Kitini 7
Inki Mambu Basikaka na Nima ya Kukolama?
1-3. Inki mutindu ntangu ya meluta monisaka nde Jéhovah menunga?
NA KUTADILA ntembe ya me tala nswa ya Nzambi ya kuyala, inki mambu basikaka na bamvu-nkama mingi na nima, ya yina me tala luyalu kukonda lutwadisu ya Nzambi? Keti bantu mekudimonisa nde bau melunga kibeni na kutambwisa nsi kuluta Nzambi? Ata fyoti ve, kana beto fwete tadila bamambu ya imbi yai muntu mesala na nkweno nandi na bamvunkama yai yonso meluta.
2 Mutindu bibuti na beto ya ntete losaka luyalu ya Nzambi bendaka mavwanga. Yau natilaka bau bampasi mpi dibuta ya bantu yina zolaka basika na nzila na bau. Bau fwanaka kudibedisa kaka bau mosi. Beto ketanga na Ndinga ya Nzambi nde: “Bau salaka yandi imbi; bau ke dyaka bana na yandi ve, bantu ya masumu.”—Deteronome 32:5.
3 Nzambi yitaka zabisa Adam mpi Eva nde kana bau kukatuka na bangidika yina Nzambi tulaka, bau tabeba mpi nsuka na bau tavanda lufwa. Nkenda kemonisa bukyeleka ya dikebisu yai. (Genese 2:17; 3:19) Bau kudikatulaka nansi ya luyalu ya Nzambi mpi; na nima, nitu na bau yantikaka na kulemba mpi na nima bau sukaka na kufwa kibeni.
4. Sambu na inki beto yonso mebutuka bantu ya kukonda kulunga, bantu ya maladi mpi ya lufwa?
4 Roma 5:12 ketendula yina kumilaka bana na bau na nima: “Masumu kotaka na nsi na nzila ya muntu mosi [Adam, tata ya dibuta ya bantu] mpi lufwa sambu na masumu buna lufwa kotaka na bantu yonso, sambu bau yonso salaka masumu.” Ebuna, na kubendumukaka na luyalu ya Nzambi, bibuti na beto ya ntete kumaka bansumuki. Na kutadila bansiku ya kulandana ya kubutuka, bau lendaka pesa na bana na bau kima yankaka ve kaka kikalulu ya kukonda kulunga. Yau yina beto yonso kebutukaka na masumu, beto kebeleka mpi kefwããka.
5, 6. Inki Nkenda ya bantu memonisa sambu na yina ketadila bikesa ya bantu ke na yau ya kutula ngemba mpi kyese ya kyeleka?
5 Bamvunkama mingi meluta tuka ntama. Bimfumu mingi basikaka mpi kufwããka. Bantu yunsaka na kusala mitindu yonso ya baluyalu. Kansi, dibuta ya bantu mbala na mbala kutanaka na bamambu ya kyadi. Na nsuka ya bamvula mafunda sambanu, beto lendaka tula vuvu nde bantu zolaka yela na mpila nde bau tula ngemba, lunungu mpi kyese na nza ya mvimba mpi nde bau tula bikalulu ya mbote sambu na yina ketadila bumbote, kuwa mawa mpi kudisadisana.
6 Kansi yau ke mutindu yina ve. Ata luyalu mosi ya bantu menata ata fyoti ve ngemba ya kyeleka mpi kyese na bantu yonso. Kaka na mvunkama na beto yai ya makumi zole, beto memona mutindu bau mefwa ba millions ya bantu na Kugondama mpi ya kuluta ba millions 100 na bitumba. Na nsungi na beto, bantu mingi nyokwamaka, kufwããka mpi kotisamaka na baboloko sambu na kikalulu ya kukonda kuwila mawa to mpi sambu na luswaswanu na mambu ya politike.
Mutindu mambu kele bubu yai
7. Tendula mutindu mambu ke bubu yai na kati ya dibuta ya bantu?
7 Beto tal’eti mutindu dibuta ya bantu yonso kele bubu yai na bilumbu na beto. Kufwa bantu mpi mubulu kemonana bisika yonso. Kunwa makaya ya ngolongolo to ba drogue mpi mebendila bantu bamaladi mingi. Nsi bubu yai ke na kukutana na bamaladi ya bizumba. Ba millions ya bantu mebakama na maladi ya ntitisa SIDA. Makumi ya ba millions ya bantu kefwa na nzala to na maladi konso mvula, kansi kaka kamwa kibuka mosi fyoti ya bantu ke bamvwama. Bantu ke na kubebisa mupepe mpi ke na kubebisa ntoto. Na bisika yonso, luzingu ya dibuta mpi bikalulu ya mbote ya mabanza ya bantu mebeba. Kyeleka, luzingu ya bubu yai kemonisa pwelele imbi ya luyalu ya ‘nzambi ya nsi yai,’ Satana. Nsi yai ya yandi ketwadisa ke madidi, kukonda mawa mpi mebeba ngolo kibeni.—2 Korinte 4:4.
