Kapu 106
Bau Metungululama na Bingana ya Kilanga ya Vinu
YEZU kele na tempelo. Yandi mekatuka kupesa nsoni na bamfumu ya dibundu yina kuyulaka sambu na kuzaba kana na kiyeka ya nani yandi vandaka kusala mambu. Na ntwala nsoni na bau kumana, Yezu meyufula bau nde: “Beno songa mono nki beno ke banza na mambu yai?” Mpi na nima, na nzila ya kingana, yandi memonisa bau bantu ya inki mutindu bau kele mpenza.
Yezu keta nde: “Kuvandaka na muntu mosi vandaka na bana zole. Yandi kwendaka kutubila mwana na yandi ya ntete nde: ‘Mwana na mono, kwenda kusala na bilanga ya vinu bubu yai.’ Mwana kuvutulaka nde: ‘E, Tata, mono ta kwenda,’ kansi yandi kwendaka ve. Na nima yandi kwendaka na mwana ya zole, yandi tubaka mutindu mosi. Mwana vutulaka nde: ‘Mono zola ve.’ Kansi na nima yandi balulaka mabanza na yandi, yandi kwendaka.” Yezu keyufula nde: “Nani na kati na bau zole salaka luzolo ya tata na yandi?” (NW)
Batelemini na yandi mevutula nde: “Yina ya zole.” (NW)
Ebuna Yezu metendula nde: “Ebuna mono ke tubila beno mambu ya kieleka: Bakalaki ya mpaku ti bankento yina ke salaka kindumba bo ta kota na Kimfumu ya Nzambi na ntwala na beno.” Ya kyeleka, bakalaki ya mpaku ti bandumba kubuyaka ntete na kusadila Nzambi. Kansi na nima, bonso mwana ya zole, bau kubalulaka ntima mpi bau kusadilaka yandi. Na ndambu ya nkaka, bamfumu ya dibundu, bonso mwana ya ntete, kutubaka nde bau tasadila Nzambi, kansi, bonso Yezu ketuba: “Yoane-Batiste kwisaka kusonga beno nzila ya kieleka ya beno fweti landa, ebuna beno zolaka ve kundima mambu yina ya yandi vandaka kutuba. Kansi bakalaki ya mpaku ti bankento yina ke salaka kindumba bo ndimaka mambu yina ya yandi vandaka kutuba. Ata ntangu beno monaka mambu yina, beno sobaka ve mabanza na beno sambu na kundima mambu yina ya yandi vandaka kutuba.”
Na nima, Yezu memonisa nde kubela ya bamfumu yina ya dibundu kele ve kaka na kubuya kusadila Nzambi. Ve, kansi bau kele kibeni nku, bantu ya mbi. Yezu keta nde: “Kuvandaka na muntu mosi, [mfumu ya nzo, NW] vandaka na ndambu ya ntoto na yandi. Yandi salaka bilanga ya vinu, yandi tulaka yo lupangu, yandi timunaka dibulu ya kukamunina vinu, ebuna yandi tungaka nzo ya nda na zulu sambu na kukengila bilanga. Yandi defisaka bilanga yina na bantu yina ke salaka bilanga ya vinu, ebuna yandi kwendaka kutambula na nsi ya nkaka. Ntangu ya kukatula bambuma ya vinu lungaka, ebuna yandi tindaka bampika na yandi na bantu yina vandaka kusala na bilanga na yandi sambu bo kupesa yandi ndambu ya bambuma yina ya yandi fweti baka. Bantu yango simbaka bampika yina; bo bulaka mpika mosi, bo fwaka yankaka, bo losaka mpika ya nkaka matadi. Mbala ya zole, munkwa-bilanga yina tindaka diaka bampika ya nkaka mingi kuluta mbala yina ya ntete. Ebuna bo salaka bo mutindu mosi.”
