Kapu 39

Bantu ya Lulendo ti Bantu ya Kudikulumusa

NA NIMA ya kutubila bantoma ya Yoane Mbotiki, Yezu mebenda dikebi na bantu ya lulendo, bantu ya kukonda kwikama yina kele na nzyunga na yandi. Yandi ketuba nde: “[Mbandu yai, NW] . . . me fwanana na bana me vanda na kisika ya [zandu, NW]. Bana ya nkaka ke tubila bana ya nkaka nde: ‘Beto me budila beno [pitulu, NW], kansi beno me kina ve! Beto me yimba bankunga ya mafwa, kansi beno me dila ve!’ ”

Inki Yezu kezola kutuba? Yandi ketendula nde: “Yoane me kwisaka, yandi ke buyaka kudia . . . , yandi ke nwaka malafu ve, ebuna bantu ke tubaka nde ‘[Yandi ke na mpeve ya mbi, NW]!’ Kansi Mwana-muntu me kwisaka, yandi ke diaka, yandi ke nwaka, ebuna bo ke tubaka nde: ‘Tala muntu yai: Kisalu na yandi kaka na kudia [mbiki, NW] ti kunwa vinu, yandi kele mpi nduku ya bakalaki ya mpaku ti ya bantu [ya masumu, NW].’ ”

Yau kele mpasi na kuyangidika bantu. Ata kima mosi ve keyangidikaka bau. Yoane kuzingaka luzingu ya kibansa ya kinazili, ya kudibuya, na kulundaka ndinga ya wanzyo yina kumonisaka nde: “Yandi fweti nwa vinu ve to konso malafu ya nkaka ya ngolo.” Kansi bantu ketubaka nde yandi kele ti mpeve ya mbi. Na ndambu ya nkaka, Yezu kezingaka bonso bantu ya nkaka, na kukondaka kubuya bima, kansi bau kefunda yandi nde yandi kelutikisa.

Yau kele mpasi mpenza na kuyangidika bantu! Bau kele bonso bana ya nkaka ya kebuya kukina ntangu banduku na bau kebula pitulu, to kebuya na kuwa mawa ntangu banduku kedila. Kansi, Yezu ketuba nde: “Mayele kemonanaka ya lunungu na bisalu na yandi.” (NW) Ee, nzikisa​—⁠bisalu​—⁠kemonisa pwelele nde mambu ya bau kefundila Yoane ti Yezu kele ya luvunu.

Yezu kelanda na kutubilaka bambanza tatu ya yandi kesinga: Korazini, Betsaida, ti Kapernaumi, kuna yandi salaka bisalu ya kuluta ngolo. Kana yandi salaka bisalu yina na bambanza ya Fenisia ya Tire ti Sidoni, Yezu ketuba nde, bambanza yai ya Fenisia zolaka kubalula ntima na nsi ya saki ti mfututu. Na kuzengilaka Kapernaumi nkanu, yina kemonana bonso nde yau vandaka bwala ya yandi vandaka kuzinga na nsungi ya kisalu na yandi, Yezu ketuba nde: “Na Kilumbu yina ya Nzambi ta sambisa bantu, [yau tavanda mwa mbote sambu na insi ya Sodomi kuluta nge, NW].”

Na nima Yezu mekembisa Tata na yandi ya zulu na meso ya bantu yonso. Yandi mepusama na kusala mutindu yina sambu Nzambi kebumba bakyeleka ya kitoko na bantu ya mayele ti bantu ya kulonguka, kansi kesonga mambu yai ya kitoko na bantu ya kudikulumusa, na bana ya fyoti, na mutindu ya kifwani.

Na nsukansuka, Yezu kepesa imvitasio yai ya zola nde: “Beno kwisa na mono, beno yonso bantu yina me lemba, sambu beno ke nata kilo ya nene, ebuna mono ta pesa beno ntangu ya kupema. Beno baka [vangu, NW] na mono, beno nata yo; beno vanda balonguki na mono, sambu mono kele muntu ya pima, mono kele muntu ya ntima ya mbote; ebuna beno ta zaba kupema. [Vangu na mono, NW] ke salaka mpasi ve ye kizitu na mono, kele kilo mingi ve.”

Inki mutindu Yezu mepesa kupema? Yandi mesala mutindu yina sambu na kukatula bantu na kimpika ya bansiku ya bambuta yina bamfumu ya mabundu kefulusilaka bantu, na kati na yau, mu mbandu, minsiku yina metala Kisabatu. Yandi kemonisa mpi nzila ya ndembikilu na bayina kefwa na kilo ya biyeka ya politiki, mpi na bayina kewa kilo ya masumu na bau sambu na kansansa ya kutungisama. Yandi kemonisa na bayina kele na mawa mutindu ya bau lenda kuyangalala na ngwisani ya mbote ti Nzambi.

Vangu yina kesalaka mpasi ve ya Yezu kepesa ketadila kudipesa ya mvimba na Nzambi, kukuka kusadila Tata na beto ya nkenda mpi ya mawa. Mpi kizitu ya kele kilo ve ya Yezu kepesa na bayina kekwisa na yandi, kele kulemfukila malombu ya Nzambi sambu na luzingu, yina kele bantuma na Yandi ya mesonamaka na kati ya Biblia. Mpi kulemfukila bansiku yai kele kilo ve. Matayo 11:​16-30; Luka 1:15; 7:​31-35; 1 Yoane 5:⁠3.

▪ Na inki mutindu mbandu ya ntangu ya Yezu, ya lulendo mpi ya kesobaka, kefwanana na bana?

▪ Sambu na inki Yezu mepusama na kukembila Tata na yandi ya zulu?

▪ Na inki mitindu bantu kele na kilo, mpi inki kupema Yezu kepesa?