Kapu 66

Na Nkinsi ya Bisasa

YEZU mezabana mingi na kiteso ya bamvula tatu kubanda na mbotika na yandi. Mafunda ya bantu mingi memona bimangu na yandi, mpi nsangu ya bisalu na yandi meyalumuka na insi ya mvimba. Ntangu yai, mutindu bantu mevukana sambu na Nkinsi ya Bisasa na Yeruzalemi, bau kesosa yandi kuna. Bau keyufula nde: “Yandi kele wapi?”

Yezu mekuma disolo ya ntembe. Bamosi ketuba nde: “Yandi kele muntu ya mbote.” Bankaka nde: “Kele ve, yandi ke kusaka bantu.” Bau ketubatuba mambu mingi ya mutindu yai na nsi-nsi na bilumbu ya ntete ya nkinsi. Kansi ata muntu mosi ve kele ti kikesa ya kutuba pwelele na meso ya bantu sambu na yina metala Yezu. Yau kele mpila yai sambu bantu ketina boma ya mavwanga ya bamfumu ya Bayuda.

Ntangu nkinsi mekuma na katikati, Yezu mekuma. Yandi mekwenda na tempelo, kuna bantu keyituka sambu na kingangu na yandi ya kitoko ya kulonga. Sambu Yezu mekotaka ntete ve nzo-nkanda ya rabiniki, Bayuda keyituka nde: “Nki mutindu muntu yai me zaba mambu yai yonso? Yandi me longukaka mingi ve.”

Yezu ketendula nde: “Malongi yai ya mono ke pesaka beno kele ya mono ve, kansi yo ke katukaka na muntu yina tindaka mono. Konso muntu yina zola sala mambu yina ya Nzambi ke zolaka, yandi ta zaba kana malongi na mono ke katukaka na Nzambi, to kana mono ke tubaka na kiyeka na mono mosi.” Malongi ya Yezu kele na kuwakana kibeni ti nsiku ya Nzambi. Yau yina, yau fwete kuvanda kyeleka nde yandi kesosa nkembo ya Nzambi, ya yandi mosi ve. Yezu keyufula nde: “Moize me pesaka beno Bansiku, mpidina ve?” Na kunganinaka bau, yandi ketuba nde: “Kansi ata muntu mosi ve na kati na beno ke landaka Bansiku yina.”

Na nima, Yezu meyufula nde: “Sambu na nki beno ke sosa mpila ya kufwa mono?”

Bantu yina kele na kati ya kibuka, ngatu banzenza na nkinsi, kezaba ve bangindu ya mutindu yina. Bau kemona nde yau lenda kusalama ve nde muntu tazola kusosa na kufwa longi ya mbote ya mutindu yina. Ebuna bau kemona nde kima mosi kekwendila ve ti Yezu sambu yandi kuyindula dyambu ya mutindu yai. Bau ketuba nde: “Nge ke na mpeve ya mbi. Nani ke sosa mpila ya kufwa nge?”

Bamfumu ya Bayuda kezola kufwa Yezu, ata kibuka kubakisa yau to ve. Ntangu Yezu kubelulaka muntu na kilumbu ya Kisabatu mvula mosi ti ndambu na ntwala, bamfumu kusosaka na kufwa yandi. Ebuna Yezu kemonisa ntangu yai kukonda kuyindula na bau na kuyufulaka bau nde: “Sambu na kulanda Bansiku ya Moize, beno ke zengaka mwana ya bakala ata na [kisabatu, NW], ebuna sambu na nki beno ke wila mono makasi kana mono belulaka muntu ya mvimba na [kisabatu, NW]? Kana beno ke zola kuzenga mambu, beno tala kaka ve mambu yina ke monikaka na meso, kansi beno zenga mambu na nzila mosi ya mbote.”

Bantu ya Yeruzalemi, yina kezaba makambu, ketuba ntangu yai nde: “Muntu ya bo ke sosa na kufwa kele yandi yai ve? Tala, yandi ke tuba na meso ya bantu yonso, kansi bo ke tubila yandi ata kima ve! Keti ya kieleka, bamfumu na beto, bo me bakisa nde yandi kele Mesia?” Bantu yai ya Yeruzalemi ketendula sambu na inki bau kekwikila ve nde Yezu kele Kristu: “Ntangu Mesia ta kwisa, ata muntu mosi ve ta zaba kana yandi me katuka wapi. Kansi muntu yai, beto zaba wapi yandi me katuka.”

Yezu kevutula nde: “Beno zaba mono, beno zaba mpi wapi mono me katuka. Mono kwisaka ve na ngolo na mono mosi. Muntu yina tindaka mono, yandi kele muntu ya kieleka. Beno zaba yandi ve. Mono zaba yandi sambu mono katukaka kuna na yandi; yandi muntu tindaka mono.” Ntangu bau mewa mpila yai, bau kesosa mpila ya kukanga yandi, ngatu sambu na kutula yandi na boloko to na kufwa yandi. Kansi bau menunga ve sambu ntangu ya Yezu ya kufwa melunga ntete ve.

Kansi, bantu mingi kekwikila na Yezu, mpi bikuma ya mbote kele sambu na yau. Sambu, yandi tambulaka na zulu ya masa, yandi lembikaka mipepe, yandi lembikaka bitembo na banzadi, yandi disaka mafunda ya bantu na mampa ti bambisi fyoti, yandi belulaka bantu ya maladi, yandi tambusaka bifwa-makulu, yandi kangulaka meso ya bifwa-meso, yandi belulaka bantu ya lepre, mpi yandi tedimisaka nkutu bafwa. Yau yina, bau keyufula nde: “Ntangu Mesia ta kwisa, keti yandi ta luta muntu yai na kusala mambu ya kuyituka?”

Ntangu Bafarize mewa bantu ketuba mambu yai na nsi-nsi, bau ti bambuta ya banganga-Nzambi metinda bangenzi sambu na kukanga Yezu. Yoane 7:​11-32.

▪ Inki ntangu Yezu mekuma na nkinsi, mpi inki bantu ketuba na nsi-nsi sambu na yandi?

▪ Sambu na inki yau lenda kuvanda nde bantu ya nkaka ketuba nde Yezu kele ti mpeve ya mbi?

▪ Inki mboninu ya Yezu bantu ya Yeruzalemi kele na yau?

▪ Sambu na inki bantu mingi kekwikila na Yezu?