Kapu 97

Bansadi na Kilanga ya Vinu

YEZU mekatuka na kutuba nde: “Bantu mingi kele bantu ya ntete . . . bo ta kuma bantu ya nsuka, ebuna bantu mingi kele bantu ya nsuka . . . bo ta kuma bantu ya ntete.” Ntangu yai yandi kepesa mbandu na yau na kutaka nkenda mosi. Yandi keyantika nde: “Kimfumu ya Nzambi me fwanana na [mfumu ya nzo, NW], yina vandaka na bilanga ya vinu. Na suka-suka yandi kwendaka kusosa bantu na kwisa kusala na bilanga na yandi.”

Yezu kelanda nde: “Bo wakanaka nde yandi [mfumu ya nzo] fweti futa bo [denali mosi, NW] na kilumbu mosi. Ebuna yandi tindaka bo na kwenda kusala na bilanga ya vinu. Na [ntangu ya tatu, NW] yandi basikaka diaka, yandi kwendaka na zandu, yandi mona bantu ya nkaka me telama kuna, bo ke na kisalu ve. Ebuna yandi tubilaka bo nde: ‘Beno mpi beno kwisa kusala na bilanga na mono ya vinu, ebuna mono ta futa beno na ntalu ya kufwana.’ Ntangu yai bantu yina kwendaka kusala. Ebuna mfumu yina kwendaka kusosa bantu ya nkaka na [ntangu ya sambanu ti na ntangu ya uvwa, NW]. Na kiteso ya [ntangu ya kumi na mosi, NW], yandi kwendaka diaka na zandu, yandi monaka bantu ya nkaka diaka me telama kuna. Yandi yulaka bo: ‘Sambu na nki beno ke lutisa kilumbu ya mvimba awa kukonda kusala?’ Bantu yina nde: ‘Ata muntu mosi ve me baka beto na kisalu.’ Yandi nde: ‘Mambu ve, beno mpi kwisa kusala na bilanga na mono ya vinu.’ ”

Mfumu ya nzo, to nkwa-kilanga ya vinu, kele Yehowa Nzambi, mpi kilanga ya vinu kele dikanda ya Izraele. Bansadi na kilanga ya vinu kele bantu yina kukotaka na ngwakana ya Nsiku; bau kele ntetentete Bayuda yina kezinga na bilumbu ya bantumwa. Luwakanu ya lufutu mebakama kaka ti bantu yina kesala kilumbu ya mvimba. Lufutu kele ya denali mosi sambu na kilumbu mosi ya kisalu. Sambu “ntangu ya tatu” kele 9:00 na ntwala ya midi, bayina kubingamaka na ntangu ya kisalu ya 3, ya 6, ya 9, mpi ya 11, na kulandaka na ndonga bau mesala bangunga 9, 6, 3, mpi 1.

Bansadi yina kusalaka bangunga 12, to kilumbu ya mvimba, kele bamfumu ya Bayuda yina kevandaka ntangu yonso na kisalu ya dibundu. Bau kele ve bonso balongoki ya Yezu, yina, na ndambu ya mingi ya luzingu na bau, vandaka kusala kisalu ya kuloba to bisalu ya nkaka ya kinsuni. Tii kuna na automne ya mvu 29 T.B. “mfumu ya nzo” kuvandaka metinda ntete ve Yezu Kristu na kuvukisa bantu yai sambu bau kukuma balongoki na yandi. Yau yina, bau kumaka “bantu ya nsuka,” to bansadi ya kilanga ya vinu ya ntangu ya 11.

