosi ve lenda kukatula mafwana to nsendo na yau ya nene ya mebakama na mutindu yina na Nzambi. Na nima Yezu keyika nde: “Kisika kele kimvwama na nge, po pana mpi ta vanda ntima na nge.”

Na kutubilaka dyaka mutambu ya bima ya kinsuni, Yezu kepesa kingana yai: “Meso na nge kele bonso mwinda ya nitu na nge. Kana meso na nge kele mbote, nitu na nge ya mvimba mpi ta vanda na mwini. Kansi kana meso na nge kele ya kufwa, nitu na nge ya mvimba mpi ta vanda mpimpa.” Disu yina kesala mbote kele sambu na nitu bonso mwinda yina kesema na kisika ya mpimpa. Kansi, sambu na kumona mbotembote, disu fwete kuvanda petepete, yau kezola kutuba nde, yau fwete kutula dikebi na kima mosi. Kana disu ketala mbote ve, yau kenataka na kukonda kutadila bima mbote, na kutulaka bimvwama ya kinsuni na ntwala ya kisalu ya Nzambi, mpila yina “nitu ya mvimba” kekumaka mpimpa.

Yezu mesukisa dyambu yai ti kingana mosi ya ngolo: “Ata muntu mosi ve lenda sadila bamfumu zole. Yandi ta zola mfumu mosi kansi yina ya nkaka ve, yandi ta lemfuka na mfumu mosi kansi yandi ta vwenza yina ya nkaka. Beno mpi, beno lenda sadila bamfumu yai zole ve, Nzambi ti kimvwama.”

Na nima ya kupesa ndongisila yai, Yezu mendimisa bawi na yandi nde bau fwete kuvanda ve na mayindu na yina metala mpusa na bau ya bima ya kinsuni kana bau ketula kisalu ya Nzambi na kisika ya ntete. Yandi ketuba nde: “Beno tala bandeke: Bo ke kunaka ve, bo ke katulaka bima mpi ve na bilanga, bo ke bumbaka yo na nzo ve. Kansi Tata na beno yina kele na zulu ke pesaka bo madia.” Ebuna yandi meyufula nde: “Keti beno me luta bandeke ve na mfunu?”

Na nima, Yezu mesadila bintuntu ya nseke mpi memonisa nde: “Ata yandi mosi Salomo, na lukumu na yandi yonso ya kimfumu, yandi lwataka bilele ya kitoko ve bonso kintuntu mosi na kati ya bintuntu yai.” Yandi kelanda nde: “Ebuna, kana yandi ke lwatisaka mpidina matiti yina, keti yandi ta lwatisa beno ve ya kuluta mingi? A, lukwikilu na beno kele fioti mpenza!” Na yau, Yezu mesukisa nde: “Beno kumona mpasi ve na kuyulaka nde: ‘Beto ke dia nki? Beto ke nwa nki? Beto ke lwata nki?’ . . . Tata na beno yina kele na zulu kuzaba nde beno ke na mfunu ya bima yina yonso. Kansi beno landa kaka na kusosa [ntete kimfumu ti lunungu na yau, NW], ebuna yandi ta yika beno bima yina yonso.”

Nzila ya Luzingu

Nzila ya luzingu kele yina ya kundima malongi ya Yezu. Kansi yau kele petepete ve na kusala. Mu mbandu, Bafarize kele na kikalulu ya kusambisa bampangi na bau na mutindu mosi ya ngolo, mpi yau lenda kuvanda nde bantu mingi kefulula bau. Ebuna mutindu Yezu kelanda Disolo na yandi na zulu ya Ngumba, yandi kepesa lukebisu yai: “Beno sambisa ve bantu ya nkaka, mpidina Nzambi ta sambisa beno ve. Sambu, mutindu beno ke sambisaka bantu ya nkaka, Nzambi mpi ta sambisa beno mutindu yina.”

