Kapu 112

Paki ya Nsuka ya Yezu Mefinama

NA NTANGU Kizole, Nisani 11, mefinama na kumana, Yezu memanisa na kulonga bantumwa na zulu na Ngumba ya Baolive. Kilumbu ya kisalu, ya kulemba ya inki mutindu! Ntangu yai, mbala ya nkaka ntangu bau kevutuka na Betania sambu na kulala, yandi metubila bantumwa na yandi nde: “Beno zaba nde bilumbu zole me bika nkinsi ya Paki na kuyantika, ebuna bo ta pesa Mwana-muntu na maboko ya bambeni na yandi sambu bo kutula yandi na zulu ya [nti, NW].”

Yau kemonana nde Yezu melutisa kilumbu ya kulanda, Kitatu, Nisani 12, na kisika mosi ya pima ti bantumwa na yandi. Na kilumbu ya kuyitaka, yandi nganinaka bamfumu ya dibundu na meso ya bantu, mpi yandi mebakisa nde bau kesosa na kufwa yandi. Yau yina, na Kitatu yandi mekudimonisa ve pwelele, sambu yandi kezola ve nde ata kima mosi kukandikila yandi na kuta Paki ti bantumwa na yandi na nkokila yina kelanda.

Na ntangu yina, bambuta ya banganga-Nzambi ti bambuta-bantu ya nkaka mevukana na lupangu ya mfumu ya banganga-Nzambi, Kaifa. Ti mpasi na ntima sambu na mutindu Yezu kutubilaka bau na kilumbu yina kulutaka, bau kesala bapula sambu na kukanga yandi na mayele ya mbi sambu na kufwa yandi. Kansi bau ketuba nde: “Na bilumbu ya nkinsi ve, mbaimbai bantu ta tombuka-tombuka.” Bau kewa boma ya bantu yina kezola Yezu mingi.

Ntangu bamfumu ya mabundu kesala mfundu ya mbi sambu na kufwa Yezu, bau meyamba nzenza. Na ngituka na bau yonso, yandi kele mosi na kati ya bantumwa ya yandi mosi Yezu, Yudasi Iskariote, muntu yina Satana kutulaka ngindu ya kuteka Mfumu na yandi! Kyese ya inki mutindu bau mewa ntangu Yudasi meyula nde: “Nki beno ta pesa mono kana mono pesa Yezu na maboko na beno?” Bau mendima na kyese yonso na kupesa yandi bibende 30 ya palata, ntalu ya bau ketekilaka bampika na kutadila ngwakana ya Nsiku ya Moize. Kuyantika ntangu yai, Yudasi kesosa dibaku ya mbote ya kuteka Yezu na maboko na bau nkatu bantu kuvanda pana.

Nisani 13 keyantika na kudinda ya ntangu na Kitatu. Yezu kukatukaka na Yeriko na Kitanu, ebuna yai kele mpimpa ya sambanu mpi ya nsuka ya yandi kelala na Betania. Na kilumbu ya kulanda, Kiya, bangidika ya nsuka fwete kusalama sambu na Paki, yina tayantika na kudinda ya ntangu. Yina kele ntangu ya mwana ya dimeme ya Paki fwete kuzengama mungungu mpi na nima bau kuyoka yau yonso. Inki kisika bau tata nkinsi yango, mpi nani tasala bangidika?

Yezu mepesa ntete ve bantuma sambu na yau, mbala ya nkaka, sambu na kukandikila Yudasi na kutubila bambuta ya banganga-Nzambi na mpila nde bau kukanga Yezu na ntangu ya nkinsi ya Paki. Kansi ntangu yai, mbala ya nkaka na luyantiku ya nima ya midi ya Kiya, Yezu metinda Piere ti Yoane tuka na Betania, na kutubaka nde: “Beno kwenda kuyidikila beto madia ya Paki.”

Bau meyufula nde: “Nge zola nde beto kwenda kuyidika yo wapi?”

Yezu ketendula nde: “Kana beno kota na bwala Yeruzalemi, beno ta mona muntu mosi ke nata dibungu ya masa. Beno landa yandi, beno kwenda kukota na nzo yina ya yandi ta kota. Ebuna beno tubila munkwa-nzo yina nde: ‘Longi ke yula nge nde na nki kisika yandi ta kwisa kudia Paki ti balonguki na yandi?’ Yandi ta songa beno suku ya nene ya nzo yina kele na etaze, bima yonso kele ya kulunga na kati. Beno yidika madia muna.”

Na ntembe ve, munkwa-nzo yina kele longoki ya Yezu, yina vandaka kuvingila mbala ya nkaka nde Yezu kulomba nzo na yandi sambu na kusadila okazio yai ya sipesiali. Ata inki mutindu, ntangu Piere ti Yoane mekuma na Yeruzalemi, bau mekuta bima yonso kaka mutindu Yezu kutubilaka bau na ntwala. Ebuna bau mesala na mpila nde mwana ya dimeme kuvanda ya kuyidika mpi nde bangidika yonso kusalama sambu na kusadisa bantu 13 yina tata nkinsi ya Paki, Yezu ti bantumwa na yandi 12. Matayo 26:​1-5, 14-19; Marko 14:​1, 2, 10-16; Luka 22:​1-13; Kubasika 21:⁠32.

▪ Yau kemonana nde Yezu mesala inki na Kitatu, mpi sambu na inki?

▪ Inki lukutakanu mesalama na nzo ya mfumu ya banganga-Nzambi, mpi sambu na inki lukanu Yudasi mekwenda kutala bamfumu ya mabundu?

▪ Yezu metinda banani na Yeruzalemi na Kiya, mpi sambu na inki lukanu?

▪ Inki bantu yina kutindamaka mekuta yina mesonga dyaka ngolo ya bimangu ya Yezu?