Kapu 74

Ndongisila na Marta, mpi Malongi Sambu na Kisambu

NA NTANGU Yezu kelanda kisalu na Yudea, yandi mekota na bwala Betania. Yai kele kisika Marta, Maria ti mpangi na bau ya bakala Lazare kezingaka. Mbala ya nkaka Yezu kukutanaka ti bau tatu na ntwala na ntangu ya kisalu na yandi ebuna mpi yandi meyitaka kukuma nduku na bau ya ngolo. Ya kyeleka, Yezu mekwenda ntangu yai na nzo ya Marta, mpi Marta meyamba yandi.

Marta kele na mpusa ya ngolo ya kupesa Yezu bima ya kuluta kitoko ya yandi kele na yau. Ya kyeleka, yau kele nkembo ya nene, na kuyamba Mesia ya kusilamaka na nzo na nge! Ebuna Marta mekudipesa mingi na kulamba madya ya kuluta kitoko mpi na kubongisa bima ya nkaka mingi sambu Yezu kuvanda na kyese mpi na ngemba.

Na ndambu ya nkaka, mpangi ya Marta ya nkento, Maria, mevanda na ntoto na makulu ya Yezu mpi kewidikila yandi. Na nima ya mwa ntangu, Marta mefinama mpi metubila Yezu nde: “Mfumu, keti nge ke mona mpasi ve nde leki na mono me bikisa mono na kusala bisalu yai yonso mono mosi? Si tubila yandi yandi kwisa kusadisa mono!”

Kansi Yezu mebuya na kutubila Maria ata kima mosi. Na kisika ya kusala mpila yina, yandi mepesa Marta ndongisila na mpila yandi mekudipesa mingi na bima ya kinsuni. Yandi menganina yandi na bumbote yonso nde: “Marta, Marta, [nge kele na mayindu mpi, NW] mabanza na nge mekuma kisakasaka sambu na mambu mingi. Kansi mambu [fyoti to, NW] mosi kaka kele mfunu.” Yezu kele na kutuba nde, yau kele ve mfunu na kulutisa ntangu mingi na kulamba banzungu mingi sambu na madya ya ntangu mosi. Kaka ndambu to kima mosi mefwana.

Bangindu ya Marta kele ya mbote; yandi kezola kumonisa kikalulu ya kuyamba. Kansi, sambu na mayindu na yandi na yina metala madya ya kinsuni, yandi kekonda dibaku ya kubaka mbala mosi ndongolo yina kekatuka na yandi mosi Mwana ya Nzambi! Yau yina Yezu kesukisa nde: “Maria me sola mambu yina ya kuluta mbote yina ya Nzambi ta katula yandi yo ve.”

Na nima, na dibaku ya nkaka, longoki mosi melomba na Yezu nde: “Mfumu, longa beto mutindu beto fweti samba Nzambi, mutindu Yoane longaka balonguki na yandi.” Ngatu longoki yai kuvandaka ve pana ntangu Yezu kupesaka kisambu ya mbandu kiteso ya mvula mosi ti ndambu meluta na Disolo na yandi ya zulu ya Ngumba. Ebuna Yezu mevutukila malongi na yandi, kansi na nima yandi melanda na kupesa kingana sambu na kutubila mingi mfunu ya kukwamina na kusamba.

Yezu meyantika nde: “Kana muntu mosi na kati na beno kwenda na nzo ya nduku na yandi na midi ya mpimpa, yandi tubila yandi nde: ‘Nduku na mono, defisa mono mampa tatu. Sambu nduku na mono mosi me katuka na vwayaze, yandi me kwisa kukuma na nzo na mono, ebuna mono ke na kima ve ya kupesa yandi.’ Kana muntu yina kele na kati ya nzo kuvutula nde: ‘A! Kuyangisa mono ve. Beto me kanga nzo ntama, [mono] ti bana na mono beto me lala; mono lenda telama diaka ve sambu na kupesa nge mampa.’ Mono ke tubila beno nde: Kana yandi telama sambu na kupesa yandi mampa yina, yo kele ve nde sambu bo kele banduku, kansi yandi ta pesa yandi bima yina yonso ya yandi ke na yo mfunu sambu nduku na yandi yina ke landa kaka na kulomba yandi ya kukonda nsoni.”

Na kufwanisa yai, Yezu kezola kusukisa ve nde Yehowa Nzambi kele ve ti luzolo ya kupesa mvutu na balombilu, bonso nduku yina ya metubilama na kingana. Ve, kansi yandi kepesa kingana nde kana nduku mosi ya kukondaka luzolo tandima balombilu ya nkwamina, kuluta mingi Tata na beto ya zulu ya kufuluka na zola tasala mutindu mosi! Ebuna Yezu kelanda nde: “Yo yina mono ke tubila beno nde: Beno landa kaka na kulomba . . . ebuna Nzambi ta pesa beno yo; beno landa kaka na kusosa . . .  ebuna beno ta mona yo; beno landa kaka na kubula na kielo, ebuna Nzambi ta kangudila beno yo.”

Na nima, Yezu metubila batata ya bantu ya kukonda kukuka, bantu ya masumu na kutubaka nde: “Na kati na beno, kana nge kele tata, ebuna mwana na nge kulomba nge mbisi ya masa, keti nge ta pesa yandi [nyoka, NW]? To kana yandi kulomba nge diaki keti nge ta pesa yandi nkutu? Ebuna beno bantu ya mbi, kana beno zaba kupesa makabu ya mbote na bana na beno, zaba nde Tata yina kele na zulu ta pesa mpenza Mpeve na yandi na bantu yina ke lombaka yandi Mpeve!” Nsyamisa ya mbote sambu na kukwamina na kisambu ya inki mutindu yai Yezu mepesa! Luka 10:38–11:⁠13.

▪ Sambu na inki Marta kekudiyangisa mingi sambu na kulambila Yezu?

▪ Inki Maria kesala, mpi sambu na inki Yezu mekumisa yandi na kisika ya kukumisa Marta?

▪ Inki mepusa Yezu na kuvutukila malongi yina metala kusamba?

▪ Inki mutindu Yezu meta kingana sambu na mfunu ya kukwamina na kusamba?