Kapu 100

Kingana ya Bamine

MBALA ya nkaka Yezu kele kaka na nzo ya Zasheo, kisika yandi kutelamaka na kwenda na Yeruzalemi. Balongoki na yandi keyindula nde ntangu bau takota na Yeruzalemi, yandi tatuba nde yandi kele Mesia mpi yandi tatula Kimfumu na yandi. Sambu na kusongisa ngindu yina mpi na kumonisa nde Kimfumu kele ntete ntama, Yezu meta kingana.

Yandi keta nde: “Kuvandaka na mbuta-muntu mosi ya luzitu, yandi kwendaka na nsi mosi ya ntama sambu bo kwenda kupesa yandi kimfumu sambu na kwisa kuyala na nsi na yandi.” Yezu kele “mbuta-muntu ya luzitu,” mpi zulu kele “nsi ya ntama.” Ntangu Yezu takuma kuna, Tata na yandi tapesa yandi kiyeka ya kimfumu.

Kansi na ntwala ya kukwenda, mbuta-muntu ya luzitu mebinga bampika kumi mpi mepesa konso muntu mine mosi ya palata, na kutubaka nde: “Beno bika kusala kisalu ya komersa tii kuna ya mono ta kwisa kuvutuka.” Bampika kumi na ndungisa ya ntete kele balongoki ya ntete ya Yezu. Na nsadilu ya kuluta nene, bau kele kifwani ya bayina yonso kele bamvingidi-difwa ti yandi na Kimfumu ya zulu.

Bamine ya palata kele bibende ya mbongo ya mbalu, mosi kele lufutu ya bangonda tatu ya nsadi ya bilanga. Kansi bamine kele kifwani ya inki? Mpi inki kinkita melombama nde bampika kusala ti yau?

Bamine kele kifwani ya kimvwama ya balongoki ya kupakulama na mpeve lendaka kusadila sambu na kubuta bamvingidi-difwa ya kuluta mingi ya Kimfumu ya zulu tii kuna na kukwisa ya Yezu bonso Ntotila na Kimfumu ya kusilamaka. Na nima ya lufutumuku na yandi mpi ya kumonana na balongoki na yandi, yandi kupesaka bau bamine ya kifwani sambu na kukumisa bantu mingi balongoki mpi mpila yina, na kuyikaka kalasa ya Kimfumu ya zulu.

Yezu kelanda nde: “Kansi bantu ya nsi na yandi vandaka kuzola yandi [mbuta-muntu ya luzitu] ve. Yo yina bo bikaka kutinda bantumwa ya nkaka na kwenda kulanda yandi, sambu na kutuba nde: ‘Beto zola ve nde muntu yai kwisa kuyala beto.’ ” Bantu ya insi na yandi kele bantu ya Izraele, to Bayuda, katula balongoki na yandi. Na nima ya kukwenda ya Yezu na zulu, Bayuda yai na kunyokulaka balongoki na yandi, bau kumonisaka nde bau kuzolaka ve yandi kuvanda ntotila na bau. Na mutindu yai, bau vandaka kusala bonso bantu ya insi yina ya kutindaka bantumwa.

Inki mutindu bampika yina kumi kesadila bamine na bau? Yezu ketendula nde: “Kansi bo tulaka yandi ntotila, ebuna yandi kwisaka kuvutuka na nsi na yandi. Ntangu yai yandi bingaka bampika yina ya yandi pesaka mbongo sambu na kuzaba kana mbongo ntalu ikwa bo bikaka kubaka. Muntu ya ntete kwisaka kubasika nde: ‘Mfumu, na zulu ya [mine, NW] yina ya nge bikaka kupesa mono sambu na kusala kisalu ya komersa, mono bikaka kubaka [bamine, NW] kumi.’ Mfumu tubilaka yandi nde: ‘Nge salaka mbote, nge kele muntu ya mbote. Nge salaka mbote na mambu ya fioti, yo yina mono ke tula nge guvernere sambu na kuyala babwala kumi.’ Muntu ya zole kwisaka kubasika nde: ‘Mfumu, na zulu ya [mine, NW] yina ya nge bikaka kupesa mono sambu na kusala kisalu ya komersa, mono bikaka kubaka [bamine, NW] tanu.’ Mfumu nde: ‘Mono ke tula nge guvernere sambu na kuyala babwala tanu.’ ”

