Kapu 108

Bau Mekuka Ve na Kukanga Yezu na Mutambu

SAMBU Yezu vandaka kulonga na tempelo mpi mekatuka kutela bambeni na yandi ya lusambu bingana tatu yina ketungulula mambi na bau, Bafarize mewa makasi mpi mesala mfundu sambu na kunata yandi na kutuba kima yina ya bau lenda kukangila yandi na mutambu. Bau mesala pula, mpi metinda balongoki na bau, kumosi ti bantu ya nkaka ya Erode, sambu na kumeka kukanga yandi na mutambu.

Bantu yai metuba nde: “Longi, beto zaba nde nge ke tubaka mambu ya kieleka. Nge ke longaka nzila ya Nzambi na kieleka yonso. Nge ke waka boma ve na mambu yina ya bantu ya nkaka ke banzaka, sambu nge [ketadilaka ve bantu na nganda, NW]. Songa beto mabanza na nge: Keti bansiku na beto ke pesaka beto nzila na kufuta mpaku na [Kaisali, NW] to ve?”

Yezu mekusama ve na kuleba na bau. Yandi mebakisa nde kana yandi kutuba nde: ‘Ve, yau mepesamaka ve nzila to yau kele mbote ve na kufuta mpaku,’ yandi tavanda na nto ya mbendumuka sambu na Roma. Kansi, kana yandi kutuba nde: ‘Ee, beno fwete kufuta mpaku yai,’ Bayuda, yina kevwenzaka kulemfukila Roma, tayina yandi. Ebuna yandi mevutula nde: “Beno bantu ya luvunu, sambu na nki beno ke meka mono? Beno songa mono [kibende, NW] ya bo ke futilaka mpaku!”

Ntangu bau menatila yandi kibende mosi, yandi meyufula nde: “Ilungi yai ti zina yai na zulu ya mbongo yai, yo kele ya nani?”

Bau mevutula nde: “Ya Kaisali.”

“[Ya Kaisali beno pesa na Kaisali, NW]; ya Nzambi, beno pesa na Nzambi.” Ee, ntangu bantu yai mewa mvutu ya Yezu ya kuluta mayele, bau meyituka. Mpi bau mekwenda mpi mebikisa yandi yandi mosi.

Ntangu bau memona nde bau mekuka ve na kumona kikuma ya kukangila Yezu, Basaduse, yina ketubaka nde lufutumuku kele ve, mepusana na yandi mpi meyufula nde: “Longi, Moize tubaka nde: ‘Kana muntu kufwa kansi yandi kubikisa ata mwana mosi ve, leki na yandi fweti kwela nkento yina me bika sambu na kubuta bana na zina ya mbuta na yandi yina me fwa.’ Ebuna, awa na kati na beto kuvandaka na babakala nsambwadi, bo vandaka bana ya tata mosi ti mama mosi. Mbuta na bo kwelaka nkento, ebuna yandi fwa kansi yandi bikisaka ata mwana mosi ve. Yo yina, yandi bikisaka nkento na leki yina landaka yandi. Yo vandaka mpi kiteso mosi na leki yina ti na leki na yandi ya nkaka. Yo vandaka kaka kiteso mosi na bo yonso nsambwadi. Na nima, nkento yina mpi kwisaka kufwa. Ebuna na kilumbu yina ya bantu me fwaka ta telama na lufwa, nkento yina ta vanda nkento ya nani na kati na bo nsambwadi? Sambu bo yonso kwelaka nkento yina!”

Sambu na kupesa mvutu Yezu ketuba nde: “Beno me vila si! Mpamba ve, sambu beno ke bakisaka ata Mukanda ya Nzambi ve, ata ngolo ya Nzambi mpi ve. Sambu, ntangu bantu yina me fwaka ta telama na lufwa, babakala ti bankento bo ta kwelanaka diaka ve, kansi bo ta zingaka kaka bonso bawanzio na zulu. Sambu na bantu yina me fwaka, ti ta telama na lufwa, keti beno me tangaka ve na mukanda ya Moize nsangu ya mwa-nti yina vandaka kupela tiya? Na nsangu yina Nzambi ke tubila Moize nde: ‘Mono kele Nzambi ya Abrahami, Nzambi ya Izaki ti Nzambi ya Yakobi.’ Mambu yina ke songa nde Nzambi kele Nzambi ya bantu ya moyo, kansi yandi kele ve Nzambi ya bantu me fwaka. Beno me vila mpenza.”

Bantu keyituka dyaka sambu na mvutu ya Yezu. Ata nkutu balongi ya nkaka ya bansiku kendima nde: “Longi, nge me tuba mbote.”

Ntangu Bafarize memona nde Yezu mekangisa Basaduse munoko, bau mekwisa na yandi na kimvuka. Sambu na kumeka yandi dyaka, longi mosi ya Bansiku meyufula nde: “Longi, na kati ya Bansiku yonso, nki nsiku me luta mfunu?”

Yezu mevutula nde: “Nsiku ya ntete ya kuluta mfunu, yo yai: ‘Beno bantu ya Israele, beno wa! [Yehowa, Nzambi na beto kele yandi mosi Yehowa, NW]. Nge fweti zola Mfumu Nzambi na nge, na ntima na nge yonso, na luzolo na nge yonso, na mabanza na nge yonso ti na ngolo na nge yonso.’ Ya zole yo yai: ‘Nge fweti zola mpangi na nge bonso nge mosi.’ Nsiku ya nkaka kele ve yina me luta bansiku yai zole na mfunu.” Ebuna Yezu keyika nde: “Bansiku yonso ya Moize ti malongi yonso ya Baprofete yo ke katukaka na bansiku yina zole.”

Longi ya Bansiku mendima nde: “Longi, yo kele kaka mpidina; nge me tuba mambu ya kieleka nde: Mfumu Nzambi kele kaka Nzambi mosi mpamba, Nzambi ya nkaka kele ve. Muntu fweti zola Nzambi na ntima na yandi yonso, na mabanza na yandi yonso ti na ngolo na yandi yonso; yandi fweti zola mpi mpangi na yandi bonso yandi mosi. Mambu yina kele mfunu kuluta makabu ya bambisi ya bo ke yokaka na mesa-kimenga ti makabu ya nkaka ya mutindu na mutindu.”

Na ntangu yandi mebakisa nde longi ya Bansiku mevutula na ngangu yonso, Yezu metubila yandi nde: “Nge kele penepene na kukota na Kimfumu ya Nzambi.”

Bilumbu tatu melunga sesepi​—⁠Lumingu, Kintete, ti Kizole​—⁠Yezu vandaka kulonga na tempelo. Bantu vandaka kuwidikila yandi ti kyese, yau yina bamfumu ya dibundu kezola kufwa yandi, kansi tii ntangu yai bikesa na bau kenunga ve. Matayo 22:​15-40; Marko 12:​13-34; Luka 20:​20-40.

▪ Inki mfundu Bafarize mesala sambu na kukanga Yezu na mutambu, mpi inki zolaka kusalama kana yandi pesaka mvutu nde ee, to ve?

▪ Inki mutindu Yezu meguluka na mutambu ya Basaduse kesosa na kukanga yandi?

▪ Inki mayele ya nkaka Bafarize mesala sambu na kumeka Yezu, mpi inki mutindu yau mesuka?

▪ Na ntangu ya kisalu na yandi ya nsuka na Yeruzalemi, Yezu melonga bilumbu ikwa na tempelo, mpi inki malanda yau mebasisa?