Kapu 77

Dyambu Yina Metala Difwa

YA KYELEKA, bantu kezaba nde Yezu vandaka na kudya na nzo ya Mufarize. Ebuna bau mevukana na nganda na kiteso ya mafunda mpi kevingila ntangu ya Yezu tabasika. Ya kuswaswana ti Bafarize, yina ketelamanina Yezu mpi kesosa na kukanga yandi nde yandi kutuba kima mosi ya mbi, bantu kewidikila yandi na mpusa yonso mpi na ntonda.

Na kubalukaka ntete na balongoki na yandi, Yezu ketuba nde: “Beno keba sambu na kifunisu ya Bafarize yina kele ya luvunu.” (NW) Bonso yandi kumonisaka yau na ntangu ya madya, ngidika yonso ya dibundu ya Bafarize kele ya kufuluka na luvunu. Kansi ata nkutu mambi ya Bafarize lenda kubumbama na kumonisaka vumi ya luvunu, na nsukansuka, yau tatunguluka. Yezu ketuba nde: “Mambu yonso yina kele ya kubumbana, bantu ta mona yo; mambu yonso ya kinsweki, bo ta zaba yo.”

Yezu melanda na kuvutukila nsyamisa ya yandi kupesaka na bantumwa 12 ntangu yandi kutindaka bau na nzyetolo ya kisalu ya kusamuna na Galilea. Yandi ketuba nde: “Beno kuwa boma ve sambu na bantu yina ke fwaka nitu, ebuna na nima bo ke mona mpila ya kusala kima ya nkaka ve.” Sambu Nzambi kevilaka ve ata nkutu nsokusa mosi, Yezu kendimisa balandi na yandi nde Nzambi tavila bau ve. Yandi ketuba nde: “Kana bo nata beno na [ntwala ya balukutakanu ya bantu yonso, NW] ti na meso ya bamfumu ya leta . . . Mpeve ya Nzambi ta songa beno na ntangu yo yina mambu ya beno fweti tuba.”

Muntu mosi ya kuvandaka na kati ya bantu metuba ngolo. Yandi kelomba nde: “Longi, tubila mbuta na mono beto kaba [difwa, NW] yina ya tata na beto bikilaka beto.” Nsiku ya Moize ketubaka nde, mwana ya ntete ya bakala fwete kubaka bandambu zole ya difwa, ebuna kikuma ya kuswanina lenda kuvanda ve ata mosi. Kansi yau kemonana nde muntu yango kezola dikabu ya kuluta yina yandi mefwana na kubaka mpenza na difwa.

Yezu mebuya na kukota na mambu yina ti kikuma ya kyeleka. Yandi meyufula nde: “Nani tulaka mono na kuvanda zuzi na beno ti na kukabisa bima na beno?” Na nima yandi mepesa lukebisu yai ya mfunu na kibuka: “Beno keba! Beno katula mabanza yonso ya kuzola kimvwama. Sambu luzingu ya kieleka ya muntu yo kele ve sambu na bima na yandi, ata na ntangu yina ya yandi kele mvwama.” Ee, ata muntu kuvanda na bima inki mutindu, na kutuba ya mbote, yandi tafwa mpi yandi tayambula yonso. Sambu na kutubila mingi dyambu yai ya kyeleka, mpi na kumonisa buzoba ya kukonda kusala lukumu ya mbote ti Nzambi, Yezu mesadila kingana. Yandi ketendula nde:

“Kuvandaka na mvwama mosi vandaka na bilanga; bilanga na yandi butaka bima mingi. Yandi yantikaka kuyindula na ntima na yandi nde: ‘Mono ke na kisika ve ya mono lenda bumba bima na mono yai yonso, ebuna nki mono fweti sala?’ Ebuna yandi tubaka na ntima na yandi nde: ‘Mono ke sala mpidiyai: mono ke fwa banzo yina ya mono ke bumbaka bima, mono ke tunga banzo ya nkaka ya kuluta nene; ebuna mono ta tula bambuma na mono yonso ti bima na mono yonso muna. Ebuna mono ta tuba na mono mosi nde: Nge me bumba bima mingi-mingi sambu na bamvula mingi. Pema ka nge, dia, nwa, sala fete.’ Kansi Nzambi tubilaka yandi nde: ‘Nge zoba yai, na mpimpa yai kaka, mono ke katula moyo na nge. Ebuna bima yai yonso ya nge me bumba, yo ta vanda ya nani?’ ”

Sambu na kusukisa, Yezu ketuba nde: “Yo kele mpidina na konso muntu yina ke bumbaka kimvwama sambu na yandi mosi, kansi yandi kele mvwama ve na meso ya Nzambi.” Ata yau lenda kuvanda nde balongoki kubwaka ve na mutambu ya kukonda mayele ya kufulusa bimvwama, sambu na mayindu ya luzingu ya lumbu na lumbu, bau lenda kubwa kidiba kukonda mpasi sambu na kusadila Yehowa kisalu na moyo na bau ya mvimba. Yau yina, Yezu mesadila dibaku yai sambu na kuvutukila ndongisila ya mbote ya yandi kupesaka kiteso ya mvula mosi ti ndambu na ntwala na Disolo ya zulu ya Ngumba. Na kubalukaka na balongoki na yandi, yandi ketuba nde:

“Yo yina mono ke tubila beno nde: Beno lenda mona mpasi ve nde nki beno ta dia . . . , to nde nki bilele beno ta lwata na nitu na beno. . . . Beno tala [bankwankwa, NW]: bo ke kunaka ve, bo mpi ke katulaka ve bima na bilanga; bo ke na kisika to nzo ya kubumba madia ve. Kansi Nzambi ke pesaka bo madia! . . . Beno tala bintuntu yina kele na nseke nki mutindu yo ke kulaka; kansi yo ke salaka kisalu ve, yo ke kuditungilaka bilele mpi ve. Kansi mono ke tubila beno nde: ata yandi mosi Salomo, na lukumu na yandi yonso ya kimfumu, yandi lwataka bilele ya kitoko ve bonso kintuntu mosi na kati ya bintuntu yai. . . .

“Beno kumona mpasi ve na kusosaka ntangu yonso bima yina ya beno ta dia to ya beno ta nwa. Sambu bamimpani bantu ke sosaka bima yina yonso [na kindila, NW]. Kansi beno, Tata na beno yandi mosi zaba nde beno ke na mfunu ya bima yina yonso. Kansi beno landa kaka na kusosa Kimfumu na yandi, ebuna yandi ta yika beno bima yina yonso ya beno ke na yo mfunu.”

Mingimingi yau kele mpenza mfunu na kutadila bangogo ya Yezu na ntangu ya bampasi ya mbongo. Muntu yina kekuma na mayindu mingi sambu na bima na yandi ya kinsuni mpi keyantika na kuyambula bikesa na yandi ya mambu ya kimpeve, ya kyeleka yandi kekonda lukwikilu na kingangu ya Nzambi ya kulungisa bampusa ya bansadi na yandi. Luka 12:​1-31; Kulonga 21:⁠17.

▪ Ngatu, sambu na inki muntu yina kelomba nde Yezu kubongisila yandi dikambu ya difwa, mpi inki lukebisu Yezu mepesa?

▪ Inki kingana Yezu mesadila, mpi sambu na inki kikuma?

▪ Inki ndongisila Yezu mevutukila, mpi sambu na inki yau mefwana?