Dilongi Ya 2

Nzambi Kele Nani?

Nzambi ya kyeleka kele nani, mpi zina na yandi nani? (1, 2)

Yandi kele ti nitu ya inki mutindu? (3)

Bikalulu na yandi ya nene kele inki? (4)

Keti beto lenda kusadila bifwanisu mpi bidimbu na lusambu na beto na yandi? (5)

Inki bamwaye zole na nzila na yau beto lenda kulonguka mambu yina metadila Nzambi? (6)

1. Bantu kesambilaka bima mingi. Kansi Biblia kesonga beto nde NZAMBI YA KYELEKA kele mosi kaka. Yandi kugangaka bima yonso na zulu mpi awa na ntoto. Sambu yandi kupesaka beto luzingu, yandi kele Muntu mosi kaka yina beto fwete kusambila.​—⁠1 Korinto 8:​5, 6; Kusonga 4:⁠11.

2. Nzambi kele ti batitere mingi kansi yandi kele ti zina mosi kaka. Zina yango kele YEHOWA. Na Babiblia mingi, zina ya Nzambi mekatulamaka mpi meyingisamaka na batitere MFUMU to NZAMBI. Kansi, ntangu Biblia kusonamaka, zina Yehowa kumonanaka na kati na yau mbala penepene na 7000!​—⁠Kubasika 3:15; Nkunga 83:⁠18.

3. Yehowa kele ti nitu, kansi yau kele ve bonso ya beto. Biblia ketuba nde: “Nzambi kele Mpeve.” (Yoane 4:24) Mpeve kele mutindu mosi ya nitu yina kele ya kuzanguka kuluta ya beto. Ata muntu mosi ve memonaka ntete Nzambi. Yehowa kezingaka na zulu, kansi yandi lenda kumona bima yonso. (Nkunga 11:​4, 5; Yoane 1:18) Ebuna, mpeve santu kele inki? Yau kele muntu ve bonso Nzambi. Kansi, yau kele ngolo ya kisalu ya Nzambi.​—⁠Nkunga 104:⁠30.

4. Biblia kesonga beto bumuntu ya Yehowa. Yau kemonisa nde bikalulu na yandi ya nene kele zola, lunungu, mayele ti ngolo. (Kulonga 32:4; Yobi 12:13; Yezaya 40:26; 1 Yoane 4:⁠8) Biblia kesonga beto mpi nde yandi kele na mawa, na bumbote ya ntima, kelolulaka, mpi na nzizidi. Bonso bana ya bulemfu, beto fwete kumeka na kulanda mbandu na yandi.​—⁠Efezo 5:​1, 2.

5. Keti beto fwete kufukama mpi kusambila bifwanisu, biteki to bidimbu na lusambu na beto? Kele ve! (Kubasika 20:​4, 5) Yehowa ketuba nde beto fwete kusambila kaka yandi mosi. Yandi takabula ve lukumu na yandi ti muntu ya nkaka to ti kima ya nkaka. Bifwanisu kele na ngolo ve ya kusadisa beto.​—⁠Nkunga 115:​4-8; Yezaya 42:⁠8.

6. Inki mutindu beto takuka kuzaba Nzambi mbotembote? Mwaye mosi kele na kutalaka bima ya yandi mesalaka mpi na kuyindulaka na mudindu mambu yina yau ketubila beto. Bigangwa ya Nzambi kemonisa beto nde yandi kele ti ngolo mpi mayele mingi. Beto kemona zola na yandi na bima yonso ya yandi mesalaka. (Nkunga 19:​1-6; Roma 1:20) Mwaye ya nkaka ya kulonguka mambu na yina metala Nzambi kele na kulongukaka Biblia. Na kati na yau, yandi kesonga mambu kuluta mingi na yina metala mutindu ya Nzambi yina yandi kele. Yandi ketubila beto mpi na yina metala lukanu na yandi mpi yina ya yandi kezola kusala.​—⁠Amosi 3:7; 2 Timoteo 3:​16, 17.

[Bifwanisu ya kele na lutiti 5]

Beto kelonguka na yina ketadila Nzambi na nzila ya lugangu mpi na nzila ya Biblia