Yau kele kigonsa na kulanda mbandu ya Bafarize, batongi ya ngolo. Na kutadilaka mambu ya Luka kusonikaka, Yezu mepesa kingana sambu na kumonisa kigonsa yai na kutubaka nde: “Muntu ya kufwa-meso lenda nata muntu ya nkaka ya kufwa-meso ve; kana ve bo yonso zole ta kwenda kubwa na dibulu.”

Yau kele mbi kibeni na kulutikisa kutonga bankaka, na kukumisaka bifu na bau ngolo to na kusalaka bau mbi. Yau yina Yezu kutubaka nde: “Nki mutindu nge lenda tubila mpangi na nge nde: ‘Bika mono katula mwa-dititi yina kele na disu na nge,’ kansi nge mosi nge ke na nti ya nene na disu na nge? Nge muntu ya luvunu, katula ntete nti ya nene yina kele na disu na nge, ebuna nge ta zaba kumona mbote sambu na kukatula mwa-dititi yina kele na disu ya mpangi na nge.”

Yau kezola kutendula ve nde balongoki ya Yezu fwete kusadila ve luswasukusu na bantu ya nkaka, sambu yandi ketuba nde: “Kima yina kele ya santu, beno lenda pesa yo ve na bambwa, . . . beno losa ve mayaka na beno ya ntalu na bangulu.” Bakyeleka ya Ndinga ya Nzambi kele ya santu. Na mutindu ya kifwani, yau kele bonso mayaka ya ntalu. Kansi, kana bantu ya nkaka ya kufwanana na bambwa to na bangulu, kendima ve bakyeleka yai ya mbalu, balongoki ya Yezu fwete kubikisa bantu yina mpi kusosa bankaka yina kendima kuluta mingi.

Ata Yezu meyita kutubila kisambu na Disolo na yandi na zulu ya Ngumba, yandi ketubila mingi ntangu yai mfunu ya kukangama na yau. Yandi kepesa ndongisila nde: “Beno landa kaka na kulomba . . . ebuna Nzambi ta pesa beno yo.” Sambu na kupesa mbandu yina kemonisa nde Nzambi kele ya kuyilama na kundima bisambu, Yezu keyufula nde: “Na kati na beno, kana nge kele tata, ebuna mwana na nge kulomba nge mampa, keti nge ta pesa yandi ditadi? . . . Ebuna beno bantu ya mbi, kana beno zaba kupesa makabu ya mbote na bana na beno, zaba nde Tata na beno yina kele na zulu ta pesa mpenza bima ya mbote na bantu yina ke lombaka yandi yo!”

Na nima Yezu mepesa yina mekumaka nkadilu ya ndyatilu ya kuluta kitoko, yina bau kebingaka mingi Nsiku ya Wolo. Yandi ketuba nde: “Beno sala bantu ya nkaka mambu yonso yina beno zola nde bo sala beno.” Kuzinga na kuwakana ti nsiku yai, kelomba kusala na kyeleka yonso na kusadilaka bantu ya nkaka mambote, na kubakaka bau mutindu nge tazola nde bau kubaka nge.

Bangogo ya Yezu yai kelanda kemonisa nde nzila ya luzingu kele ve petepete na kulanda: “Beno kota na kielo yina kele ya fioti. Sambu kele ti kielo ya nene ti nzila ya nene yina ke nataka bantu na lufwa, bantu mingi ke kwendaka na nzila yina. Kansi kielo ti nzila yina ke nataka bantu na moyo yo kele nkaka mpenza, bantu fioti mpamba ke monaka yo.”

Kigonsa ya kukusama kele ya nene, Yau yina Yezu kepesa lukebisu yai: “Beno keba na [bambikudi, NW] yina ke tubaka mambu ya luvunu na zina ya Nzambi; kana bo ke kwisila beno, bo ke monikaka bonso mameme, kansi na ntima na bo bo kele bonso [bambwa ya nseke ya makasi, NW].” Mutindu banti ya mbote ti ya mbi lenda kuzabana na bambuma na yau, Yezu ketuba nde bambikudi ya luvunu lenda kuzabana na bikalulu na bau ti na malongi na bau.

