Kapu 83

Yandi Mebingama na Nzo ya Mufarize

YEZU kele kaka na nzo ya Mufarize ya lukumu mpi yandi mekatuka kubelula muntu mosi ya kuvandaka na maladi yina kevimbisaka nitu. Ntangu yandi ketala bankundi banzenza kele na kusola bisika ya lukumu na mesa, yandi melonga dilongi ya kudikulumusa.

Ebuna Yezu ketendula nde: “Kana muntu me binga nge na fete ya makwela, kwenda kuvanda ve na kisika ya lukumu. Sambu mbala ya nkaka, muntu yina me binga nge yandi me binga mpi muntu ya nkaka me luta nge na lukumu. Ebuna muntu yango yina bingaka beno zole, yandi ta kwisa kutubila nge nde: ‘Telama, bikila yandi kisika yai.’ Nge ta telama ti nsoni, sambu nge ta kwenda kuvanda na kisika ya kukonda lukumu.”

Ebuna Yezu kepesa ndongisila nde: “Kana bo me binga nge, kuluta mbote nge kwenda kuvanda na kisika yina ya kukonda lukumu. Mpidina, ntangu muntu yina bingaka nge ta kwisa yandi ta tubila nge nde: ‘Nduku na mono, kwisa kuvanda awa na kisika ya lukumu.’ Ebuna nge ta vanda na lukumu na meso ya bantu yonso yina me vanda na mesa mosi ti nge.” Na kusukisa, Yezu ketuba nde: “Nzambi ta kulumusa bantu yina yonso ke kudinangulaka, ebuna yandi ta nangula bayina yonso ke kudikulumusaka.” (Beto bantu metengimisa bisono.)

Na nima, Yezu ketubila Mufarize yina kubingisaka yandi mpi ketendula inki mutindu kupesa madya yina kele kibeni ti mbalu ya kyeleka na meso ya Nzambi. “Kana nge ke binga bantu sambu na kwisa kudia na nzo na nge na suka to na nkokila, kubinga kaka banduku na nge mpamba ve, to bampangi na nge, to tata ti mama na nge, to bamvwama yina kele bwala mosi ti nge. Sambu bo mpi lenda binga nge, ebuna bo lenda sala nge mutindu nge salaka bo. Kansi kana nge ke sala fete, binga bansukami, bantu yina ke na maboko-kifu to makulu-kifu, ti bantu ya kufwa-meso. Nge ta vanda [na] kiese, sambu bo ta mona mpila ve ya kusala nge mutindu nge salaka bo.”

Kupesa madya ya mutindu yina na bansukami tanata mambote na mupesi na yau sambu, mutindu Yezu ketendudila muntu ya kubingisaka yandi, “Nzambi muntu ta sala nge mutindu yina ntangu yandi ta tedimisa bantu ya mbote na lufwa.” Ntendula ya Yezu ya madya yai ya mefwana na kukumisama keyibusa nkundi munzenza mosi mutindu ya nkaka ya madya. Nzenza yango ketuba nde: “Kiese na muntu yina ta dia [mampa, NW] na Kimfumu ya Nzambi!” Kansi, bonso Yezu kelanda na kumonisa yau na nsadisa ya kingana, bau yonso ve kepesa mbalu ya kyeleka na kyese yina ya makwisa.

“Muntu mosi yidikaka fete ya nene, ebuna yandi bingaka bantu mingi na kwisa na fete yina. . . . Yandi tindaka muntu na yandi sambu na kutubila bantu yina yandi bingaka nde: ‘Beno kwisa, sambu fete me yilama ntangu yai.’ Kansi na kati ya bantu yina yonso konso muntu vandaka kupesa mvutu ya mutindu mosi nde: ‘Songa mfumu na nge nde mono ke mona mpila ya kwisa na fete ve.’ Muntu ya ntete tubilaka muntu yina nde: ‘Mono me sumba kilanga na mono, ebuna mono fweti kwenda kutala yo. Pardo, yandi lolula mono.’ Muntu ya nkaka nde: ‘Mono me sumba bangombe na mono kumi, ebuna mono me kwenda kumeka bo. . . . Pardo, yandi lolula mono.’ Yankaka diaka nde: ‘Mono me kwela sesepi yai; yo yina mono ke mona mpila ya kwisa ve.’ ”

Bapardo ya luvunu ya inki mutindu! Na kutuba ya mbote, kilanga to mbisi bau ketalaka yau na ntwala ya kusumba, ebuna yau kele ve mfunu nde musumbi kwenda kutala yau nswalunswalu mpenza na nima ya kusumba. Mutindu mosi, makwela ya muntu lenda kukandikila yandi ve na kundima imvitasio ya mfunu ya mutindu yina. Ebuna, na ntangu yandi mewa bapardo ya mutindu yina, mfumu mewa makasi mpi metuma mpika na yandi nde:

“ ‘Kwenda nswalu na bazandu ti na babalabala ya bwala. Baka bansukami, bantu yina ke na maboko-kifu to makulu-kifu, ti bantu ya kufwa-meso, ebuna kwisa kunata bo awa.’ . . . ntama ve yandi kwisa kutubila mfumu na yandi nde: ‘Mfumu, mono me sala mutindu nge me songa mono, kansi bisika ya nkaka me bika sambu na bantu ya nkaka.’ Ntangu yai, mfumu tubilaka muntu na yandi nde: ‘Kwenda na banzila ya nene ti na banzila ya fioti yina kele na nseke. Songa bantu bo kwisa na fete yai, sambu mono zola nde nzo na mono kufuluka na bantu. . . . Ata muntu mosi ve na kati ya bantu yina ya mono bingaka ntete ta kwisa kudia fete na mono.’ ”

Inki dyambu metendulama na kingana yango? “Mfumu” yina kebinga bantu na madia kele kifwani ya Yehowa Nzambi; “mpika” ya kepesa imvitasio, Yezu Kristu; ebuna “fete ya nene,” kele dibaku ya kukuma mambere ya Kimfumu ya zulu.

Bayina kubakaka ntete imvitasio sambu na kukuma bamambere ya Kimfumu kuvandaka, na zulu ya bantu yonso, bamfumu ya dibundu ya Bayuda ya bilumbu ya Yezu. Kansi, bau buyaka imvitasio yina. Yau yina, kubanda mingimingi na Pantekoti ya mvu 33 T.B., imvitasio ya zole kupesamaka na bantu ya kevwenzama mpi bansukami ya dikanda ya Bayuda. Kansi bantu mingi ve kundimaka sambu na kufulusa bisika 144000 ya Kimfumu ya Nzambi ya zulu. Yau yina, na mvu 36 T.B., bamvula tatu ti ndambu na nima, imvitasio ya tatu mpi ya nsuka kupesamaka na Bayuda ya kukonda kuyotisama, mpi kuvukisama ya bantu ya mutindu yina melandaka tii na bilumbu na beto. Luka 14:​1-24.

▪ Inki dilongi ya kudikulumusa Yezu melonga?

▪ Inki mutindu muntu yina kesadisa fete lenda kupesa madya yina kele na mbalu na meso ya Nzambi, mpi sambu na inki yau tanatina yandi mambote?

▪ Sambu na inki bapardo ya banzenza yina kubingamaka kele ya luvunu?

▪ Inki kele kifwani ya “fete ya nene” yina metubilama na kingana ya Yezu?