Kapu 42

Yezu Kenganina Bafarize

YEZU kepesa ngindu nde: Kana yandi kebasisa bampeve ya mbi na ngolo ya Satana, mpila yina Satana kele ya kudikabula. Yandi kelanda nde: “Kana beno zola baka bambuma ya mbote, beno fweti vanda mpi na nti ya mbote; kana beno ke na nti ya mbi, beno ta baka mpi bambuma ya mbi. Konso nti ke zabanaka na bambuma na yo.”

Yau kele kukonda ya mayele na kutuba nde bambuma ya mbote ya kubasisa bampeve ya mbi kekatuka na kisalu ya Yezu kesadila Satana. Kana mbuma kele ya mbote, nti lenda kuvanda ve ya mbi. Na ndambu ya nkaka, bambuma ya mbi ya Bafarize ya balufundu ya luvunu mpi ya luteleminu ya kukonda lufulu sambu na Yezu kele nzikisa nde bau mosi kele bantu ya mbi. Yezu ketuba nde: “[Bana ya biwuta, NW] . . . nki mutindu beno lenda tuba mambu ya mbote? Sambu muntu ke tubaka mambu yina me fulukaka na ntima na yandi.”

Sambu bangogo na beto kemonisaka nkadilu ya bantima na beto, mambu ya beto ketubaka kepesaka lufulu sambu na mfundusu. Yezu ketuba nde: “Mono ke tubila beno nde: Na Kilumbu yina ya Nzambi ta sambisa bantu, bo ta samba sambu na konso mambu yina ya mpamba-mpamba ya bo vandaka kutuba. Nzambi ta nungisa nge to yandi ta bedisa nde na mambu yina ya nge ke tubaka.”

Ata nkutu Yezu mesala bisalu mingi ya ngolo, balongi ya Bansiku ti Bafarize kelomba nde: “Longi, beto zola mona kidimbu mosi.” Ata nkutu bantu yai ya kuswaswana ya kukatukaka na Yeruzalemi ziku bau monaka ve bau mosi bimangu na yandi, banzikisa ya bantu kemona mambu yango na meso na bau kele. Na yau, Yezu ketubila bamfumu ya Bayuda nde: “[Mbandu ya mbi mpi ya bizumba, NW] ke sosa kumona kidimbu, kansi Nzambi ta songa beno kidimbu ya nkaka ve, kansi yina ya profete Yonasi mpamba.”

Na kutendulaka inki yandi kezola kutuba, Yezu kelanda nde: “Mutindu Yonasi vandaka na divumu ya mbisi ya nene ya masa bilumbu tatu mpimpa ti mwini, mutindu yo yina mpi Mwana-muntu ta vanda na kati ya ntoto bilumbu tatu mpimpa ti mwini.” Na nima ya kuminama na mbisi ya masa, Yonasi kubasikaka, bonso yandi mefutumuka, yau yina, Yezu kele na kutuba na ntwala nde yandi tafwa mpi na kilumbu ya tatu yandi tafutumuka na moyo. Kansi, bamfumu ya Bayuda, ata ntangu Yezu tafutumuka, bau tabuya “kidimbu ya Yonasi.”

Na yau, Yezu ketuba nde bantu ya Ninive yina kubalulaka ntima sambu na malongi ya Yonasi ta futumuka na ntangu ya mfundusu mpi bau tabedisa Bayuda yina kebuya Yezu. Mutindu mosi, yandi kepesa mbandu ya ntotila-nkento ya Saba, yina kukatukaka na bandambu ya nsuka ya ntoto sambu na kuwa mayele ya Salomo mpi kuyitukaka sambu na mambu ya yandi kumonaka mpi kuwaka. Yezu ketuba nde: “Kansi awa ke na muntu mosi me luta Salomo!”

Ebuna, Yezu kepesa mbandu ya muntu mosi yina mpeve ya mbi mebasika na kati na yandi. Kansi, ntangu yai yandi keyingisa ve mpwasa ti bima ya mbote, yau yina yandi mekuma ya kufuluka ti bampeve ya mbi ya nkaka nsambwadi. Yezu ketuba nde: “Yo ta vanda mpi mutindu mosi na bantu ya mbi ya ntangu yai.” Dibuta ya Izraele kugedisamaka mpi kusobamaka​—⁠bonso kukwenda ya ntangu fyoti ya mpeve mosi ya mbi. Kansi, kubuya ya dibuta kubuyaka bambikudi ya Nzambi, yina mekuma ngolo na luteleminu na yau sambu na yandi mosi Kristu, kesonga nkadilu na yau ya mbi ya kuluta na luyantiku na yau.

Ntangu Yezu kele na kutuba, mama na yandi ti bampangi na yandi mekuma mpi metelama penepene na kibuka. Ebuna muntu mosi metuba nde: “Tala, mama na nge ti bampangi na nge kele awa na nganda, bo ke zola kutubila nge mambu.”

Yezu meyufula nde: “Mama na mono nani, bampangi na mono banani?” Na kusongaka diboko na yandi na balongoki na yandi, yandi ketuba nde: “Beno tala: Mama na mono ti bampangi na mono bo yai. Konso muntu yina ke salaka mambu ya Tata na mono na zulu ke zolaka, yandi yina muntu kele mpangi na mono ya bakala to ya nkento, to mama na mono.” Na mutindu yai Yezu kemonisa nde ata bikangilu ya kevukisa yandi ti bampangi na yandi kele ngolo, ngwisana na yandi ti balongoki na yandi kele ya kuluta ngolo. Matayo 12:​33-50; Marko 3:​31-35; Luka 8:​19-21.

▪ Inki mutindu Bafarize mekuka ve na kusala “nti” ti “bambuma” ya mbote?

▪ “Kidimbu ya Yonasi” kele inki, mpi inki mutindu yau mebuyama na nima?

▪ Inki mutindu dibuta ya Izraele ya mvunkama ya ntete kele bonso muntu yina mpeve mosi ya mbi mebasika na kati na yandi?

▪ Inki mutindu Yezu metubilaka mingi ngwisana na yandi ya ngolo ti balongoki na yandi?