Kapu 90

Kivuvu ya Lufutumuku

NA NSUKANSUKA, Yezu mekuma na nsongi ya Betania, bwala mosi yina kele na bakilometere tatu katuka na Yeruzalemi. Mwa bilumbu kaka meluta kubanda lufwa mpi luziku ya Lazare. Bampangi na yandi ya bankento Maria ti Marta kele kaka na mafwa, mpi bantu mingi mekwisa na nzo na bau sambu na kulembika bau.

Ntangu bau kele na mafwa, muntu mosi mekwisa kusonga Marta nde Yezu kele na nzila. Ebuna yandi mekatuka mpi mekwenda nswalu sambu na kukutana ti yandi, yau kemonana nde yandi mesonga ve mpangi na yandi ya nkento. Ntangu yandi kekwisa na Yezu, Marta kevutukila mambu ya fwete kuvanda nde yandi ti mpangi na yandi ya nkento vandaka kutuba mbala mingi na bilumbu iya yina meluta: “Kana nge vandaka awa, mpangi na mono zolaka kufwa ve.”

Kansi, Marta memonisa kivuvu, na kupesaka ngindu na Yezu nde yandi lenda kusala dyaka kima sambu na mpangi na yandi ya bakala. Yandi ketuba nde: “Nzambi ta pesa nge mambu yonso yina ya nge ta lomba.”

Yezu mesila nde: “Mpangi na nge ta vanda diaka na moyo.”

Marta mebakisa nde Yezu ketubila lufutumuku ya makwisa, yina Abrahami ti bansadi ya nkaka ya Nzambi mpi vandaka kuvingila. Yau yina, yandi kevutula nde: “Mono zaba nde yandi ta vanda diaka na moyo na kilumbu ya nsuka.”

Kansi, Yezu mepesa kivuvu ya ndembikilu ntangu yai, na kuvutulaka nde: “Mono kele lufutumuku mpi luzingu.” (NW) Yandi keyibuka Marta nde Nzambi mepesaka yandi kiyeka na zulu ya bafwa, na kutubaka nde: “Konso muntu yina me ndimaka mono ta vanda na moyo, ata yandi me fwa; muntu yina ke na moyo mpi me ndimaka mono, yandi ta fwa ve ata fioti.”

Yezu kele na kupesa ve Marta ngindu nde bantu ya kwikama ya kuvandaka kuzinga ntangu yina tafwa ve ata fyoti. Ve, kansi kima ya yandi ketuba kele nde kumonisa lukwikilu na yandi lenda kunata na luzingu ya mvula na mvula. Luzingu ya mutindu yina bantu mingi tayangalala na yau na nima ya kufutumuka na bau na kilumbu ya nsuka. Kansi, bantu ya nkaka yina kele ya kwikama taguluka na nsuka ya ngidika ya bima yai na ntoto, mpi sambu na bantu yai bangogo ya Yezu tavanda ya masonga na mutindu mosi ya kyeleka kibeni. Bau tafwa ve ata fyoti! Na nima ya ntubilu yai ya kebenda dikebi, Yezu meyufula Marta nde: “Nge me ndima . . . mambu yina?”

Yandi mevutula nde: “E, Mfumu, mono me ndima nde nge kele Mesia, Mwana-Nzambi, yina ya Nzambi tubaka nde yandi fweti kwisa awa na nsi-ntoto.”

Ebuna Marta mevutuka ntinu sambu na kubinga mpangi na yandi ya nkento, na kutubilaka yandi na kinsweki nde: “Longi kele kuna, yandi ke binga nge.” Na mbala mosi Maria mekatuka na nzo. Ntangu bantu ya nkaka memona yandi kekwenda, bau melanda yandi, na kundimaka nde yandi kekwenda na mazyamu ya mbambukilu.

Na ntangu yandi mefinama na Yezu, Maria mebwa na makulu na yandi na kudilaka. Yandi ketuba nde: “Mfumu, kana nge vandaka awa, mpangi na mono zolaka kufwa ve.” Yezu mewa mawa mingi kibeni ntangu yandi memona Maria ti bantu yina vandaka kulanda yandi kedila. Yandi meyufula nde: “Beno zikaka yandi wapi?”

Bau mevutula nde: “Mfumu, kwisa kutala.”

Yezu mpi meyantika na kudila, yau menata Bayuda na kutuba nde: “Tala mutindu yandi me zolaka yandi.”

Bantu ya nkaka meyibuka nde Yezu, na ntangu ya Nkinsi ya Bisasa mwa bangonda na ntwala, kubelulaka mwana bakala mosi ya kubutukaka meso ya kufwa, mpi bau keyufula nde: “Yandi muntu kangulaka meso ya muntu yina vandaka na meso ya kufwa, keti yandi monaka mpila ve ya kusala na mpila nde Lazare kufwa ve?” Yoane 5:21; 6:40; 9:​1-7; 11:​17-37.

▪ Na nsukansuka, na nima ya bilumbu ikwa Yezu mekuma na Betania, mpi inki dyambu yandi mekuta kuna?

▪ Inki lufulu Marta kele na yau sambu na kukwikila na lufutumuku?

▪ Inki mutindu Yezu mewa mawa sambu na lufwa ya Lazare?