Kitini 6
Sambu na Nki Nzambi Pesaka Nzila na Bampasi?
1, 2. Inki mutindu bibuti na beto ya ntete bebisaka luyantiku ya kitoko yina Nzambi pesaka bau?
SAMBU na nki mambu sobaka mpi kumaka mbi? Inki kwisaka kubebisa luyantiku ya kitoko yina Nzambi pesaka na bibuti na beto ya ntete na kati ya Paladisu ya Edeni? Sambu na nki, na kisika nde ngemba mpi kyese ya Paladisu kuvanda, kansi mambu ya mbi mpi bampasi ke salama tuka mafunda ya bamvula?
2 Kikuma kele nde Adam mpi Eva sadilaka mbi kimpwanza na bo ya kupona. Bo vilaka nde bo gangamaka ve sambu na kuditwadisa bo mosi kukonda Nzambi mpi bansiku na yandi. Bo bakaka lukanu ya kubaka dipanda na Nzambi, kuyindulaka nde luzingu na bo ta bonga. Bo lutaka bandilu yina Nzambi tudilaka bo sambu na yina ke tadila kimpwanza ya kupona.—Kuyantika, mukapu 3.
Ntembe ya Me Tala Nswa ya Kuyala Ntoto ya Mvimba
3-5. Sambu na inki Nzambi fwããka Adam mpi Eva mbala mosi kaka ve mpi kuvutukila, banda luyantiku?
3 Sambu na nki Nzambi fwaka ve Adam na Eva mpi vutukilaka kusala to kuganga bankwelani ya nkaka zole? Sambu na nswa na yandi ya kuyala ntoto ya mvimba, disongila bo tulaka ntembe na kiyeka na yandi ya kuyala bo.
4 Ngyufula yango vandaka yai: Nani ke na nswa ya kuyala, mpi luyalu ya nani kele ya kulunga? Mutindu yandi ke nkwa-ngolo yonso mpi Ngangi ya bingangwa yonso, Nzambi ke na kiyeka ya kuyala na zulu na yo. Mutindu yandi ke ngangu mingi ya kukonda nsuka, luyalu na yndi ke ya kuluta mbote sambu na bigangwa na yandi. Kansi yo monanaka nde, bankwelani yina buyaka luyalu ya Nzambi. Dyaka, keti kifu vandaka ve na muntu, kigangwa na yandi? Beto ta zikisa mbote-mbote na ntwala ntembe yina basikaka sambu na kwikama ya bantu yonso.
5 Muntu kumaka na dipanda na Nzambi, yo ke tendula nde dyambu ya nkaka kotaka: keti bantu lenda nunga mbote kibeni kukonda luyalu ya Nzambi? Ngangi zabaka mbote-mbote kukonda ntembe mvutu, kansi nzila ya mbote vandaka ya kupesa bo kimpwanza ya mvimba yina bo vandaka kusosa. Sambu bo ponaka nzila yai na kimpwanza na bo mosi, Nzambi yambulaka bo na kusala yo.
6, 7. Sambu na inki Nzambi pesaka kimpwanza ya nene mpidyai ya ntangu mingi na bantu?
6 Mutindu yandi bikilaka bantu ntangu mingi kibeni sambu na kusadila kimpwanza na bo, Nzambi zolaka kumonisa kana bantu me lunga na kuvanda na nsi ya luyalu ya Nzambi to na kudiyala bo mosi. Yo lombaka mpi nde ntangu yina bo pesaka bo kuvanda ya nda sambu na kupesa bo nzila ya kulungisa mambu yina bo yindulaka na yina me tala politiki, mayele ya kusala bamasini ti bima ya mutindu na mutindu, science mpi kimunganga.
7 Yo yina, Nzambi bikilaka bantu kimpwanza ya kuluta nene tii bubu yai na bilumbu na beto sambu na kumonisa kana bo lenda kuditambwisa mpi kununga to ve na dipanda yonso, kukonda yandi. Mpidina, muntu lenda pona bumbote to nku, zola to kimbeni, lunungu to kukonda lunungu. Kansi bantu me kutanaka na malanda ya nsola na bo: na kisika ya ngemba mpi bumbote, yo me nataka bampasi mpi mambi.
Bigangwa ya Kimpeve Me Kolama
8, 9. (a) Inki mutindu mbendumuka basikaka na kati ya bigangwa ya kimpeve? (b) Katula Adam mpi Eva, nani yankaka Satana bendaka na mbendumuka?
