Kapu 114

Madya ya Lusungiminu

NA NIMA ya Yezu meyobisa makulu ya bantumwa na yandi, yandi metubila mukapu ya Nkunga 41:​9, na kutubaka nde: “Muntu yina ke diaka madia na mono, yandi me balukila mono na nima.” Na nima, ya kutungisama na mpeve, yandi ketendula nde: “Muntu mosi na kati na beno ta teka mono.”

Bantumwa meyantika na kuwa mawa mpi mosi na mosi ketubila Yezu nde: “Mfumu, keti mono?” Ata Yudasi Iskariote mevukana ti bau na kuyufula. Yoane, yina kele na lweka ya Yezu na mesa, menyeka na nsi ya ntulu ya Yezu mpi meyufula nde: “Mfumu, muntu yango yina nani?”

Yezu kevutula nde: “Muntu mosi na kati na beno kumi na zole, yina ke tula mampa dilonga mosi ti mono, yandi yina. Mwana-muntu ta fwa mutindu bo sonikaka sambu na yandi na Mukanda ya Nzambi, kansi mawa na muntu yina ke teka yandi! Kuluta mbote kana muntu yina butukaka ve!” Na nima na yau, Satana mekotila dyaka Yudasi, na kusadilaka ntima na yandi ya kukangula, yina meyita kukuma ya mbi. Na nima na mpimpa yina, Yezu mebinga Yudasi “Mwana ya mbungulu.” (NW)

Ntangu yai, Yezu metubila Yudasi nde: “Mambu yina ya nge fweti sala, sala yo nswalu!” Ata longoki mosi ve kebakisa mambu ya Yezu kezola kutuba. Bamosi keyindula nde sambu Yudasi kebumbaka mbongo ya kesi, Yezu ketubila yandi nde: “Kwenda kusumba bima ya [beto] kele na yo mfunu sambu na nkinsi,” to nde yandi fwete kwenda kupesa bima na bansukami.

Na nima ya kukatuka ya Yudasi, Yezu mebasisa nkinsi mosi ya mpa kibeni, to lusungiminu, ti bantumwa na yandi ya kwikama. Yandi mebaka dimpa, mesala kisambu ya kupesa matondo, mezenga yau mpi mepesa bau yau, na kutubaka nde: “Beno baka, . . . beno dia yo.” Yandi ketendula nde: “Yai kele nitu na mono ya mono ke pesa sambu na beno. Beno sala mpidiyai sambu na kuyindula mono.”

Ntangu konso muntu medya dimpa, Yezu mebaka dikopa ya vinu, na ntembe ve ya iya ya kesadilamaka sambu na Paki. Yandi mesala mpi kisambu ya kupesa matondo, mepesa bau yau, yandi melomba bau na kunwa yau, mpi metuba nde: “Dikopa yai ke songa [ngwa]kana ya mpa ya Nzambi me wakana ti beno na menga na mono yai ke losana sambu na beno.”

Yau yina, yai kele mpenza lusungiminu ya lufwa ya Yezu. Konso mvula na Nisani 14 yau fwete kusalama dyaka, mutindu Yezu ketuba nde, sambu na kuyibuka yandi. Yau tayibusaka bantu yina tataka yau mambu ya Yezu ti Tata na yandi ya zulu mesalaka sambu na kugulusa bantu na lubedisu ya lufwa. Sambu na Bayuda yina kukumaka balandi ya ntete ya Kristu, nkinsi yango tayinga Paki.

Ngwakana ya mpa yina mesalama na menga ya Yezu ya kutyamukaka, keyinga ngwakana ya ntama ya Nsiku. Muntu kewakanisa yau kele Yezu Kristu na kati ya bandambu zole​—⁠na ndambu mosi, Yehowa Nzambi, mpi na ndambu ya nkaka Bakristu 144000 ya kupakulamaka na mpeve santu. Na zulu ya ndolula ya masumu, ngwakana kepesa nzila na lutungu ya dikanda ya zulu ya bantotila mpi ya banganga-Nzambi. Matayo 26:​21-29; Marko 14:​18-25; Luka 22:​19-23; Yoane 13:​18-30; 17:12; 1 Korinto 5:⁠7.

▪ Inki mbikudulu ya Biblia Yezu ketubila na yina metala nkundi mosi, mpi inki nsadilu yandi mesadila yau?

▪ Sambu na inki bantumwa mewa mawa mingi kibeni, mpi inki konso muntu keyufula?

▪ Inki Yezu metubila Yudasi na kusala, kansi inki mutindu bantumwa ya nkaka mebakisa bantuma yai?

▪ Inki nkinsi Yezu metula na nima ya kukatuka ya Yudasi, mpi yau kele ti inki kikuma?

▪ Banani kele bamambere ya ngwakana ya mpa, mpi inki ngwakana yango kelungisa?