Keti Bambangi ya Yehowa Ke Ndimaka nde Minganga Kusansa Bo?

Ee. Bambangi ya Yehowa ke ndimaka nkisi ya minganga, bo ke ndimaka mpi nde minganga kusansa bo. Ata beto ke salaka bikesa sambu na kuditanina mpi kuvanda ti mavimpi ya mbote, bantangu ya nkaka beto ‘ke vandaka na mfunu ya munganga.’ (Luka 5:31, Bible na Kituba) Ya kieleka, Bambangi ya nkaka ya Yehowa kele minganga bonso Luka, Mukristu ya mvu-nkama ya ntete.​—Bakolosai 4:14.

Kansi, balusansu ya nkaka ke fwaka bansiku ya Biblia yo yina beto ke buyaka yo. Mu mbandu, beto ke buyaka bo vutula beto menga sambu Biblia ke buyisaka kuvutula menga sambu na kubeluka. (Bisalu 15:20) Biblia ke buyisaka mpi balusansu yina ke lombaka nde bo sadila bisalu ya bampeve ya mbi.​—Bagalatia 5:19-21.

Ata mpidina, balusansu mingi ke fwaka ve bansiku ya Biblia. Yo yina, konso muntu fwete pona mutindu yina yandi ke zola nde bo sansa yandi. Mbangi mosi ya Yehowa lenda ndima nkisi mosi buna to lusansu mosi buna, kansi Mbangi ya nkaka lenda buya yo.​—Bagalatia 6:5.