Kapu 101

Na Betania, na Nzo ya Simoni

NTANGU Yezu mekatuka na Yeriko, yandi mekwenda na Betania. Nzyetolo kebakaka kilumbu ya mvimba sambu yau kele kumata nzila ya mbi ya bakilometere 19. Yeriko kele na kiteso ya bametere 250 na nsi ya nivo ya nzadi, mpi Betania kele na kiteso ya bametere 760 na zulu ya nivo ya nzadi. Nge lenda kuyibuka nde Betania, kele bwala ya Lazare ti bampangi na yandi ya bankento. Kamwa bwala yango kele na kiteso ya bakilometere 3 katuka na Yeruzalemi, yau kele na nkulumuka ya ndambu ya esti ya Ngumba ya Baolive.

Bamingi meyita kukuma na Yeruzalemi sambu na Paki. Bau mekwisa na ntwala sambu na kudigedisa na kutadila bansiku. Mbala ya nkaka bau kusimbaka mvumbi to bau kusalaka kima ya nkaka yina kukumisaka bau ya kukonda kugedila. Yau yina, bau kelanda bansadilu sambu na kudigedisa na kuta Paki na mutindu yina fwete kundimama. Ntangu bantu yai ya mekuma ntete mevukana na tempelo, bamingi kekudiyufula kana Yezu takwisa na Paki to ve.

Na Yeruzalemi, ntembe mebasika sambu na Yezu. Bantu yonso mezaba nde bamfumu ya mabundu kezola kukanga yandi sambu na kufwa yandi. Yau yina, bau mepesa ntuma nde konso muntu yina mezaba kisika ya Yezu kele, yandi kwisa kutubila bau. Mbala tatu na bangonda yai meluta​—⁠na Nkinsi ya Bisasa, na Nkinsi ya Kudipesa, ti na nima ya kufutumuna Lazare​—⁠bamfumu yai kusosaka na kufwa yandi. Yau yina, bantu kekudiyufula, kana na ntangu ya nkaka Yezu tamonana na meso ya bantu. Bau vandaka kuyulana bau na bau nde: “Beno ke banza nki?”

Na ntangu yina, Yezu mekuma na Betania bilumbu sambanu na ntwala ya Paki, yina kesalamaka na Nisani 14 na kutadila manaka ya Bayuda. Yezu mekuma na Betania na Kitanu na nkokila, yina kele luyantiku ya Nisani 8. Yandi lendaka ve kukwenda na Betania na Sabala sambu kusala nzyetolo na Kisabatu​—⁠kubanda na kudinda ya ntangu na Kitanu tii na kudinda ya ntangu na Sabala​—⁠kele nsiku na kutadila nsiku ya Bayuda. Mbala ya nkaka Yezu mekwenda na nzo ya Lazare, mutindu yandi salaka ntete, mpi yandi melala kuna na mpimpa ya Kitanu.

Kansi, muntu ya nkaka yina kezingaka na Betania mebingisa Yezu ti bankundi na yandi sambu na kudya na nkokila ya Sabala. Muntu yango kele Simoni, yina kuvandaka ntete muntu ya lepre, ya Yezu belulaka mbala ya nkaka na ntwala. Marta, ti kikalulu na yandi ya kusala, kepesa madya na banzenza. Kansi, mbala yai, na mutindu mosi ya mebasisa ntembe.

Maria mekangula mulangi ya fyoti, yina kekotaka kiteso ya 0,5 kg ya mafuta ya mananasi to “nardi ya kyeleka.” (NW) Yau kele mbalu mingi. Ya kyeleka, ntalu na yau kele kiteso ya lufutu ya mvula mosi! Ntangu Maria metyamuna mafuta yango na ntu ti na makulu ya Yezu mpi yandi medipa makulu na yandi ti nsuki na yandi, nsunga mefuluka na nzo yonso.

Balongoki mewa makasi mpi meyufula nde: “Nki mfunu ya kubebisa mananasi yai mpidina?” Na nima Yudasi Iskariote metuba nde: “Sambu na nki bo tekaka mananasi yai ve na [badenali, NW] nkama tatu sambu na kupesa mbongo yina na bansukami?” Kansi, Yudasi kekudibanza kibeni ve sambu na bansukami, sambu yandi keyibaka mbongo na sanduku ya balongoki vandaka kubumbila mbongo.

Yezu mekotila Maria. Yandi metuma nde: “Beno bikisa yandi. Sambu na inki beno ke yangisa yandi? Yandi me sala mono mambu ya mbote. Bansukami ta vandaka ti beno ntangu yonso, ebuna beno lenda sala bo mambu ya mbote konso ntangu ya beno zola. Kansi, mono ta vandaka ve ntangu yonso ti beno. Yandi me sala mambu yina ya yandi me mona mpila ya kusala. Yandi me tula mananasi na nitu na mono sambu na kuyidika yo na ntwala ya kuzika yo. Mono ke tubila beno mambu ya kieleka: Na konso kisika ya nsi-ntoto ya bo ta zabisaka Nsangu ya Mbote, bo ta tubaka mambu ya nkento yai me sala sambu na kuyindula yandi.”

Yezu mesala bantangu kuluta 24 na Betania, mpi nsangu ya kumonana na yandi meyalumuka. Yau yina, bantu mingi kekwisa na nzo ya Simoni sambu na kumona Yezu, kansi bau kekwisa kutala mpi Lazare, yina kele pana. Ebuna bambuta ya banganga-Nzambi mewakana sambu na kufwa Yezu mpamba ve kansi Lazare mpi. Yau kele mpila yina sambu bantu mingi kekwikila na Yezu sambu bau kemona muntu yina ya yandi kutedimisaka na lufwa kele na kuzinga! Nku ya inki mutindu yai kibeni bamfumu yai ya mabundu kele na yau! Yoane 11:55–12:11; Matayo 26:​6-13; Marko 14:​3-9; Bisalu 1:12.

▪ Inki ntembe kesalama na tempelo na Yeruzalemi, mpi sambu na inki?

▪ Sambu na inki yau fwete kuvanda nde Yezu kukumaka na Betania na Kitanu na kisika ya kukuma na Sabala?

▪ Ntangu Yezu mekuma na Betania, yau kemonana nde yandi melutisa Kisabatu na wapi?

▪ Inki kima Maria mesala yina menata ntembe, mpi inki mutindu Yezu mekotila Maria?

▪ Inki memonisa nku ya bambuta ya banganga-Nzambi?