Kapu 107

Kingana ya Fete ya Makwela

NA NSADISA ya bingana zole, Yezu metungulula balongi ya Bansiku ti bambuta ya banganga-Nzambi, mpi bau kezola kufwa yandi. Kansi Yezu memanisa ntete ve ti bau. Yandi metela bau kingana ya nkaka, na kutubaka nde:

“Kimfumu ya Nzambi me fwanana na ntotila mosi yina salaka fete sambu na makwela ya mwana na yandi ya bakala. Yandi tindaka bantu na yandi nde: ‘Beno kwenda kusonga bantu yina ya mono bingaka na fete nde bo kwisa.’ ”

Yehowa Nzambi kele Ntotila yina ya mebongisa fete ya makwela sambu na Mwana na yandi, Yezu Kristu. Na nsukansuka, nkento kele balandi ya kupakulama 144000 yina tavukana ti Yezu na zulu. Bantu yina tayalama na Ntotila yango kele bantu ya Izraele, yina, na kunatamaka na kati ya ngwakana ya Nsiku na 1513 N.T.B., kubakaka dibaku ya kukuma “kimfumu ya banganga-Nzambi.” Yau yina, na okazyo yina, bau vandaka bantu ya ntete na kubingama na fete ya makwela.

Kansi, kubingama ya ntete ya bantu yina kuyingisamaka kusalamaka ve na ntwala ya automne ya mvu 29 T.B., ntangu Yezu ti balongoki na yandi (bampika ya ntotila), kuyantikaka kisalu na bau ya kusamuna Kimfumu. Kansi, bantu ya Izraele ya kinsuni yina bampika kubingaka kubanda na mvu 29 T.B. tii na mvu 33 T.B., kundimaka ve na kukwisa. Yau yina, Nzambi kupesaka dikanda ya bantu yina kubingamaka dibaku ya nkaka, bonso Yezu keta nde:

“Yandi tindaka diaka bantu ya nkaka, ebuna yandi songaka bo mambu yai na kuzabisa na bantu yina ya yandi bingaka: ‘Tala, mono me sala fete na mono; mono me fwa bangombe na mono ya babakala ti bangombe na mono ya mafuta, yonso me yilama, beno kwisa na fete ya makwela!’ ” Imvitasio yai ya zole mpi ya nsuka ya bayina kubingamaka kuyantikaka na Pantekoti ya mvu 33 T.B., ntangu mpeve santu kutyamukaka na zulu ya balandi ya Yezu, yau kulandaka tii na mvu 36 T.B.

Kansi, ntalu ya mingi ya bantu ya Izraele kuvwenzaka kubingama yai. Yezu ketuba nde: “[Nkatu kudibanza, NW], bo buyaka na kwisa; . . . muntu mosi kwendaka na bilanga na yandi, muntu [ya nkaka] kwendaka na kisalu na yandi ya komersa, bantu ya nkaka simbaka bantu ya ntotila yina, bo salaka bo mbi, bo fwaka bo.” Yezu kelanda nde: “Ntotila waka makasi mingi; yandi tindaka basoda na yandi sambu na kwenda kufwa bantu yina fwaka bantu na yandi, ebuna yandi tulaka bwala na bo tiya.” Dyambu yai kusalamaka na mvu 70 T.B., ntangu Yeruzalemi kubwisamaka na ntoto na bantu ya Roma, mpi bafwi-bantu yina bau kufwaka bau.

Na nima, Yezu ketendula mambu yina kusalamaka na ntangu yina: “Ntangu yai, [ntotila] tubilaka bantu na yandi nde: ‘Fete ya makwela me yilama kansi bantu ya mono bingaka me fwana ve na fete yina. Beno kwenda na bampambu ya banzila, ebuna beno binga bantu yina yonso ya beno ta mona sambu bo kwisa na fete ya makwela.’ ” Bampika kusalaka yau, mpi “bantu kwisaka kufuluka mingi na nzo yina ya bo salaka fete.”

Kisalu yai ya kuvukisa banzenza na banzila ya nganda ya mbanza kuyantikaka na mvu 36 T.B. Korneye, mfumu ya basoda ya Roma ti dibuta na yandi kuvandaka bampani ya ntete ya kukonda kuyotisama yina kuvukisamaka. Kuvukisama ya bantu yai kele ve Bayuda, bantu yina zolaka kuyinga bayina ya kubingamaka ntete mpi kubuyaka imvitasio, kulandaka tii na mvunkama ya 20.

Nzo ya nkinsi ya makwela mefuluka na mvunkama ya 20. Na nima, Yezu keta mambu ya kesalama, na kutubaka nde: “Mfumu ya nene kwisaka kukota na nzo yina sambu na kutala bantu yina ya yandi me binga, ebuna yandi monaka muntu mosi me lwata bilele ya makwela ve. Yandi yulaka yandi nde: ‘Nduku na mono, nki mutindu nge me kwisa kukota awa kansi nge me lwata bilele ya makwela ve?’ Kansi muntu yango vutulaka ata kima ve. Ebuna mfumu ya nene tubilaka bantu na yandi nde: ‘Beno kangisa yandi bansinga na makulu ti na maboko, beno losa yandi na nganda, na mpimpa. Kuna yandi ta dilaka, yandi ta kangisaka meno na yandi ngolo.’ ”

Muntu yina ya kele ve ti bilele ya makwela kele kifwani ya Bakristu ya luvunu ya Kikristu. Nzambi mendimaka bau ntete ve nde bau kele kibeni bantu ya Izraele ya kimpeve. Nzambi mepakulaka bau ntete ve mpeve santu sambu bau kukuma bamvingidi-difwa ya Kimfumu. Yau yina, bau kelosama na nganda na kati ya tombe kisika bau tafwa.

Yezu kesukisa kingana na yandi na kutubaka nde: “Nzambi ke bingaka bantu mingi, kansi yandi ke solaka kaka bantu fioti mpamba.” Ee, bantu mingi ya kubingamaka na dikanda ya Izraele sambu na kukuma bamambere ya nkento ya Kristu, kansi kaka bantu fyoti na kati ya bantu ya Izraele ya kinsuni kusolamaka. Bamingi na kati ya banzenza 144000 yina kubakaka nsendo ya zulu kele bantu ya Izraele ve. Matayo 22:​1-14; Kubasika 19:​1-6; Kusonga 14:​1-3.

▪ Banani kubingamaka ntetentete na fete ya makwela, mpi inki ntangu imvitasio kupesamaka na bau?

▪ Inki ntangu kubingama ya ntete ya banzenza mesalama, mpi banani kele bampika yina kusadilamaka sambu na yau?

▪ Inki ntangu kubingama ya zole mesalama, mpi banani mebingama na nima?

▪ Banani kele kifwani ya muntu yina mekonda bilele ya makwela?

▪ Bantu mingi yina mebingama kele banani, mpi bantu fyoti yina mesolama kele banani?