Na nsukansuka, kilumbu ya kisalu ya kifwani memana na lufwa ya Yezu, mpi ntangu ya kufuta bansadi melunga. Ya kuswaswana ti nsiku ya bantu meyikanaka na yau, bau mefuta ntete muntu ya nsuka, mutindu yau metendulama nde: “Ntangu mpimpa yantikaka kubwa, munkwa-bilanga yina tubilaka kapita na yandi ya kisalu nde: ‘Binga bantu yina, ebuna futa bo mbongo na bo; yantika kufuta ntete bantu yina me kwisa na nima, ebuna na nima, nge futa bantu yina kwisaka na ntwala.’ Bantu yina yantikaka kisalu na [ntangu ya kumi na mosi, NW], bo bakaka [denali, NW] mosi-mosi . . . konso muntu. Ebuna bantu yina kwisaka na ntwala, ntangu bo kwisaka kubaka mbongo na bo, bo vandaka kuyindula nde bo ta baka mbongo mingi, kansi bo mpi bo bakaka [denali, NW] mosi-mosi na konso muntu. Ntangu bo bakaka mbongo na bo, bo yantikaka kubokutila munkwa-bilanga nde: ‘Bantu yai ya nge me baka na nima na beto bo me sala kaka lere mosi, ntangu beto ke sala kilumbu ya mvimba na kati ya mwini, ebuna nge me futa bo kiteso mosi na beto!’ Munkwa-bilanga tubilaka muntu mosi na kati na bo nde: ‘Nduku na mono, wa fioti; mono me sala beno mbi ve. Keti beto wakanaka ti nge ve nde nge ta sala kisalu ya kilumbu mosi sambu na [denali, NW] mosi . . . ? Baka mbongo na nge, kwenda na nzo na nge. Mono zola pesa muntu yai ya mono me baka na nima mutindu mosi bonso mono me pesa nge. Keti mono ke na nswa ve na kusala mutindu mono me zola ti mbongo na mono mosi? To nge ke tula kimpala kaka sambu mono me sala mbote?’ ” Sambu na kusukisa, Yezu mevutukila dyambu ya yandi kutubilaka ntete, na kutubaka nde: “Mpidina, bantu ya nsuka bo ta vanda bantu ya ntete, bantu ya ntete bo ta vanda bantu ya nsuka.”

Kubakama ya denali kusalamaka, na lufwa ya Yezu ve, kansi na Pantekoti ya mvu 33 T.B., ntangu Kristu, “kapita ya kisalu,” metyamuna mpeve santu na zulu ya balongoki na yandi. Balongoki yai ya Yezu kele bonso “bantu ya nsuka,” to bansadi ya ntangu ya 11. Denali kele ve kifwani ya dikabu ya mpeve santu yau mosi. Denali kele kima mosi ya balongoki fwete kusadila awa na zulu ya ntoto. Yau kele kima mosi ya bau tabakila luzingu, luzingu na bau ya mvula na mvula. Yau kele dibaku ya kuvanda bantu ya Izraele ya kimpeve, yina mepakulamaka sambu na kusamuna mambu yina metala Kimfumu ya Nzambi.

Na mbala mosi bayina kubakamaka ntete na kisalu memona nswalu nde balongoki ya Yezu mefutama, mpi bau kemona bau na kusadila denali ya kifwani. Kansi bau kezola kima ya kuluta mpeve santu ti mabaku na yau ya kimfumu. Mabokuta na bau ti kubuya kekuma mutindu ya kunyokula balongoki ya Kristu, bansadi “ya nsuka” na kilanga ya vinu.

Keti kingana ya Yezu kulunganaka kaka na mvunkama ya ntete? Ve, bamfumu ya Kikristu na mvunkama yai ya 20, sambu na bapozisio ti mikumba na bau, kuvandaka “bantu ya ntete” ya kubakamaka na kisalu na kilanga ya Nzambi ya kifwani. Bau vandaka kutadila bansamuni ya kudipesa ya kuvandaka kuvukana ti Watch Tower Bible and Tract Society bonso “bantu ya nsuka” na kubaka konso kisalu yina ya mfunu na kisalu ya Nzambi. Kansi, ya kyeleka, bantu yai, ya bamfumu ya mabundu vandaka kuvwenza, kubakaka denali​—⁠lukumu ya kusala bonso bantumwa ya kupakulama ya Kimfumu ya Nzambi ya zulu. Matayo 19:30–20:⁠16.

▪ Kilanga ya vinu kele kifwani ya inki? Nani kele kifwani ya munkwa-kilanga ya vinu, mpi bansadi ya bantangu 12 ti ya ntangu 1?

▪ Inki ntangu kilumbu ya kisalu ya kifwani kumanaka, mpi inki ntangu lufutu kupesamaka?

▪ Inki kele kifwani ya lufutu ya denali?