Dilongi Ya 11
Balukwikilu ti Bikalulu Yina Keyangidikaka Nzambi Ve
Balukwikilu mpi bikalulu ya inki mutindu kele mbi? (1)
Keti Bakristu fwete kukwikila nde Nzambi kele Butatu Busantu? (2)
Sambu na inki Bakristu ya kyeleka kekembilaka ve Lubutuku, Pake ya Lufutumuku, to bilumbu ya kubutuka? (3, 4)
Keti bafwa lenda kukota bantu ya moyo nsoki? (5) Keti Yezu kufwaka na kulunsi? (6) Sambu na inki yau kele mfunu na kuyangidika Nzambi? (7)
1. Balukwikilu mpi bikalulu yonso ve kele mbi. Kansi Nzambi kendimaka yau ve kana yau kekatuka na lusambu ya luvunu to kana yau kele ve na kuwakana ti malongi ya Biblia.—Matayo 15:6.
2. Butatu Busantu: Keti Yehowa kele Butatu Busantu—Nzambi mosi na bapersona tatu? Ve! Yehowa, Tata, kele “Nzambi mosi kaka ya kyeleka.” (Yoane 17:3, NW; Marko 12:29) Yezu kele Mwana na Yandi ya ntete, mpi yandi kelemfukaka na Nzambi. (1 Korinto 11:3) Tata kele nene kuluta Mwana. (Yoane 14:28) Mpeve santu kele ve muntu; yau kele ngolo ya kisalu ya Nzambi.—Kuyantika 1:2; Bisalu 2:18.
3. Lubutuku ti Pake ya Lufutumuku: Yezu kubutukaka ve na Desembri 25. Yandi kubutukaka mfınama na Oktobri 1, na nsungi mosi ya mvula ntangu bangungudi vandaka kulunda mameme na bau na nganda na mpimpa. (Luka 2:8-12) Yezu kutumaka ve Bakristu na kukembila kilumbu ya lubutuku na yandi. Kansi, yandi kulombaka balongoki na yandi na kusungimina, to kuyibuka, lufwa na yandi. (Luka 22:19, 20) Lubutuku ti bikalulu na yau yonso kukatukaka na mabundu ya luvunu ya ntama. Yau kele kiteso mosi sambu na Pake ya Lufutumuku mpi bikalulu na yau, mu mbandu nsadilu ya maki mpi balape. Bakristu ya ntete vandaka kukembila ve Lubutuku to pake ya Lufutumuku, Bakristu ya bubu fwete kusala yau mpi ve.
4. Bilumbu ya kubutuka: Bilumbu ya kubutuku zole kaka yina metubilama na kati ya Biblia kukembilamaka na bantu yina vandaka kusambila Yehowa ve. (Kuyantika 40:20-22; Marko 6:21, 22, 24-27) Bakristu ya ntete vandaka kukembila ve bilumbu ya kubutuku. Kikalulu ya kukembila bilumbu ya kubutuku kukatukaka na mabundu ya luvunu ya ntama. Bakristu ya kyeleka kepesanaka makabu mpi kevandaka ti bantangu ya luyangidilu kumosi na bantangu ya nkaka ya mvu.
5. Boma ya Bafwa: Bafwa lenda kusala ata kima mosi ve mpi bau kewaka ve ata kima. Beto lenda ve kusadisa bau, mpi bau lenda ve kunyokula beto. (Nkunga 146:4; Longi 9:5, 10) Moyo kefwaka; yau kezingaka ve na nima ya lufwa. (Ezekiele 18:4) Kansi, mbala mingi, bawanzio ya mbi, yina kebingamaka bademo, kebulaka ntulu nde bau kele bampeve ya bafwa. Bikalulu yonso yina kele na kuwakana ti boma to lusambu ya bafwa kele ya luvunu.—Yezaya 8:19.
6. Kulunsi: Yezu kufwaka ve na zulu ya kulunsi. Yandi kufwaka na zulu ya poto, to nti. Ngogo ya Kigreki yina mebalulama na “kulunsi” na kati ya Babiblia mingi kesongidila kaka kitini mosi ya nti. Kidimbu ya kulunsi kukatukaka na mabundu ya luvunu ya ntama. Kulunsi vandaka kusadilama ve to kusambilama mpi ve na Bakristu ya ntete. Kansi, nge keyindula nde yau tavanda mbote na kusadila kulunsi na lusambu?—Kulonga 7:26; 1 Korinto 10:14.
7. Yau lenda kuvanda mpasi kibeni sambu na kuyambula mwa balukwikilu mpi bikalulu yai. Bamambere ya dibuta ti banduku tameka na kundimisa nge na kukonda kusoba balukwikilu na nge. Kansi kuyangidika Nzambi kele mfunu kuluta kuyangidika bantu.—Bingana 29:25; Matayo 10:36, 37.
[Kifwanisu ya kele na lutiti 22]
Nzambi kele ve Butatu Busantu
[Kifwanisu ya kele na lutiti 23]
Lubutuku ti Pake ya Lufutumuku mekatuka na mabundu ya luvunu ya ntama
[Kifwanisu ya kele na lutiti 23]
Kikuma kele ve ya kusambila bafwa to kubanga bau