Kapu 55

Balongoki Mingi Mebikisa na Kulanda Yezu

YEZU kele na kulonga mambu yina metala kisalu na yandi bonso mampa ya kyeleka yina mekatukaka na zulu na sinagoga mosi na Kapernaumi. Na ntembe ve, disolo na yandi kele ndandana ya ntembe yina kuyantikaka ti bantu na ntangu bau kutaka yandi na kukatuka na bau na lweka ya Nzadi ya Galilea, kuna bau kudyaka mampa ti bambisi ya kupesamaka na mutindu mosi ya kimangu.

Yezu kelanda disolo na yandi, na kutubaka nde: “Mampa ya mono ta pesa kele nitu na mono; mono ta pesa yo sambu bantu yonso kuvanda na moyo.” Kaka bamvula zole na ntwala, na printemps ya mvu 30 T.B., Yezu kutubilaka Nikodemo nde Nzambi mezolaka mingi inza na mpila nde yandi kupesaka Mwana na yandi bonso Ngulusi. Na yau, Yezu kele na kumonisa ntangu yai nde konso muntu yina ya inza ya bantu yina kedya nsuni na yandi na mutindu mosi ya kifwani, na kumonisaka lukwikilu na kimenga ya mebikala fyoti yandi kutambika, lenda kubaka luzingu ya mvula na mvula.

Kansi, bantu metesa sakuba sambu na bangogo ya Yezu. Bau keyufula nde: “Nki mutindu muntu yai lenda pesa beto nitu na yandi nde beto dia yo?” Yezu kezola bawi na yandi kubakisa nde kudya nitu na yandi tasalama na mutindu mosi ya kifwani. Yau yina, sambu na kutubila mingi dyambu yai, yandi metuba kima mosi ya bantu lenda kubuya mpenza kana bau kubaka yau na mutindu mosi ya kyeleka.

Yezu ketuba nde: “Kana beno dia nitu ya Mwana-muntu ve, kana beno nwa menga na yandi mpi ve, beno ta vanda na moyo ve na beno mosi. Muntu yina ke diaka nitu na mono mpi ke nwaka menga na mono, yandi ke na moyo ya mvula na mvula; mono tapesa yandi diaka moyo na kilumbu ya nsuka. Sambu nitu na mono kele madia ya kieleka, menga na mono kele kima ya kieleka ya kunwa. Konso muntu ke diaka nitu na mono ti kunwa menga na mono, yandi ke zingaka na kimvuka ti mono, mono mpi ke zingaka na kimvuka ti yandi.”

Ya kyeleka, malongi ya Yezu zolaka kuvanda mbi kana yandi vandaka kupesa ngindu ya kudya bantu. Kansi, ya kyeleka, Yezu kele na kutubila ve kudya nitu to kunwa menga na mutindu mosi ya kyeleka. Yandi ketubila mingi kaka nde bayina yonso kezola kubaka luzingu ya mvula na mvula fwete kumonisa lukwikilu na kimenga yina ya yandi tatambika ntangu yandi tapesa nitu na yandi ya kimuntu ya kukuka mpi ntangu ya yandi tatyamuna menga na yandi. Kansi, ata nkutu bamingi na kati ya balongoki na yandi kemeka ve na kubakisa malongi na yandi mpi mpila yina, bau kebuya nde: “Malongi yai me luta ngolo mingi! Nani lenda ndima yo?”

Na kuzabaka nde bamingi na kati ya balongoki na yandi kebokuta, Yezu ketuba nde: “Keti mambu yina ke pesa beno mpasi na ntima? Ebuna nki beno ta banza kana beno mona Mwana-muntu ke tombuka na kisika yina ya yandi vandaka ntete? . . . Mambu ya mono me tubila beno, [yau kesongaka mpeve mpi moyo, NW]. Kansi bantu ya nkaka na kati na beno, bo ke tulaka ntima na mono ve.”

Yezu kelanda nde: “Yo yina mono tubilaka beno nde ata muntu mosi ve lenda kwisa na mono kana Nzambi me pesa yandi nzila ve.” Ntangu bau mewa mpila yai, balongoki mingi mekatuka mpi kelanda yandi dyaka ve. Ebuna, Yezu mebaluka na bantumwa 12 mpi meyufula nde: “Beno mpi, keti beno ke zola kwenda?”

Piere kevutula nde: “Mfumu, na nani beto ta kwenda? Mambu ya nge ke tubaka yo ke pesaka moyo ya mvula na mvula. Ntangu yai, beto me ndima nge, beto me zaba nde nge kele muntu ya santu me katukaka na Nzambi.” Kidimbu ya mbote ya kwikama ya inki mutindu, ata nkutu Piere ti bantumwa ya nkaka lenda kuvanda mebakisa ve mbotembote malongi ya Yezu na yina metala dyambu yai!

Ata nkutu yandi meyangalala na mvutu ya Piere, Yezu ketuba nde: “Mono muntu solaka beno yonso kumi na zole, mpidina ve? Kansi muntu mosi na kati na beno, yandi kele [mukusi, NW].” Yandi ketubila Yudasi Iskariote. Ngatu na ntangu yai Yezu meyita kusengumuna “luyantiku,” to bidimbu ya ndyatilu ya mbi na Yudasi.

Yezu mekatuka kupesa bantu nsoni na kubuyaka kundima ngindu na bau ya kukumisa yandi ntotila, mpi bau lenda kuvanda keyindula nde: ‘Inki mutindu muntu yai lenda kuvanda Mesia kana yandi kebuya kisalu ya mefwana na Mesia?’ Yai, mpi, kele ngyufula mosi yina kele mpenza ya kubongisama na mabanza ya bantu. Yoane 6:​51-71; 3:⁠16.

▪ Sambu na banani Yezu kepesa nitu na yandi, mpi inki mutindu bantu yango ‘kedia nitu na yandi’?

▪ Inki bangogo ya nkaka ya Yezu mepesa bantu mpasi na ntima, kansi inki yandi ketubila mingi?

▪ Ntangu bamingi meyambula na kulanda Yezu, inki mvutu Piere mepesa?