Sambu na Nki Bambangi ya Yehowa Ke Salaka Ve Nkinsi ya Pake?

Bangindu ya mbi yina bantu mingi ke vandaka ti yo

Luvunu: Bambangi ya Yehowa ke salaka ve Nkisi ya Pake sambu bo kele ve Bakristu.

Kieleka: Beto ke ndimaka nde Yezu Kristu kele Ngulusi na beto, yo yina beto ke salaka bikesa sambu beto “landa bitambi na yandi mbote-mbote.”​—1 Piere 2:21; Luka 2:11.

Luvunu: Beno ke ndimaka ve nde Yezu futumukaka na bafwa.

Kieleka: Beto ke ndimaka nde Yezu futumukaka; beto ke zabaka nde lufutumuku na yandi kele na kisina ya lukwikilu ya Bakristu mpi beto ke longaka yo na kisalu na beto ya kusamuna.​—1 Bakorinto 15:3, 4, 12-15.

Luvunu: Yo ke yangisaka beno ve mutindu bana na beno ke vandaka ve ti kiese na Nkinsi ya Pake.

Kieleka: Beto ke zolaka bana na beto disongidila beto ke salaka yonso sambu beto longa bo mpi beto sadisa bo na kuvanda na kiese.​—Tito 2:4.

Sambu na nki Bambangi ya Yehowa ke salaka ve Nkinsi ya Pake?

• Nkinsi ya Pake me katukaka ve na Biblia.

• Yezu tubaka nde beto fwete yibukaka lufwa na yandi, kansi ve lufutumuku na yandi. Beto ke yibukaka lufwa na yandi konso mvula na kuwakana ti manaka ya bangonda ya Biblia (calendrier lunaire).​—Luka 22:19, 20.

• Beto ke ndimaka nde mambu yina vandaka na kisina ya Nkinsi ya Pake katukaka na binkulu ya ntama ya kubasisa bima mingi, yo me salaka nde Nzambi kundima ve Nkinsi ya Pake. Nzambi ke lombaka nde beto “kangama kaka na yandi,” mpi yandi ke waka makasi kana bantu ke sambila yandi na mutindu yina yandi ke ndimaka ve.​—Kubasika 20:5; 1 Bantotila 18:21.

Beto ke ndimaka nde lukanu yina beto me bakaka ya kusala ve Nkinsi ya Pake me katuka na Biblia; yo ke siamisa beto na kusadila “mayele mpi mayele ya kuyindula” na kisika ya kulanda binkulu ya bantu. (Bingana 3:21; Matayo 15:3) Kana dibaku me monana, beto ke zabisaka bantu ya nkaka mambu yina beto ke kwikilaka na yina me tala Nkinsi ya Pake; beto ke zitisaka mpi nswa yina konso muntu kele ti yo ya kupona mambu yina yandi ta sala.​—1 Piere 3:15.