8 Kele ti dyambu ya nkaka ya beto fwete tadila. Bibuti na beto ya ntete vandaka kaka ve bo mosi na kukolama na luyalu ya Nzambi. Kansi banani ya nkaka vandaka na luzingu tuka ntama? Bigangwa ya kimpeve. Na ntwala ya kuganga bantu, Nzambi gangaka bigangwa ya nkaka ya vandaka na luzingu ya mutindu ya nkaka: bawanzyo mingi, yina salamaka sambu na kuzinga kaka na zulu. Bawanzyo yina gangamaka mpi ti kimpwanza ya kupona mpi na luzolo ya kuditula na nsi ya luyalu ya Nzambi.—Yobi 38:7; Nkunga 104:4; Kusonga 5:11.
9 Biblia ke monisa nde kukolama yantikaka na bigangwa ya kimpeve. Kigangwa mosi ya kimpeve sosaka kuvanda na kimpwanza ya nene. Yandi zolaka mpi nde bantu kusambila yandi. (Matayo 4:8, 9) Mpeve yina ya nkolami kudikusaka na kutubaka nde Nzambi buyisaka Adam mpi Eva kima mosi ya mbote mpi yandi pusaka bo na kukolama. (Kuyantika 3:1-5) Yo yina, bo ke bingaka yandi Diabulu (Mukusi) mpi Satana (Mbeni to Nkolami). Na nima, yandi pusaka bigangwa ya nkaka ya kimpeve na kukolama na Nzambi. Biblia ke bingaka bo bampeve ya mbi.—Kulonga 32:17; Kusonga 12:9; 16:14.
10. Inki vandaka malanda ya mbendumuka ya bantu mpi ya bigangwa ya kimpeve?
10 Mutindu bantu kolamaka na Nzambi, bo kuditulaka na nsi ya bupusi ya Satana mpi ya bampeve ya mbi. Yo yina Biblia ke bingaka Satana “nzambi ya ngidika yai ya bima” yina “me fwaka meso ya mabanza ya bantu yina ke kwikilaka ve.” Ndinga ya Nzambi ke tuba dyaka nde “ nsi-ntoto ya mvimba kele na nsi ya kiyeka ya muntu ya mbi.” Yezu yandi mosi bingaka Satana “mfumu ya nsi-ntoto yai.”—2 Bakorinto 4:4; 1 Yoane 5:19; Yoane 12:31.
Bantembe Zole ya Kuluta Mfunu
11. Na inki dyambu to ngyufula yankaka Satana kukusilaka Nzambi?
11 Satana basisaka ntembe ya nkaka ya me tadila Nzambi. Yandi kusilaka Nzambi nde yandi salaka kifu mutindu yandi gangaka bantu mpi Satana tubaka nde ata muntu mosi ve lenda lemfukila Nzambi kana nde yandi kutana na bampasi. Na bangogo ya nkaka, Satana monisaka nde kana bantu kukutana na kumekama bo ta buya Nzambi. (Yobi 2:1-5) Mutindu yina, Satana tulaka ntembe sambu na kwikama ya bantu.
12-14. Inki mutindu ntangu ya meluta zolaka monisa kyeleka sambu na yina ketadila bangyufula zole yina Satana basisaka?
12 Yo yina, Nzambi bikilaka bigangwa yonso ya ngangu ntangu mingi sambu na kumona nki mutindu Nzambi ta pesa mvutu na ntembe yai mpi na dyambu ke tadila nswa na yandi ya kuyala ntoto ya mvimba. (Tala Kubasika 9:16.) Mambu yina bantu ta kutana ti yo na bilumbu ke kwisa ta monisa kyeleka sambu na bantembe yai zole.
13 Na yina me tala ntembe ya ntete, ntangu yina Nzambi bikilaka bantu ke monisa nki na yina ke tadila nswa ya Nzambi ya kuyala ntoto ya mvimba, na nzila ya luyalu na yandi ya lunungu? Keti bantu lenda kuditambwisa na mutindu ya mbote, kukonda lutwadisu ya Nzambi? Keti baluyalu ya bantu lenda tula nsi mosi ya mbote mpi ya kyese, kukonda bitumba, kugonda mpi kutula lunungu? Keti yo lenda manisa kinsukami mpi kupesa kyese na bantu yonso? Keti yo lenda manisa maladi, kununa mpi lufwa? Kimfumu ya Nzambi zolaka kulungisa mambu yai yonso.—Kuyantika 1:26-31.
14 Na yina me tala ntembe ya zole, ntangu ya Nzambi bikilaka bantu me monisa nki sambu na bantu? Keti Nzambi salaka kifu mutindu yandi gangaka bantu? Keti bantu ya nkaka lendaka kusala mambu ya mbote ata bo ke kutana ti bampasi? Keti bantu zolaka kumonisa nde bo ke zola luyalu ya Nzambi na kisika ya luyalu ya bantu ya kele ti dipanda?
[Kifwanisu ya kele na lutiti 13]
Nzambi bikisilaka bantu ntangu na kulungisa mpi kusala bima na mayele na bau tii na nsuka
[Bangogo ya ke monisa kisina ya foto]
Nzyetolo ya zulu: Photo ya NASA