Kimfumu ya Nzambi Kele Nki?

1. Kimfumu ya Nzambi kele nki?

Kimfumu ya Nzambi kele luyalu ya zulu. Yo tayinga baluyalu yonso yankaka mpi Nzambi tasadila yo sambu na kulungisa lukanu na yandi na zulu mpi na ntoto. Yo kele nsangu ya mbote mutindu Nzambi tasadila Kimfumu na yandi na mutindu yai. Kubika fyoti, Kimfumu ya Nzambi talungisa mpusa yina bantu kevandaka ti yo ya luyalu mosi ya mbote. Yo tatula bumosi na kati ya bantu yonso yina tazinga na ntoto.​—Tanga Daniele 2:44; Matayo 6:9, 10.

Kimfumu fwete vanda ti ntotila. Yehowa meponaka Mwana na yandi, Yezu Kristu, na kuvanda Ntotila ya Kimfumu na yandi.​—Tanga Kusonga 11:15.

2. Sambu na nki Yezu kele Ntotila yina mefwana?

Mwana ya Nzambi kele Ntotila ya mefwana sambu yandi kele muntu ya mbote mpi yandi kekangamaka na mambu ya mbote. (Yoane 1:14) Mpi yandi kele ti ngolo ya mingi ya kusadisa bantu sambu yandi tayala ntoto tuka na zulu. Na nima ya lufutumuku na yandi, yandi kwendaka na zulu mpi vandaka na diboko ya kitata ya Yehowa sambu na kuvingila. (Baebreo 10:12, 13) Nsukansuka, Nzambi pesaka yandi kiyeka ya kuyantika kuyala.​—Tanga Daniele 7:13, 14.

3. Banani tayala ti Yezu?

Kibuka mosi yina Biblia kebingaka basantu tayala ti Yezu na zulu. (Daniele 7:27) Basantu ya ntete yina kuponamaka kuvandaka bantumwa ya kwikama ya Yezu. Tii bubu yai, Yehowa kelanda na kupona babakala mpi bankento ya kwikama sambu na kuvanda basantu. Bonso Yezu, bo kefutumukaka ti nitu ya kimpeve.​—Tanga Yoane 14:1-3; 1 Bakorinto 15:42-44.

Bantu ikwa takwenda na zulu? Yezu kubingaka bo “kibuka ya fioti.” (Luka 12:32) Na nsuka, bo yonso tavanda bantu 144 000. Bo tayala ntoto ti Yezu.​—Tanga Kusonga 14:1.

4. Inki kusalamaka ntangu Yezu yantikaka kuyala?

Kimfumu ya Nzambi yantikaka kuyala na mvu 1914.a Ntangu Yezu kumaka Ntotila, yandi losaka Satana mpi bampeve na yandi ya mbi na ntoto. Satana kuwaka makasi ya ngolo mpi yandi yantikaka kubasisa mavwanga na ntoto. (Kusonga 12:7-10, 12) Yantika ntangu yina, bampasi ya bantu mekumaka mingi mpenza. Bitumba, nzala, bamaladi, mpi kunikana ya ntoto kele na kati ya kidimbu yina kemonisa nde ntama mingi ve Kimfumu ya Nzambi tatwadisa mambu yonso ya nsi-ntoto.​—Tanga Luka 21:7, 10, 11, 31.

5. Kimfumu ya Nzambi ke na kusala nki mambu?

Na nsadisa ya kisalu ya kusamuna yina kesalama na nsi-ntoto ya mvimba, Kimfumu ya Nzambi kele dezia na kuvukisa kibuka ya nene ya bantu yina mekatuka na makanda yonso. Bamilio ya bantu ya kudikulumusa kekuma bantu ya Kimfumu ya Nzambi yina Yezu kele Ntotila. Kimfumu ya Nzambi tatanina bo ntangu yo tafwa ngidika ya bima yai ya mbi ya nsi-ntoto. Yo yina, bantu yonso yina kezola kubaka balusakumunu ya Kimfumu ya Nzambi fwete longuka na kuvanda bantu yina kelemfukilaka Yezu.​—Tanga Kusonga 7:9, 14, 16, 17.

Na nsungi ya bamvula 1 000, Kimfumu ya Nzambi talungisa lukanu yina Nzambi vandaka na yo na luyantiku sambu na bantu. Ntoto ya mvimba takuma paladisu. Na nsuka, Yezu tavutula Kimfumu na Tata na yandi. (1 Korinto 15:24-26) Keti nge mezaba muntu mosi yina nge tazola kuzabisa mambu ya metala Kimfumu ya Nzambi?​—Tanga Nkunga 37:10, 11, 29.