Keti Nge Zabaka Yo?

Inki vandaka kisalu ya bakapita na ntangu ya ntama?

NA NTANGU ya ntama, kapita vandaka kusala na nzo to na lupangu ya muntu. Bantangu ya nkaka ngogo ya Kiebreo mpi ya Kigreki ya bo me balula na “kapita” ke tadilaka nkengi to muntu yina ke salaka na nzo mosi.

Ntangu Yozefi mwana ya Yakobi vandaka mpika na Ezipte, yandi kumaka kapita na nzo ya mfumu na yandi. Yo yina, Mfumu yango “bikaka bima na yandi yonso na maboko ya Yozefi.” (Kuy. 39:2-6) Na nima, ntangu Yozefi kumaka mpi mfumu ya nene na Ezipte, yandi tulaka mpi kapita sambu na kutala nzo na yandi.—Kuy. 44:4.

Na bilumbu ya Yezu, bantu yina vandaka ti baferme vandaka kuzinga na mbanza ntama ti baferme na bo. Yo yina, bo vandaka kutula bakapita sambu na kutala bisalu yina bantu ya kisalu vandaka kusala na ferme konso kilumbu.

Nani bo vandaka kupona sambu na kuvanda kapita? Columella, nsoniki mosi ya Roma ya mvu-nkama ya ntete tubaka nde mpika yina bo vandaka kutula nkengi to kapita vandaka “muntu yina me zaba kisalu mbote.” Yandi vandaka muntu yina “vandaka kulandila kisalu ya bansadi mbote mpi yandi vandaka ve nku.” Yandi ke tuba diaka nde: “Diambu ya kuluta mfunu sambu na kapita vandaka nde yandi fwete yindula ve nde yandi ke zaba mambu yonso mpi yandi vandaka kulonguka ntangu yonso mambu ya mpa.”

Ndinga ya Nzambi ke sadilaka mbandu ya kapita sambu na kutubila bisalu ya nkaka yina ke salamaka na dibundu ya Bukristu. Mu mbandu, ntumwa Piere siamisaka Bakristu na kusadila mayele yina Nzambi me pesaka bo “na kusadilana bonso bakapita ya mbote ya ntima ya mbote ya nene ya Nzambi.”—1 Pie. 4:10.

Yezu sadilaka mbandu ya kapita na kingana yina kele na Luka 16:1-8. Diaka, na mbikudulu ya me tala kidimbu ya kukwisa na yandi bonso Ntotila, Yezu songaka balongoki na yandi nde yandi ta tula “mpika ya kwikama mpi ya mayele” to “kapita ya kwikama.” Kisalu ya ntete ya kapita yai kele ya kupesa balongoki ya Kristu madia ya kimpeve na ntangu ya nsuka. (Mat. 24:45-47; Luka 12:42) Beto kele na ntonda ya mingi sambu beto ke bakaka mikanda ya ke kumisaka lukwikilu na beto ngolo yina kapita ya kwikama ke yidikaka mpi ke pesaka bampangi ya ntoto ya mvimba.