8. Sambu na inki beto lenda ve kukumisa kuyela yai ya mambu ya science ya bantu bonso ya kyeleka?
8 Nzambi bikisilaka bantu ntangu ya kukuma na nsuka ya kuyela ya mayele na bau na mambu ya science mpi ya kinsuni. Kansi, keti beto lenda tuba nde ya kyeleka science meyela mutindu buta mpi batolotolo meyingama na minduki ya makasi bonso mitrailleuse, char de combat, avion ya bitumba mpi missile nucléaire? Keti beto lenda tuba nde bantu meyela na mutindu bau ke na kumata tii na zulu, kansi bau kezaba ve na kuzinga na ngemba awa na ntoto? Kuyela yango ya mambu ya science ke wapi na kutadila mutindu bantu ke na boma na kutambula na mpimpa na babalabala mpi, na bisika yankaka, ata na mwini?
Yina ntangu memonisa
9, 10. (a) Inki bantu monisaka pwelele na bamvunkama mingi yai ya meluta? (b) Sambu na inki Nzambi takatula ve kimpwanza ya kupona?
9 Bamvunkama ya meluta memonisa nde bantu lenda kuditambwisa bau mosi ve na mutindu ya lunungu kukonda kutadila luyalu ya Nzambi. Bau lenda nunga ata fyoti ve, mutindu bau lenda zinga ve kukonda kudya madya, kukonda kunwa masa mpi kukonda kufulumuna. Banzikisa ke mpenza pwelele: beto salamaka sambu na kutadila lutwadisu ya Ngangi na beto, mutindu beto gangamaka na nsatu ya kudya madya, ya kunwa masa, mpi ya kufulumuna mupepe.
10 Na kupesaka nzila na mambi, Nzambi monisaka na mbala mosi malanda ya mpasi ya nsadilu ya imbi ya kimpwanza ya kupona. Kansi kimpwanza ya kupona ke dikabu mosi ya kuluta nene yina, na sika ya kupimina bantu, Nzambi pesilaka bau nzila na kumona mambi ya nsadilu na yau ya imbi. Ndinga ya Nzambi ketuba kyeleka nde: “Ke na muntu ve lenda songa nzila na makulu na yandi ntangu yandi ketambula.” Yau ke kyeleka na kutubaka nde: “Muntu keyalaka muntu sambu na kunyokula yandi.”—Yelemia 10:23; Mpovi 8:9.
11. Keti ata mwa mutindu ya luyalu ya bantu, yau fwanaka na kumanisa bampasi?
11 Mutindu Nzambi pesaka nzila na luyalu ya muntu na bamvula mafunda sambanu monisaka kibeni nde muntu melunga ve na kumanisa bampasi. Ata mbala mosi yandi lungaka na kusala yau ve. Sambu na kubaka mbandu mosi, ataku yandi vandaka na mayele mingi, kimvwama nandi mpi ngolo nandi, Salomon, ntotila ya Israele, lungaka ata fyoti ve na kumanisa bunsukami na nsungi nandi sambu yau vandaka luyalu ya muntu. (Mpovi 4:1-3) Kiteso mosi mpi bubu yai, ataku science meyela ngolo bilumbu yai, bantwadisi ya nsi melunga ata fyoti ve na kumanisa bampasi. Kuluta dyaka imbi, Nkenda ya bantu kemonisa nde mutindu bantu ke na dipanda na luyalu ya Nzambi kuyikaka mpasi mingi na sika ya kusukisa yau.
Nzambi ke na kutala ntama
12-14. Mutindu Nzambi mepesa nzila na bampasi yau kebasisa inki mambote?
12 Mutindu Nzambi mepesa nzila na bampasi, yau kotisaka beto na kyadi. Kansi Nzambi bakaka nkadilu nandi, sambu yandi zabaka mambote yina zolaka basika na nima. Nkadilu yina Nzambi bakaka tapesa kyese na bigangwa nandi, sambu na tumwa bamvula ve to sambu na tumwa mafunda ya bamvula fyoti ve, kansi sambu na ba millions ya bamvula, ee, mvula na mvula.
13 Kana bonso nde kilumbu kukuma nde muntu kusadila imbi kimpwanza nandi ya kupona sambu na kutula dyaka ntembe na mitindu ya kuyala ya Nzambi, yau tavanda mfunu ve na kupesa yandi ntangu sambu na kuyunsa na kutendula dibanza nandi yina. Na kulolulaka bambendumuni na mafunda mingi ya bamvula, Nzambi monisaka mbandu ya kulunga ya luyalu yina tabikala mvula na mvula ya tasadilama, ata yau vanda inki sika na nza ya mvimba.
14 Sambu Jéhovah pesaka nzila na mambi mpi na bampasi tii bubu yai, yau tamonisama pwelele nde ata kima mosi ya kimbeni ti yandi tanunga ve. Yau tamonisama mpi na pwelele yonso kukonda ntembe nde ata lukanu mosi ya dipanda yina ya takatuka na bantu to na bigangwa ya kimpeve lenda pesa mambote ya kimããkulu ve. Buna, yau tamonana mpenza nde Nzambi fwete baka lukanu ya kufwa kukonda kulutisa ntangu mingi mbendumuni yonso. “Yandi tafwa bantu yonso ya imbi.”—Nkunga 145:20; Roma 3:4.
[Kifwanisu ya kele na lutiti 15]
Ntangu bibuti na beto ya ntete ponaka na kuvanda na dipanda na Nzambi, bau yantikaka na kununa mpi na nima bau fwããka
[Bifwanisu ya kele na lutiti 16]
Luyalu ya bantu yina ketadila Nzambi ata fyoti ve memonana nde yau ke ya imbi
[Bangogo ya ke monisa kisina ya foto]
U.S. Coast Guard photo