Kapu 113

Dilongi ya Kudikulumusa na Paki ya Nsuka

PIERE ti Yoane, na kulandaka bantuma ya Yezu, meyita kukuma na Yeruzalemi sambu na kusala bangidika sambu na Paki. Yau kemonana nde Yezu kumosi ti bantumwa ya nkaka kumi, mekuma na nkokila na nima ya midi. Ntangu kele na kudinda ntangu Yezu ti bantu na yandi kekulumuka na Ngumba ya Baolive. Yai kele kilumbu ya nsuka ya Yezu ketadila mbanza kubanda na ngumba tii na nima ya lufutumuku na yandi.

Nswalu Yezu ti bantu na yandi mekota na mbanza mpi mekwenda na nzo yina ya bau tata Paki. Bau memata na suku ya etaze ya nzo, kisika bau mekuta bangidika yonso mesalama sambu na kuta Paki na bau na kingenga. Yezu vandaka kukinga okazio yai na mpusa yonso, mutindu yandi ketuba nde: “Mono vandaka kuzola mingi kudia Paki yai ti beno [na ntwala mono kumona mpasi, NW].”

Nsiku ya bambuta kelombaka nde bantu yina kevukana na Paki kunwa makopa iya ya vinu. Na nima ya kundima mosi na kati ya makopa yango, na ntembe ve ya tatu, Yezu mepesa matondo mpi metuba nde: “Beno baka dikopa yai, beno kabisa yo na kati na beno. Sambu mono ke tubila beno nde katuka ntangu yai mono ta nwa vinu diaka ve tii kuna Kimfumu ya Nzambi ta kwisa.”

Na ntangu ya bau kedya, Yezu metelama, mekatula lele na yandi ya zulu, mebaka kitembe ya lele, mpi mefulusa masa na dilonga. Kikalulu kevandaka nde muntu yina meyamba bantu fwete kutomatala na mpila nde makulu ya nzenza kuyobisama. Kansi na mbala yai, sambu muntu yina meyamba bau kele ve pana, Yezu mebaka mukumba ya kusala kisalu yango. Konso nani na kati ya bantumwa lendaka kusala yau, kansi, yau kemonana nde sambu na mwa kimpala yina kele dyaka na kati na bau, ata mosi ve mesala yau. Ntangu yai bau mewa nsoni ntangu Yezu meyantika na kuyobisa makulu na bau.

Ntangu Yezu mekwisa na Piere, yandi mebuya nde: “Nge ke yobisa mono makulu ata fioti ve!”

Yezu mevutula nde: “Kana mono yobisa nge makulu ve, nge ta vanda mulonguki na mono diaka ve.”

Piere mevutula nde: “Mfumu, kana mpidina, yobisa mono makulu kaka ve, kansi yobisa mono mpi maboko ti ntu.”

Yezu mevutula nde: “Muntu yina me yobila nitu yonso ke na mfunu ya kuyobila diaka ve kansi yandi fweti yobisa kaka makulu mpamba, sambu nitu na yandi yonso ke na mvindu ve. Beno yonso ke na mvindu ve, kaka muntu mosi mpamba ke na mvindu.” Yandi metuba mpila yina sambu yandi kezaba nde Yudasi Iskariote keyilama sambu na kuteka yandi.

Ntangu Yezu meyobisa makulu ya bantumwa yonso 12, ti makulu ya muyekudi, Yudasi, yandi melwata bilele na yandi ya zulu mpi mevanda dyaka na mesa. Na nima yandi meyufula nde: “Keti beno ke bakisa mambu yai ya mono me sala beno? Beno ke bingaka mono ‘Longi’ ti ‘Mfumu’; beno ke tubaka mbote, sambu ya kieleka mono kele Longi ti Mfumu. Kana mono muntu kele Mfumu ti Longi, mono me yobisa beno makulu, beno na kati na beno, beno mpi fweti yobisa makulu beno na beno. Mono me songa beno mbandu, sambu beno kusala mutindu mono me sala beno. Mono ke tubila beno mambu ya kieleka: Ata mpika mosi ve me luta mfumu na yandi na mfunu; diaka, muntu yina ya bo me tinda, yandi me luta ve muntu yina me tinda yandi. Ntangu yai beno me zaba mambu yina; kana beno sala mpidina, beno ta vanda na kiese.”

Dilongi ya kitoko ya inki mutindu na kisalu ya kudikulumusa! Bantumwa fwete kulanda ve na kusosa kisika ya ntete, na kuyindulaka nde bau kele ya kuluta mfunu na mpila nde bantu ya nkaka fwete kusadila bau ntangu yonso. Bau fwete kulanda mbandu ya Yezu mebikisa. Mbandu ya kikalulu ya kuyobisa makulu ve, kansi mpusa ya kusadila nkatu kuponapona, ata inki mutindu kisalu yango ya kusala kuvanda ya kudikulumusa to ya nzanzi. Matayo 26:​20, 21; Marko 14:​17, 18; Luka 22:​14-18; 7:44; Yoane 13:​1-17.

▪ Inki mboninu ya kuswaswana Yezu kele na yau sambu na Yeruzalemi ntangu yandi kekota na mbanza sambu na kuta nkinsi ya Paki?

▪ Na ntangu ya Paki, yau kemonana nde inki dikopa Yezu mepesa bantumwa 12 na nima ya kupesa matondo?

▪ Na ntangu ya Yezu vandaka na zulu ya ntoto, inki kisalu bau vandaka kusadila banzenza, mpi sambu na inki yau mesalama ve na ntangu ya Yezu ti bantumwa na yandi keta nkinsi ya Paki?

▪ Inki kele lukanu ya Yezu na ntangu yandi kesala kisalu ya kudikulumusa ya kuyobisa bantumwa na yandi makulu?