Kapu 37

Yezu Memanisa Mawa ya Fwola Mosi

NTANGU fyoti na nima ya kubelula nsadi ya mfumu ya basoda, Yezu mekwenda na Naini, mbanza yina kele na kiteso ya bakilometere 30 na Sudi-westi ya Kapernaumi. Balongoki na yandi ti bibuka ya nene kelanda yandi. Mbala ya nkaka nkokila mefinama ntangu bau kekuma penepene na Naini. Awa Bau kenata muntu ya kufwa. Mvumbi ya mwana bakala mosi, bau kenata yau na nganda ya mbanza sambu na kwenda kuzika yau.

Mvwandilu ya mama kele ya kuluta mpasi, sambu yandi kele fwola mpi yai kele mwana na yandi mosi kaka. Ntangu bakala na yandi kufwaka, yandi lendaka kubaka nsyamisa sambu yandi kele ti mwana na yandi ya bakala. Bivuvu na yandi, bansatu na yandi mpi balukanu na yandi kuvandaka na makwisa ya mwana yango. Kansi ntangu yai yandi kele ve ata ti muntu mosi ya yandi lenda kubakila ndembikilu. Mawa na yandi kele ya mingi ntangu bantu ya mbanza kefidisa yandi na kisika ya luziku.

Ntangu Yezu memona nkento yango, ntima na yandi mekuma na mawa sambu na mawa ya nkento yango ya kuluta mingi. Ebuna, ti bumbote yonso, kansi mpi ti nsyaminina ya kutudila ntima, yandi metubila nkento yango nde: “Kudila ve!” Nkadilu na yandi ti mutindu na yandi ya kusadila mebenda dikebi ya kibuka. Ntangu yandi mepusana mpi mesimba mbeto ya bau kenatila nitu, bantu ya vandaka kunata yau metelama. Bantu yonso fwete kudiyufula kima ya yandi tasala.

Yau kele kyeleka nde bayina ketambula ti Yezu memonaka yandi kebelula bantu mingi na mutindu mosi ya kuyituka. Kansi ngatu bau memonaka yandi ntete ve na kufutumuna muntu na kati ya bafwa. Keti yandi mekuka na kusala dyambu ya mutindu yina? Na kutubilaka mvumbi, Yezu metuma nde: “Mpangi na mono, mono ke tubila nge: telama ka nge!” Mpi muntu metelama ya kuvanda! Yandi meyantika na kutuba mpi Yezu mepesa yandi na mama na yandi.

Ntangu bantu memona nde toko kele mpenza na luzingu, bau meyantika na kutuba nde: “Profete ya nene me monika na kati na beto!” Bankaka ketuba nde: “[Nzambi metula dikebi, NW] na bantu na yandi.” Nsangu yina ketadila dyambu yai ya ngituka mepanzana nswalunswalu na kati ya Yudea yonso ti na banzyunga yonso ya nsi yango.

Yoane Mbotiki kele kaka na boloko, mpi yandi kezola kuzaba mambu mingi na yina metala kisalu yina Yezu mekuka na kusala. Balongoki ya Yoane metubila yandi mambu yina metala bimangu yai. Inki kele mvutu na yandi? Luka 7:​11-18.

▪ Inki mambu meluta ntangu Yezu kekuma penepene na Naini?

▪ Inki mutindu Yezu mekudiwa na mambu yina ya yandi memona, mpi inki yandi mesala?

▪ Inki bantu metuba sambu na kimangu ya Yezu?