Kitini 1
Keti Nzambi Ke Kudibanzaka Mpenza Sambu na Beto?
1, 2. Inki ngyufula bantu kekudiyufulaka sambu na yina ketadila Nzambi, mpi sambu na inki?
NA LUZINGU na nge, ziku nge me kudiyulaka nde: “Kana Nzambi kele, mpi kana yandi ke kudibanzaka mpenza sambu na beto, inki mutindu yandi me pesaka nzila na bampasi mingi mutindu yai?” Beto yonso ke kutanaka ti bampasi, to beto me zaba muntu mosi yina ya me kutanaka ti yo.
2 Na disolo ya luzingu ya bantu awa na ntoto, bantu me kutanaka ti bampasi mingi ya me katuka na bitumba, bisalu ya nku, kufwa bantu, kukonda lunungu, kinsukami mpi lufwa ya bantu yina beto ke zolaka. Kaka na mvu-nkama yai ya 20, bitumba me fwaka bantu kuluta bamilio 100. Mpi bankama ya bamilio ya nkaka me lwalaka bamputa, me vidisaka banzo na bo to bima na bo. Mambu mingi ya mbi mpi ya mpasi me salamaka na nsungi na beto. Yo me natilaka bantu mingi basusi, lufwa, bampasi, mpi kukonda ya kivuvu.
3, 4. Inki mabanza kemonanaka na bantu mingi mutindu Nzambi mepesa nzila na mambi?
3 Bantu ya nkaka me kuma ti makasi ya ngolo mpi ke tuba nde kana Nzambi kele, yandi ke kudibanzaka mpenza ve ata fyoti sambu na beto. Mu mbandu, bakala mosi kutanaka ti bangika ya me tala kumenga bantu ya dikanda ya nkaka mpi monaka mutindu bo fwaka banduku mpi bampangi na yandi ya dibuta na Mvita ya Ntete ya Ntoto ya Mvimba. Yandi yulaka nde: “Nzambi vandaka wapi ntangu beto vandaka na mfunu na yandi?” Bakala ya nkaka yina gulukaka na lufwa na mabaku mingi yina salamaka na bantu ya nazi na nsungi ya Mvita ya Zole ya Ntoto ya Mvimba, kudiyangisaka mingi sambu na bampasi yina yandi monaka, mpi tubaka nde: “Kana beno lekita ntima na mono, beno ta baka ndikila.”
4 Yo yina, bantu mingi lenda bakisa ve nki mutindu Nzambi ya zola lenda pesa nzila nde mambu ya mbi kusalama. Bo ke kudiyula nde kana yandi ke kudibanzaka mpenza sambu na beto to yandi kele kibeni. Bantu mingi ke yindulaka nde bampasi ta vandaka kaka ntangu yonso yina bantu ta zingaka.
[Kifwanisu ya kele na lutiti 2, 3]
Nsi-ntoto ya mpa ya kukonda bampasi keti yo me finama?