Kapu 84

Mukumba ya Longoki

NA NIMA ya kukatuka na nzo ya Mufarize yango ya lukumu, yina kemonana nde yandi kele mambere ya Sanedreni, Yezu melanda na kukwenda na Yeruzalemi. Bibuka ya nene kelanda yandi. Kansi inki kepusa bau? Inki kelombama kibeni na kuvanda landi na yandi ya kyeleka?

Ntangu bau kekwenda kumosi, Yezu mebaluka na bibuka mpi mbala ya nkaka yandi mepesa bau mpasi ntangu yandi metuba nde: “Konso muntu yina ke kwisa na mono, yandi lunga kuvanda mulonguki na mono ve kana yandi me [yina, NW] ve tata na yandi, mama na yandi, nkento na yandi, bana na yandi, bampangi na yandi ya babakala to ya bankento; nkutu yandi fweti [kuyina moyo na yandi mosi, NW].”

Inki Yezu kezola kutuba? Awa, Yezu ketuba ve nde balandi na yandi fwete kuyina bampangi na bau na mutindu mosi ya kyeleka. Kansi, bau fwete kuyina bau na sansa ya kuzola bau ndambu kuluta mutindu ya bau kezolaka yandi. Yau metubamaka nde Yakobi, nkaka ya Yezu, “kuyinaka” Lea mpi kuzolaka Rashele, disongidila nde Lea kuzolamaka ndambu kuluta mpangi na yandi ya nkento Rashele.

Tadila mpi, Yezu kutubaka nde longoki fwete kuyina “nkutu moyo na yandi mosi,” to luzingu. Dyaka, kima ya Yezu kezola kutuba kele nde longoki ya kyeleka fwete kuzola Yandi kuluta nkutu mutindu ya yandi kezolaka luzingu na yandi mosi. Na yau, Yezu ketubila mingi nde kukuma longoki na yandi kele mukumba ya nene. Yau kele ve kima mosi ya kundima nkatu kuyindula mbotembote.

Kuvanda longoki ya Yezu kelomba kundima bampasi ti munyokudi, mutindu yandi kelanda na kumonisa nde: “Konso muntu yina ke nata [nti na yandi ya mpasi, NW] ve, ke landa mono ve, yandi lunga kuvanda mulonguki na mono ve.” Na yau, longoki ya kyeleka fwete kundima na kunata kilo ya nsoni kiteso mosi ti yina ya Yezu kuvibidilaka, yau lenda kulomba nkutu, kana yau kele mfunu, kufwa na maboko ya bambeni ya Nzambi, dyambu yina mebika fyoti nde Yezu kusala.

Yau yina, kuvanda longoki ya Kristu, kele dyambu ya bibuka yina kelanda yandi fwete kufimpa mbotembote. Yezu ketubila mingi dyambu ya kyeleka yina na nsadisa ya kingana. Yandi ketuba nde: “Kana muntu mosi na kati na beno ke zola kutunga nzo ya nda, ntete yandi fweti vanda sambu na kuyindula kana yandi ta basisa mbongo ntalu ikwa sambu na nzo yina. Mpidina, yandi ta zaba kana yandi ke na mbongo ya kulunga sambu na kumanisa nzo yina. Kansi kana yandi me tula fondasio, ebuna yandi ke mona mpila ve ya kumanisa nzo yina, bantu yonso yina ta mona nzo yango bo ta yantika kuseka yandi nde: ‘Nki mutindu muntu yai, yandi yantikaka kutunga nzo, kansi yandi monaka mpila ve ya kumanisa yo!’ ”

Ebuna, Yezu kele na kutela bibuka yina kele na kulanda yandi kingana nde na ntwala ya kukuma balongoki na yandi, bau fwete kubaka lukanu ya ngolo na mpila nde bau lenda kulungisa mambu yina ya melombama, kaka mutindu muntu yina kezola kutunga nzo ya nda kekudindimisaka, na ntwala yandi kuyantika yau, nde yandi kele ti mbongo ya kumanisila yau. Na kupesaka kingana ya nkaka, Yezu kelanda nde:

“Kana ntotila ke kaka na basoda mile kumi mpamba, ebuna kana yandi ke zola kwenda kunwana ti ntotila ya nkaka, ntete yandi fweti vanda sambu na kutala mbote-mbote kana yandi me lunga kunwana ti ntotila ya nkaka yina ke na basoda mile makumi zole. Kana yandi ke mona nde mpila kele ve, ntangu ntotila yina ya nkaka kele kaka ntama, yandi ta tinda bantumwa sambu na [kulomba, NW] ngemba.”

Na nima, Yezu metubila mingi dyambu ya mfunu ya kingana na yandi, na kutubaka nde: “Mutindu mosi mpi sambu na beno: Ata muntu mosi ve na kati na beno lunga kuvanda mulonguki na mono, kana yandi me buya ve bima na yandi yonso.” Yau yina mambu ya bibuka yina kelandila yandi, mpi, ee, konso muntu ya nkaka yina kelonguka mambu ya Kristu, fwete kuvanda na luzolo ya mbote ya kusala mutindu yina. Bau fwete kuvanda ya kuyilama sambu na kutambika bima yonso yina bau kele na yau​—⁠bima na bau yonso, ti yau mosi luzingu mpi​—⁠kana bau kezola kuvanda balongoki na yandi. Keti nge kele ya kuyilama na kusala dyambu yai?

Yezu kelanda nde: “Mungwa kele kima mosi ya mbote.” Na Disolo na yandi ya zulu ya Ngumba, Yezu kutubaka nde balongoki na yandi kele “mungwa ya ntoto,” (NW) disongidila nde bau kele ti bupusi ya lutaninu na zulu ya bantu, kaka mutindu mungwa ya kyeleka kevandaka kima ya ketaninaka. Yezu kesukisa nde: “Kansi kana ntomo na yo kumana, nki mutindu bo ta vutula diaka ntomo yango yina? Bo lenda sadila yo diaka ve, ata na ntoto ya bilanga, ata na kisika yina ya bo ke tulaka mvindu ya bambisi, kansi bo fweti losa yo kaka. Konso muntu yina ke na makutu, yandi wa!”

Na yau, Yezu kemonisa nde ata bayina mekumaka balongoki na yandi kubanda mwa ntangu fwete kulemba ve na lukanu na bau ya kulanda. Kana bau kulemba, bau takuma ya kukonda mfunu, kima mosi ya mpamba sambu na nsi-ntoto yai mpi ya kukonda kufwana na meso ya Nzambi, na bunkufi, bau tafingisa Nzambi. Ebuna, bonso mungwa ya kukonda ntomo, ya kubeba, bau talosama na nganda, ee, bau tafwa. Luka 14:​25-35; Kuyantika 29:​30-33; Matayo 5:⁠13.

▪ “Kuyina” bibuti mpi “kudiyina” kesongidila inki?

▪ Inki bingana zole Yezu mepesa, mpi inki yau kesongidila?

▪ Inki kele dyambu ya mfunu ya ndinga ya nsuka ya malongi ya Yezu yina metala mungwa?