Na kufulaka, Yezu ketendula nde kele ve kaka mambu yina muntu ketubaka kekumisaka yandi longoki na Yandi kansi mpi mambu yina ya yandi kesalaka. Bantu ya nkaka ketubaka nde Yezu kele Mfumu na bau, kansi kana bau kesalaka ve luzolo ya Tata na yandi, yandi ketuba nde: “Mono ta tubila bo nde: ‘Mono me zabaka beno ntete ve. Beno katuka awa na meso na mono!’ [Beno bantu kevwenzaka nsiku, NW].”

Na kumanisa, Yezu metuba ndinga ya nsuka ya kuvila ve sambu na disolo na yandi. Yandi ketuba nde: “Konso muntu yina me wa mambu yai ya mono me tuba, kana yandi landa yo, yandi me fwanana na muntu ya mayele yina tungaka nzo na yandi na zulu ya matadi. Ntangu mvula nokaka ngolo, masa fulukaka mingi, mupepe bulaka ngolo na nzo yina, kansi nzo bwaka ve, sambu yandi tungaka yo na zulu ya matadi.”

Na ndambu ya nkaka, Yezu ketuba nde: “Konso muntu yina me wa mambu yai ya mono me tuba, kansi yandi ke landa yo ve, yandi me fwanana na zoba yina tungaka nzo na yandi na zulu ya zelo. Ntangu mvula nokaka ngolo, masa fulukaka mingi, mupepe bulaka ngolo na nzo yina, ebuna nzo bwaka kubwa mosi ya nene!”

Ntangu Yezu memanisa disolo na yandi, bibuka keyituka sambu na mutindu na yandi ya kulonga, sambu yandi kelonga bau bonso muntu mosi ya kele ti kiyeka kansi bonso bamfumu na bau ya mabundu ve. Luka 6:​12-23; Matayo 5:​1-12; Luka 6:​24-26; Matayo 5:​13-48; 6:​1-34; 26:​36-45; 7:​1-29; Luka 6:​27-49.

▪ Na wapi Yuzu kele ntangu yandi kepesa disolo na yandi ya bantu lenda kuvila ve, banani kele pana, mpi inki dyambu mekatuka kusalama na ntwala yandi kusala yau?

▪ Sambu na inki mpila ya kuyituka kele ve nde Luka metendula malongi ya nkaka ya disolo yango na bisika ya kuswaswana?

▪ Inki kepesa disolo ya Yezu mbalu ya nene?

▪ Nani kele kibeni na kyese, mpi sambu na inki?

▪ Nani kebaka mawa, mpi sambu na inki?

▪ Na inki sansa balongoki ya Yezu kele “mungwa ya ntoto” mpi “nsemo ya inza”?

▪ Inki mutindu Yezu kemonisa luzitu ya ngolo na Nsiku ya Nzambi?

▪ Inki ndongisila Yezu mepesa sambu na kutina bikuma ya kugonda ti ya bizumba?

▪ Inki Yezu kezola kutuba na ntangu yandi ketubila kupesa ditama ya nkaka?

▪ Inki mutindu beto lenda kuvanda bantu ya kukuka bonso Nzambi kele muntu ya kukuka?

▪ Inki malongi Yezu mepesa na yina metala kisambu?

▪ Sambu na inki bimvwama ya zulu kele ya kuluta, mpi inki mutindu kubaka yau?

▪ Inki bingana mepesama sambu na kusadisa muntu na kutina nzala ya bima ya kinsuni?

▪ Sambu na inki Yezu metuba nde mfunu kele ve ya kuvanda na mayindu?

▪ Inki Yezu metuba na yina metala kusambisa bankaka; kansi inki mutindu yandi memonisa nde balongoki na yandi fwete kumonisa luswasukusu na kutadilaka bantu?

▪ Inki Yezu metuba dyaka na yina metala kisambu, mpi inki nsiku ya ndyatilu ya kitoko yandi mepesa?

▪ Inki mutindu Yezu memonisa nde nzila ya luzingu kele petepete ve na kulanda mpi nde kigonsa ya kukusama kele?

▪ Inki mutindu Yezu mesukisa disolo na yandi, mpi yau kele ti inki bupusi?