Kapu 87

Bongisa Makwisa na Nsadisa ya Mayele ya Kusadila

YEZU mekatuka kumanisa na kuta nkenda ya mwana yina kuvilaka na kibuka, na kati ya kibuka yango balongoki na yandi, bakalaki ya mpaku ya kukonda masonga ti bansumuki ya nkaka ya mezabanaka, balongi ya Bansiku ti Bafarize kele. Ntangu yai, na kutubilaka balongoki na yandi, yandi keta kingana yina metala mvwama mosi yina mebaka lapolo ya mbi na yina metala muntu ya ketadilaka yandi bima to kapita.

Na kutadila Yezu, mvwama mebinga nsadi na yandi mpi metubila yandi nde yandi kekula yandi. Kapita kekudiyufula nde: “Mono ta sala nki? Sambu patro na mono ke katula mono na kisalu, mono ke na ngolo mingi ve na kwenda kusala bilanga. Mono ta monaka mpi nsoni mingi na kwendaka kulomba bantu mbongo. Ntangu yai, mono me zaba nki mono fweti sala! Kana patro na mono kukatula mono na kisalu, mono ta vanda na banduku yina ta yambaka mono na banzo na bo.”

Inki kele pula ya kapita? Yandi mebinga bantu yina kele ti mfuka ya mfumu na yandi. Yandi keyufula nde: “Nki nge fweti futa na patro na mono?”

Muntu ya ntete mevutula nde: ‘Balitele 2200 ya mafuta ya olive.’ (NW)

Yandi metubila yandi nde: ‘Baka mukanda na nge yai ya mfuka, vanda nswalu, ebuna sonika [balitele 1100, NW].’

Yandi meyufula muntu ya nkaka nde: ‘Ebuna nge, nki nge fweti futa?’

Yandi metuba nde, ‘balitele ya ble 22000.’ (NW)

‘Baka mukanda na nge yai, ebuna sonika [18000, NW].’

Tii ntangu yai, kapita kele ti nswa ya kukitisa ntalu ya mbongo ya patro na yandi fwete kubaka sambu yandi kele kaka lundi ya mbongo na yandi. Na kukitisaka ntalu, yandi kesala kinduku ti bayina lenda kusadila yandi mambote ntangu yandi tavidisa kisalu na yandi.

Ntangu patro mewa mambu yina mesalama, yandi keyituka. Ya kyeleka, yandi “pesaka lukumu na kapita na yandi yina ya muyibi sambu na mambu ya mayele ya yandi salaka.” Yau yina Yezu kuyikaka nde: “Bana ya ngidika ya bima yai kele na mayele ya kusadila ti mbandu na bau mosi, kuluta bana ya nsemo.” (NW)

Ntangu yai na kupesaka dilongi na balongoki na yandi, Yezu kesyamisa nde: “Beno kudibakila banduku na nsadisa ya bimvwama ya kukonda lunungu, sambu, kana yau mekumana, bau lenda kuyamba beno na kisika ya luzingu ya mvula na mvula.” (NW)

Yezu kekumisa ve kapita sambu na kukonda lunungu na yandi kansi sambu na kuyita kuyilama na yandi, mayele ya kusadila. Mbala mingi “bana ya ngidika ya bima yai” kesadilaka mbongo to kiyeka na bau na mutindu mosi ya mbi sambu na kudibakila banduku ti bayina lenda kuvutudila bau mambote. Yau yina bansadi ya Nzambi, “bana ya nsemo,” fwete kusadila bima na bau ya kinsuni, “bimvwama ya kukonda lunungu,” na mutindu mosi ya mayele sambu na mambote na bau mosi.

Kansi mutindu Yezu ketuba, bau fwete kubaka banduku na nsadisa ya bimvwama yai ti bayina lenda kuyamba bau “na bisika ya luzingu ya mvula na mvula.” Sambu na bamambere ya kibuka ya fyoti, bisika yai kele na zulu; sambu na “mameme ya nkaka,” yau kele na Paladisu ya ntoto. Sambu Yehowa Nzambi kaka ti Mwana na yandi keyambaka bantu na bisika yai, beto fwete kusala ngolo sambu na kukuna kinduku ti bau na kusadilaka konso “bimvwama yina ya kukonda lunungu” sambu na kusimba mambote ya Kimfumu. Na nima, ntangu bimvwama ya kinsuni tamana to tavila, mutindu yau tasalama kibeni, makwisa na beto ya mvula na mvula tandimisama.

Yezu kelanda na kutuba nde bantu yina kele na kwikama nkutu na bima yai ya kinsuni, tavanda mpi na kwikama na bima mingi. Yandi kulandaka nde: “[Yau yina, kana beno kele bantu ya kwikama ve na bimvwama ya kukonda lunungu, nani tapesa beno yina kele ya kyeleka (disongidila, mambote ya kimpeve, to ya Kimfumu)? Mpi, NW] kana beno kele bantu yina ya bo lenda tula ntima ve na kimvwama ya muntu ya nkaka, [mambote ya Kimfumu ya Nzambi kupesaka na bantu na yandi], nani ta pesa beno kimvwama na beno mosi [nsendo ya luzingu na bisika ya mvula na mvula]?”

Beto lenda kuvanda ve ata fyoti bansadi ya kyeleka ya Nzambi mpi na mbala mosi bampika ya bimvwama ya kukonda lunungu, bimvwama ya kinsuni, mutindu Yezu kesukisa yau nde: “Mpika mosi ve lenda sadila bamfumu zole. Yandi ta zola mfumu mosi kansi yina ya nkaka ve, yandi ta lemfuka na mfumu mosi kansi yandi ta vwenza yina ya nkaka. Beno mpi, beno lenda sadila bamfumu yai zole ve, Nzambi ti kimvwama.” Luka 15:​1, 2; 16:​1-13; Yoane 10:16.

▪ Inki mutindu kapita ya kingana ya Yezu kesala kinduku ti bayina lenda kusadisa yandi na nima?

▪ “Bimvwama ya kukonda lunungu” kele inki, mpi inki mutindu beto lenda kudibakila banduku na nsadisa na yau?

▪ Nani lenda kuyamba beto na “bisika ya mvula na mvula,” mpi inki bisika yango?