Kapu 119

Bau Menata Yandi na Ana, na Nima na Kaifa

YEZU, ya kukangisama bonso muntu ya mbi, menatama na Ana, mfumu ya banganga-Nzambi ya ntama ya kuluta bupusi. Ana kuvandaka mfumu ya banganga-Nzambi ntangu Yezu, bonso leke ya bamvula 12 kuyitukisaka balongi ya rabiniki na tempelo. Bana mingi ya Ana kusalaka na nima bonso mfumu ya banganga-Nzambi, mpi ntangu yai bokilo ya bakala ya Kaifa muntu kele na kisika yango.

Ngatu Yezu bau menata yandi ntete na nzo ya Ana sambu ti lukumu ya yandi kevandaka na yau na luzingu ya mabundu ya Bayuda bonso mbuta ya banganga-Nzambi ya mesalaka mingi. Kulutila yai na nzo ya Ana mepesa nzila na Mfumu ya banganga-Nzambi Kaifa na kuvukisa Sanedreni, bamambere 71 ya kinzonzi ya nene ya Bayuda, mpi sambu na kuvukisa bambangi ya luvunu.

Ntangu yai, mbuta ya banganga-Nzambi Ana keyufula Yezu mambu yina metala balongoki na yandi ti malongi na yandi. Kansi, Yezu kevutula nde: “Mono vandaka kutuba na meso ya bantu yonso. Konso ntangu mono vandaka mpi kulonga na [basinagoga ti na tempelo, NW]; Bayuda yonso ke kutanaka muna. Mono vandaka kutuba kima ve na kinsweki. Sambu na nki nge ke yula mono? Yula bantu yina vandaka kuwa mambu yina ya mono vandaka kutubila bo, sambu bo zaba mbote mambu yina ya mono vandaka kutuba.”

Ntangu bau mewa mpila yina, mosi na kati ya bapolisi ya kuvandaka ya kutelama penepene na Yezu mebula yandi mbata na luse, na kutubaka nde: “Keti mpidina nge fweti vutula na mfumu ya banganga-Nzambi?”

Yezu mevutula nde: “Kana mono me tuba mambu ya mbi, songa mono nki mambu; kansi kana mono me tuba mambu ya mbote, sambu na nki nge me bula mono?” Na nima ya kutubana yai, Ana metinda Yezu ya kukangisa na Kaifa.

Ntangu yai, bambuta yonso ya banganga-Nzambi, bambuta-bantu ti balongi ya Bansiku, ee, kibuka ya Sanedreni yonso, meyantika na kuvukana. Na ntembe ve, kisika na bau ya lukutakanu kele nzo ya Kaifa. Kusambisa makambu mutindu yina, na mpimpa ya Paki, kuvandaka kibeni ya kubuyama na nsiku ya Bayuda. Kansi, yau mekakila ve bamfumu ya mabundu na kulungisa lukanu na bau ya mbi.

Bamposo na ntwala, ntangu Yezu kufutumunaka Lazare, bantu ya Sanedreni kuyitaka kubaka lukanu na kati na bau nde yandi fwete kufwa. Mpi kaka bilumbu zole na ntwala, na Kitatu, biyeka ya mabundu mewakana kumosi sambu na kukanga Yezu na mayele ya mbi sambu na kufwa yandi. Yindula, bau mezengilaka yandi nkanu na ntwala ya kusambisama na yandi!

Ntangu yai, bau kesala kikesa sambu na kuzwa bambangi yina tapesa kimbangi ya luvunu na mpila nde bau lenda kuzwa banzikisa ya kufundila Yezu. Kansi, bau mekuka ve na kuzwa ata mbangi mosi yina kele na kuwakana ti kimbangi na bau. Na nsukansuka, zole mebasika mpi ketuba nde: “Beto waka yandi ke tuba nde: ‘Mono ta fwa [tempelo, NW] yai ya bantu tungaka na maboko na bo. Ebuna, na bilumbu tatu, mono ta tunga . . . ya nkaka yina ya bantu lenda tunga ve na maboko na bo.’ ”

Kaifa meyufula nde: “Keti nge ke vutula ata kima mosi ve? Sambu na nki bantu yai ke funda nge?” Kansi Yezu mevanda pima. Bantu ya Sanedreni mebaka nsoni kibeni, ata nkutu na kati ya lufundu ya luvunu mambu ya bambangi yina zole mesimba ve. Ebuna mfumu ya banganga-Nzambi memeka mayele ya nkaka.

Kaifa kezaba inki mutindu Bayuda kewaka makasi kana muntu kutuba nde yandi kele Mwana ya Nzambi kibeni. Na baokazyo zole na ntwala, bau sukisaka nkatu kuyindula nde Yezu kele muvwenzi yina mefwana na kugondama, ntangu ya bau kuyindulaka na kifu yonso nde yandi vandaka kutuba nde yandi kele kiteso mosi ti Nzambi. Na mayele ya mbi yonso, Kaifa ketuma ntangu yai nde: “Na zina ya Nzambi ya moyo, mono ke songa nge na [kudya ndefi, NW] kana ya kieleka nge kele Mesia, Mwana-Nzambi!”

Ata nkutu mambu yina ya Bayuda kuyindulaka, Yezu kele kibeni Mwana ya Nzambi. Mpi kana yandi kuvandaka pima, yau lendaka kumonana nde yandi mebuya nde yandi kele ve Kristu. Yau yina Yezu mevutula na kikesa yonso nde: “E, mono yandi yai! Beno ta mona Mwana-muntu me vanda na diboko ya kibakala ya [ngolo, NW], beno ta mona yandi mpi ke kwisa na matuti ya zulu.”

Ntangu yandi mewa mutindu yina, Kaifa mesala kima mosi ya kuyituka, yandi mepasula bilele na yandi mpi meboka nde: “Yandi me vwenza Nzambi! Nki mfunu ya kusosa diaka batemwe? Beno me wa si sesepi yai kaka mutindu yandi me vwenza Nzambi! Beno ke banza nki?”

Bantu ya Sanedreni mevutula nde: “Yandi fweti fwa.” Na nima, bau meyantika na kuseka yandi, mpi bau ketubila yandi mambu mingi ya kuvwenza. Bau kebula yandi bambata na luse na yandi mpi kelosila yandi mate na luse yango. Bankaka kefika luse na yandi yonso mpi kebula yandi makofi mpi ketuba na luvwezo yonso nde: “Mesia, songa beto kana nani me bula nge!” Nkadilu yai ya mbi, ya luvwezo kesalama na ntangu ya kusambisa ya mpimpa. Matayo 26:​57-68; 26:​3, 4; Marko 14:​53-65; Luka 22:​54, 63-65; Yoane 18:​13-24; 11:​45-53; 10:​31-39; 5:​16-18.

▪ Na wapi bau menata ntete Yezu, mpi inki bau mesala yandi na nima?

▪ Na nima bau menata yandi na wapi, mpi sambu na inki lukanu?

▪ Inki mutindu Kaifa mekuka na kunata bantu ya Sanedreni na kutuba nde Yezu fwete kufwa?

▪ Inki nkadilu ya mbi, ya kuvwenza mesalama na ntangu ya kusambisa?