“Bampika” kele bambikudi ya “mfumu ya nzo,” Yehowa Nzambi, kutindaka na “bantu yina kesalaka bilanga ya vinu” na yandi. Bantu yai kesalaka bilanga kele bangenzi ya bamfumu ya dikanda ya Izraele, dikanda yina Biblia kebinga nde “kilanga ya vinu” ya Nzambi.
Sambu “bantu yina kesalaka bilanga” menyokula mpi mefwa “bampika,” Yezu ketendula nde: “Na mbala ya nsuka [munkwa-bilanga ya vinu] tindilaka bo mwana na yandi ya bakala. Yandi nde: ‘Bo ta zitisa mwana na mono.’ Kansi bantu yina vandaka kusala na bilanga ntangu bo monaka mwana yina, bo tubanaka bo na bo nde: ‘Yandi yai muntu ta bika kuyinga tata na yandi. Beto fwa yandi, ebuna bilanga ta kuma ya beto!’ Bo simbaka yandi, bo basisaka yandi na bilanga ya vinu, ebuna bo fwaka yandi.”
Ntangu yai, na kutubilaka bamfumu ya mabundu, Yezu keyufula nde: “Ebuna, ntangu munkwa-bilanga ta kwisa kuvutuka, nki yandi ta sala bantu yina?”
Bamfumu ya mabundu mevutula nde: “Yandi ta fwa kaka bantu yina ya mbi, ebuna yandi ta defisa bilanga ya vinu na bantu ya nkaka yina ta pesa yandi ndambu na yandi ya bambuma na ntangu ya mbote.”
Mpila yina, bau mekudizengila nkanu nkatu kuzaba, sambu bau kele na kati ya bantu ya Izraele, yina “kesalaka bilanga ya vinu” ya Yehowa yina kele insi ya Izraele. Bambuma ya Yehowa kesosaka na bansadi ya bilanga ya mutindu yina kele lukwikilu na mwana na yandi, Mesia ya kyeleka. Sambu bau mepesa ve bambuma ya mutindu yina, Yezu kekebisa nde: “Keti beno me tangaka ntete ve mambu yai na Mukanda ya Nzambi [na Nkunga 118:22, 23]? ‘Ditadi yai ya bamaso losaka yo me kumaka ditadi ya kuluta mfunu. Mfumu Nzambi muntu salaka mambu yina. Yo kele mambu ya kuyituka na meso na beto!’ . . . Yo yina, mono ke tubila beno nde Nzambi ta katula beno Kimfumu na yandi, ebuna yandi ta pesa yo na bantu yina ta [buta mbuma, NW]. Muntu yina ta bwa na zulu ya ditadi yina, yandi ta pasuka. Ebuna kana ditadi yina kubwila konso muntu [yina] yo ta tuta yandi, yandi kuma bonso pusiere.”
Ntangu yai, balongi ya Bansiku ti bambuta ya banganga-Nzambi mebakisa nde Yezu ketubila bau, mpi bau kezola kufwa yandi, “muntu tayinga” yina kele ti nswa. Ebuna bau tabotula bau dibaku ya kuvanda bamfumu bonso dikanda, mpi dikanda ya mpa ya ‘bantu ya ke salaka bilanga ya vinu’ tagangama, dikanda yina tabuta bambuma ya mbote.
Sambu bamfumu ya mabundu kewa boma ya bantu, yina ketadila Yezu bonso mbikudi, bau memeka ve na kufwa yandi na okazyo yai. Matayo 21:28-46; Marko 12:1-12; Luka 20:9-19; Yezaya 5:1-7.
▪ Bana yina zole ya kingana ya ntete ya Yezu kele kifwani ya banani?
▪ Na kingana ya zole, nani kele kifwani ya “mfumu ya nzo,” “kilanga ya vinu,” “bantu yina kesalaka bilanga ya vinu,” “bampika,” mpi “muntu tabika kuyinga”?
▪ ‘Bantu yina ke salaka bilanga ya vinu’ takuma inki, mpi banani tayinga bau?