Dilongi Ya 6

Kimfumu ya Nzambi Kele Inki?

Kimfumu ya Nzambi metulamaka wapi? (1) Nani kele Mfumu na yau? (2)

Keti bankaka kevukana sambu na kuyala kumosi ti Mfumu? Kana ee, bantu ikwa? (3)

Inki kesonga nde beto kezinga na bilumbu ya nsuka? (4)

Kimfumu ya Nzambi tasala inki na makwisa sambu na bantu? (5-7)

1. Ntangu yandi kuvandaka awa na ntoto, Yezu kulongaka balandi na yandi na kusamba sambu na Kimfumu ya Nzambi. Kimfumu kele luyalu yina ketwadisama na mfumu. Kimfumu ya Nzambi kele luyalu ya kuswaswana. Yau metulamaka na zulu mpi yau tayala ntoto yai ya mvimba. Yau tasantisa zina ya Nzambi to takumisa yau ya santu. Yau tasala nde luzolo ya Nzambi kusalama awa na ntoto bonso yau kesalamaka na zulu.​—⁠Matayo 6:​9, 10.

2. Nzambi mesilaka nde Yezu takuma Mfumu ya Kimfumu na Yandi. (Luka 1:​30-33) Ntangu Yezu kuvandaka awa na ntoto, yandi kumonisaka nde yandi talenda kuvanda Mfumu mosi ya mbote, ya lunungu, mpi ya kukuka. Ntangu yandi kuvutukaka na zulu, yandi kutulamaka ve mbala mosi Mfumu ya Kimfumu ya Nzambi. (Baebreo 10:​12, 13) Na 1914, Yehowa kupesaka Yezu kiyeka ya Yandi kusilaka yandi. Kubanda pana, Yezu keyalaka na zulu bonso Mfumu ya kuponama na Yehowa.​—⁠Daniele 7:​13, 14.

3. Yehowa mesolaka mpi ndambu ya babakala ti bankento ya kwikama tuka awa na ntoto sambu na kukwenda na zulu. Bau tayala ti Yezu bonso bamfumu, bazuzi, mpi banganga-Nzambi na zulu ya bantu. (Luka 22:​28-30; Kusonga 5:​9, 10) Yezu kubingaka bankundi ya luyalu yai na Kimfumu na yandi “kibuka ya fyoti.” Bau kele 144000.​—⁠Luka 12:32; Kusonga 14:​1-3.

4. Kaka ntangu Yezu kukumaka Mfumu, yandi kulosaka Satana ti bawanzyo na yandi ya mbi tuka na zulu tii na nzyunga ya ntoto. Yau yina mambu mekuma mbi kuluta awa na ntoto kubanda 1914. (Kusonga 12:​9, 12) Bamvita, banzala, bipupa, kuyalumuka ya nkulula ya bansiku​—⁠yai yonso kele ndambu ya “kidimbu” yina kemonisa nde Yezu kele na kuyala mpi nde ngidika yai kele na bilumbu na yau ya nsuka.​—⁠Matayo 24:​3, 7, 8, 12; Luka 21:​10, 11; 2 Timoteo 3:​1-5.

5. Kubika fyoti Yezu tasambisa bantu, na kukabulaka bau bonso ngungudi kekabula mameme ti bankombo. “Mameme” kele bayina takudimonisa bau mosi bantu na yandi ya kwikama. Bau tabaka luzingu ya mvula na mvula na zulu ya ntoto. “Bankombo” kele bayina kubuyaka Kimfumu ya Nzambi. (Matayo 25:​31-34, 46) Na makwisa ya mefinama, Yezu tafwa bantu yonso yina mefwanana na bankombo. (2 Tesalonika 1:​6-9) Kana nge kezola kuvanda mosi na kati ya “mameme” ya Yezu, nge fwete kuwa nsangu ya Kimfumu mpi kusadila mambu ya nge kelonguka.​—⁠Matayo 24:⁠14.

6. Ntangu yai ntoto kele ya kukabulama na bansi mingi. Konso insi kele na luyalu na yau. Bansi yango kenwanaka mbala na mbala mosi ti ya nkaka. Kansi, Kimfumu ya Nzambi tayinga baluyalu yonso ya bantu. Yau tayala yau mosi kaka na zulu ya ntoto ya mvimba. (Daniele 2:44) Na nima, bamvita, kufwa bantu, mpi mubulu tavanda dyaka ve ata fyoti. Bantu yonso tazingaka kumosi na ngemba mpi na bumosi.​—⁠Mishe 4:​3, 4.

7. Na ntangu ya Luyalu ya Yezu ya Bamvula Funda, bantu ya kwikama takuma ya kukuka, mpi ntoto ya mvimba takuma paladisu. Na nsuka ya bamvula funda, Yezu tavanda mesala mambu yonso ya Nzambi kulombaka yandi na kusala. Ebuna yandi tavutula Kimfumu na Tata na yandi. (1 Korinto 15:24) Sambu na inki kukonda kutubila banduku na nge mpi bantu na nge ya zolwa mambu ya Kimfumu ya Nzambi tasala?

[Kifwanisu ya kele na lutiti 13]

Na nsi ya luyalu ya Yezu, luyinu to bangindu ya mbi tavanda dyaka ve