Mpika ya kele ti bamine kumi kele kifwani ya kalasa, to kimvuka ya balongoki ti bantumwa, mpi kubanda na Pantekoti ya mvu 33 T.B. tii ntangu yai. Mpika yina kuzwaka bamine tanu kele mpi kifwani ya kibuka mosi na nsungi kaka mosi yina, na kutadila mabaku na bau ti bingangu, bau keyedisa kimvwama ya ntotila na bau na zulu ya ntoto. Bimvuka yonso zole kusamunaka nsangu ya mbote na kikesa yonso, mpi na yau, bantu mingi ya ntima ya mbote kekuma Bakristu. Na kati ya bampika, nana kunungaka na kusala kinkita, mpi bau kukumisaka mingi yina ya kupesamaka na bau.

Yezu kelanda nde: “Muntu ya tatu kwisaka kubasika nde: ‘Mfumu, tala [mine, NW] na nge yo yai; mono bikaka kubumba yo na musware. Mono vandaka kutina nge boma, sambu nge kele muntu mosi ya mpasi; nge ke bakaka bima yina ya nge pesaka ve, nge ke katulaka bambuma yina ya nge kunaka ve.’ Mfumu tubilaka yandi nde: ‘Nge kele muntu mosi ya mbi! Mono ke pesa nge ndola sambu na mambu yina ya nge mosi me tuba. Nge zabaka nde mono kele muntu mosi ya mpasi; mono ke bakaka bima yina ya mono pesaka ve, mpi nde mono ke katulaka bambuma yina ya mono kunaka ve. Ebuna, sambu na nki nge kwendaka kutula mbongo na mono na banki ve? Bonso awa ya mono me kwisa kuvutuka, mono zolaka kwenda kubaka mbongo yina ti mbongo ya nkaka na zulu na yo.’ Ebuna yandi tubilaka bantu yina vandaka na kisika yina nde: ‘Beno botula yandi [mine, NW] yina, ebuna beno pesa yo na muntu yina ke na [bamine, NW] kumi.’ ”

Sambu na mpika ya mbi, mvidisa ya mine ya kifwani ketendula mvidisa ya kisika na Kimfumu ya zulu. Ee, yandi mevidisa dibaku ya kuyala, na mutindu ya kifwani, na zulu ya babwala kumi to tanu. Simba mpi nde, mpika mebingama ve muntu ya mbi sambu yandi mesala kima ya mbi, kansi, sambu yandi kusalaka ve kisalu sambu na kukumisa kimvwama ya kimfumu ya mfumu na yandi mingi.

Ntangu mine ya mpika ya mbi mepesama na mpika ya ntete, ntembe metulama nde: “Mfumu, yandi ke ntete na [bamine, NW] kumi!” Yezu mevutula nde: “Muntu yina ke na bima, Nzambi ta yika yandi bima ya nkaka; kansi muntu yina ke na bima ve, Nzambi ta katula yandi ata mwa-ndambu ya bima yina ya yandi ke na yo. . . . Bambeni na mono yina zolaka ve nde mono yala bo, beno kwisa kunata bo awa, ebuna beno fwa bo na meso na mono.” Luka 19:​11-27; Matayo 28:​19, 20.

▪ Inki mepusa Yezu na kuta kingana ya bamine?

▪ Nani kele mbuta-muntu ya luzitu, mpi na inki insi yandi kekwenda?

▪ Bampika kele banani, mpi bamine kele kifwani ya inki?

▪ Bantu ya insi na yandi kele banani, mpi inki mutindu bau memonisa kimpala na bau?

▪ Sambu na inki mpika mosi mebingama muntu ya mbi, mpi inki mvidisa ya mine na yandi ketendula?