Kapu 89
Na Yudea Sambu na Kisalu ya Kufwila Nkenda
MWA bamposo na ntwala, na ntangu ya Nkinsi ya Kudipesa na Yeruzalemi, Bayuda kumekaka na kufwa Yezu. Ebuna yandi kwendaka na ndambu ya nordi, na ntembe ve, na kisika mosi ya kuvandaka ntama ti Nzadi ya Galilea.
Ntama ve, yandi vandaka kwenda dyaka na ndambu ya sudi sambu na kukwenda na Yeruzalemi, na kulongaka nzila-nzila na babwala ya Perea, distrike mosi ya kele na ndambu ya esti ya Nzadi ya Yordani. Na nima ya kuta kingana yina metala mvwama ti Lazare, yandi melanda na kulonga balongoki na yandi mambu ya yandi kulongaka na ntwala na ntangu yandi kuvandaka na Galilea.
Mu mbandu, yandi ketuba nde yau zolaka kuvanda kuluta mbote kana “bo kangisa yandi ditadi ya nene na nkingu, bo losa yandi na nzadi” na kisika nde yandi kutesisa sakuba na mosi na kati “ya bana ya fyoti” ya Nzambi. Yandi metubila mpi mingi mfunu ya kulolula na kutendulaka nde: “Kana [mpangi na nge] me sala nge mbi mbala nsambwadi na kilumbu mosi, kana yandi me kwisa mpi mbala yina yonso nsambwadi na kutubila nge nde: ‘Mono me balula ntima, mono ta sala mpidina diaka ve,’ nge fweti lolula yandi.”
Ntangu balongoki ya Yezu melomba nde, “Yika beto lukwikilu,” Yezu mevutula nde: “Kana beno vandaka na mwa-lukwikilu nene bonso kamwa-mbuma ya nti yai mutarde, beno zolaka kutubila nti yai ya nene mirie nde: ‘Tumuka awa, kwenda kuvanda na nzadi!’ ebuna yo zolaka kulemfukila beno.” Yau yina, ata nkutu lukwikilu ya fyoti lenda kusala bima ya nene.
Na nima, Yezu meta dyambu mosi ya kelutaka na luzingu yina kepesa mbandu ya nkadilu ya mbote ya metadila nsadi ya Nzambi nkwa-ngolo yonso. Yezu ketuba nde: “Kana muntu mosi na kati na beno ke na mpika yina ke sala na bilanga to ke tala mameme, ntangu mpika yina me katuka na bilanga, me kwisa kuvutuka na nzo, keti yandi ta tubila yandi nde: ‘Kwisa kuvanda nswalu na mesa sambu na kudia’? Ikele ve! Kansi yandi ta tubila yandi nde: ‘Yidikila mono madia, lwata bilele ya nkaka sambu na kusadila mono ntangu ya mono ke dia ti ya mono ke nwa. Na nima, nge mpi ta zaba kudia ti kunwa.’ Yo kele mfunu ve mfumu yina na kupesa mpika na yandi merci. Sambu mpika yina salaka kaka mambu yina ya [yandi fwete, NW] sala. Yo kele mutindu mosi mpi na beno. Kana beno me sala mambu yina yonso ya Nzambi me songaka beno na kusala, beno tuba kaka nde: ‘Beto kele ka beto bampika [ya kukonda mfunu, NW]. Beto me sala kaka mambu yina ya mfumu na beto songaka beto na kusala.’ ” Yau yina, bansadi ya Nzambi fwete kuyindula ve ata fyoti nde bau kesadila Nzambi lemvo na kusadilaka yandi. Kansi bau fwete kuyibuka ntangu yonso dibaku ya bau kele na yau sambu na kusambila yandi bonso bamambere ya nzo na yandi ya yandi ketudilaka ntima.
Ngatu, ntangu fyoti na nima ya Yezu mepesa kingana yai, ngenzi mekuma. Maria ti Marta bampangi ya bankento ya Lazare, yina kezingaka na Betania ya Yudea, bantu kutindaka yandi. Ngenzi ketuba nde: “Mfumu, nduku na nge ke na maladi.”
Yezu kevutula nde: “Lazare ta fwa ve sambu na maladi yina; yandi me bela yo sambu lukumu ya Nzambi kupanzana, mpidina mpi Mwana-Nzambi ta baka lukumu.” Na nima ya kubikala bilumbu zole na kisika yina ya yandi kele, Yezu metubila balongoki na yandi nde: “Beto vutuka na ntoto ya Yudea.” Kansi, bau meyibuka yandi nde: “Longi, sesepi yai awa, Bayuda vandaka kusosa mpila ya kufwa nge na matadi, ebuna nge zola vutuka diaka kuna?”
Yezu keyufula na kupesaka mvutu nde: “Na kilumbu mosi, balere kumi na zole ke na mwini, mpidina ve? Kana muntu kutambula na mwini, yandi lenda ta sakuba ve sambu yandi ke mona mwini ya nsi-ntoto yai. Kansi kana muntu kutambula na mpimpa, yandi fweti ta sakuba sambu yandi ke na mwini ve.”
Kima ya kemonana nde Yezu kezola kutuba awa kele nde “balere ya mwini,” to ntangu ya Nzambi kutulaka sambu na kisalu ya Yezu ya zulu ya ntoto, memana ntete ve mpi tii kuna yau tamana, ata muntu mosi ve lenda kusala yandi mbi. Yandi fwete kusadila ntangu ya nkufi ya “mwini” yina mebikala sambu na yandi, sambu na nima “mpimpa” takwisa ntangu bambeni na yandi tafwa yandi.
Yezu keyika nde: “Nduku na beto Lazare me lala mpongi, kansi mono ke kwenda kutedimisa yandi.”
Na ntembe ve, na kuyindulaka nde Lazare kele na kupema na mpongi mpi nde yai kele kidimbu mosi ya mbote ya kemonisa nde yandi tabeluka, balongoki mevutula nde: “Mfumu, kana yandi me lala mpongi mpamba, yandi ta beluka.”
Na nima, Yezu metubila bau na pwelele nde: “Lazare me fwa. Mono ke na kiese [sambu na beno, NW] sambu mono vandaka kuna ve, sambu mpidina beno ta ndima mono. Beto kwendeno kuna.”
Na ntangu bau mebakisa nde Yezu bau lenda kufwa yandi na Yudea, dyaka na ngindu ya kusadisa yandi, Toma mesyamisa bankundi na yandi balongoki nde: “Beto mpi, beto kwenda kufwa kuna kisika mosi ti Longi.” Ebuna na kutulaka luzingu na bau na kigonsa, balongoki mefidisa Yezu na kisalu yai ya kufwila nkenda na Yudea. Luka 13:22; 17:1-10; Yoane 10:22, 31, 40-42; 11:1-16.
▪ Ntama ve, Yezu vandaka kulonga na wapi?
▪ Inki malongi Yezu mevutukila, mpi inki dyambu yina metala mambu ya kelutaka na luzingu yandi metendula, sambu na kupesa mbandu na inki dyambu?
▪ Inki nsangu Yezu mebaka, mpi inki yandi kezola kutuba na bantubilu “mwini” ti “mpimpa”?
▪ Inki Toma kezola kutuba ntangu yandi ketuba nde ‘Beto mpi, beto kwenda kufwa kuna kisika mosi ti Longi’?