Kapu 91

Ntangu Lazare Mefutumuka

YEZU, kumosi ti bantu yina kefidisa yandi, mekuma ntangu yai na mazyamu ya mbambukilu ya Lazare. Ya kyeleka, yau kele dibulu na kati ya ditadi, mpi ditadi kele na munoko na yau. Yezu metuba nde: “Beno katula ditadi yai.”

Marta mebuya, nkatu kubakisa ntete kima ya Yezu kekana na kusala. Yandi ketuba nde: “Mfumu, yandi me kuma ntete nsudi, sambu yandi kele na maziamu bubu yai me lunga bilumbu iya.”

Kansi Yezu meyufula nde: “Mono tubilaka nge ve nde kana nge kwikila nge ta mon[a] lukumu ya Nzambi?”

Ebuna ditadi mekatulama. Na nima Yezu metombula meso na zulu mpi mesamba nde: “Tata, mono ke pesa nge mersi sambu nge me wila mono. Mono zaba nde ntangu yonso nge ke wilaka mono, kansi mono me tuba mpidina sambu na bantu yai me ziunga mono, sambu bo ndima nde nge muntu me tindaka mono.” Yezu mesamba na meso ya bantu yonso sambu bantu kuzaba nde yina ya yandi mefinama na kusala talungisama na nsadisa ya ngolo ya yandi kubakaka na Nzambi. Na nima yandi meboka na ndinga ya ngolo nde: “Lazare, kwisa kubasika!”

Na yau, Lazare mebasika. Maboko ti makulu na yandi kele kaka ya kukangisa ti bitembe ya bilele, mpi luse na yandi kele ya kufika ti lele. Yezu metuba nde: “Beno katula yandi bansinga, bikisa yandi, yandi yantika kutambula.”

Na ntangu bau memona kimangu yango, Bayuda mingi ya kwisaka kulembika Maria ti Marta mekwikila na Yezu. Kansi, bankaka mekwenda kutubila Bafarize mambu yina mesalama. Bau ti bambuta ya banganga-Nzambi mesadisa mbala mosi lukutakanu ya Sanedreni, kinzonzi ya nene ya Bayuda.

Na kati ya Sanedreni beto kele ti Kaifa, mfumu ya banganga-Nzambi, ye Bafarize mpi Basaduse, bambuta ya banganga-Nzambi, ti bantu yina kuvandaka ntete bamfumu ya banganga-Nzambi. Bau kebokuta nde: “Nki beto fweti sala? Sambu muntu yina ke sala mambu mingi ya kuyituka! Kana beto bikisa yandi na kusala mpidina, bantu yonso ta ndima yandi, ebuna bamfumu ya kimfumu ya Roma ta kwisa kufwa [kisika na beto mpi dikanda na beto, NW].”

Ata nkutu bamfumu ya dibundu kendima nde Yezu “ke sala mambu mingi,” kima mosi kaka ya bau kekudibanzabanza kele pozisyo na bau mosi ti kiyeka. Kufutumuka ya Lazare kele dyambu mosi yina mesimba kibeni Basaduse, sambu bau kekwikilaka ve na lufutumuku.

Kaifa, yina kele mbala ya nkaka Musaduse, mebaka ndinga, na kutubaka nde: “Beno ke bakisa ata kima ve na mambu yai. Beno ke mona ve nde kuluta mbote muntu mosi kufwa na kisika ya bantu yonso? Mpidina Bayuda yonso ta fwa ve.”

Nzambi kupusaka Kaifa na kutuba dyambu yai, sambu ntumwa Yoane kusonikaka na nima nde: “Yandi [Kaifa] vandaka kutuba mambu yina na ngolo na yandi mosi ve.” Kima ya Kaifa vandaka kutuba mpenza kuvanda nde Yezu bau fwete kufwa yandi sambu na kukakila Yandi na kubebisa kuluta mingi bapozisio na bau ya kiyeka ti ya bupusi. Kansi, na kutadila Yoane, ‘Kaifa vandaka kuzabisa na ntwala nde Yezu fweti fwa sambu na Bayuda. Kaka sambu na Bayuda ve, kansi mpi sambu na kuvukisa bana ya Nzambi yonso yina me panzanaka.’ Mpi, ya kyeleka, yau kele lukanu ya Nzambi nde Mwana na yandi kufwa bonso nkudulu sambu na bantu yonso.

Kaifa menunga ntangu yai na kupusa Sanedreni sambu na kusala bapula ya kufwa Yezu. Kansi, ngatu Nikodemo, mambere ya Sanedreni yina meyikanaka ti yandi mingi, mezabisa Yezu bapula yai ya mebongisama, ebuna yandi mekatuka pana. Yoane 11:​38-54.

▪ Sambu na inki Yezu mesamba na meso ya bantu yonso na ntwala ya kufutumuna Lazare?

▪ Inki mutindu bayina kumonaka lufutumuku yai kusalaka?

▪ Inki kesonga mambi ya bamambere ya Sanedreni?

▪ Inki kuvandaka ngindu ya Kaifa, kansi Nzambi kusadilaka yandi na kubikula inki?