Keti Nge Kevutula na Nima Kilumbu ya Kufulusa Yo?

Inki yango? Kufulusa karte Instructions médicales (DPA) yina bo mebasisaka sambu na Bambangi yina mebakaka mbotika. Sambu “beno zaba ve nki mutindu luzingu na beno ta kuma mbasi,” yo kele mfunu nde beno baka lukanu na ntwala mpi beno sonika na mukanda mosi balusansu mpi bametode ya kusansila yina beno lenda ndima kana maladi ya kintulumukina kusimba beno. (Yak. 4:14; Bis. 15:28, 29) Sambu na kusadisa beno, beto mebasisaka video Soigner sans transfuser : besoins et droits du patient. Beno tala video yango, mpi na nima ya kusala kisambu, beno vutukila kumosi mambu ya beno melonguka na nsadisa ya bangyufula yai ya kele awa.—Noti: Sambu bande video yango kele ti bifwanisu ya kesonga bantu yina bo ke na kusala operasio, bibuti fwete sadila mayele sambu na kubaka lukanu kana bana na bo ya fyoti fwete tala yo to ve.

(1) Sambu na nki baminganga yankaka ke na kutadila dyaka dyambu ya metala kuvutula bantu menga? (2) Pesa bambandu tatu ya ba operasio ya mpasi yina bo lenda sala kukonda kuvutula menga. (3) Badoktere mpi minganga ikwa yina kepasulaka bantu na nsi-ntoto ya mvimba memonisaka luzolo na bo ya kusansa bamaladi kukonda kuvutula menga? Sambu na nki bo kele na luzolo ya kusala mutindu yina? (4) Bansosa ya bo mesala ntama mingi ve na balupitalu memonisa nki sambu na yina metala kusadila menga? (5) Inki kele bigonsa yina lenda monana kana bo vutula muntu menga? (6) Bantu mingi ya mayele metubaka nki na yina metala mambote ya kusansa bantu kukonda kuvutula menga? (7) Inki kevandaka na kisina ya anémie? Tii na nki kiteso bantu lenda zinga ti anémie kukonda nde yo sala bo mbi? Inki bo lenda sala sambu na kufyotuna bigonsa na yo? (8) Inki mutindu bo lenda sala sambu baselile ya mbwaki ya mbefo kubuta mingi? (9) Inki bateknike bo ke na kusadila sambu na kufyotuna kiteso ya menga yina kebasikaka na ntangu bo kesala muntu operasio? (10) Keti bo lenda sansa bana ya fyoti to bantu yina kele ti maladi ya ngolo mpi ya kintulumukina yina ketula luzingu na bo na kigonsa kukonda kuvutula bo menga? (11) Inki kele munsiku mosi na kati ya minsiku ya ntetentete ya lusansu ya mbote? (12) Sambu na nki yo kele mfunu nde Bakristu kupona na ntwala mutindu ya lusansu ya kukonda kuvutula menga yina bo tandima? Inki mutindu beto lenda sala yo?

Kundima balusansu yankaka ya bo memonisa na video metadila desizio ya muntu yandi mosi na kuwakana ti kansansa na yandi yina melongamaka na Biblia. Keti nge mebakaka desizio ya sikisiki na yina metala balusansu mpi bametode ya kusansila ya kukonda kuvutula menga yina nge ti bana na nge tandima mpi na nima nge mefulusaka karte DPA? Sambu na kuzaba mambu mingi na yina metala mambu yai, tala ti dikebi yonso kapu ya 7 ya mukanda “Zola ya Nzambi” mpi bareferanse ya bo metubila na kati. Tala mpi disolo “Inki Desizio Mono Fwete Baka na Yina Metala Kusadila Bima ya Fyotifyoti ya Menga mpi Bametode ya Kusansa Yina Kelombaka Kusadila Menga na Mono Mosi?” ya kele na ngika ya Kisalu na Beto ya Kimfumu ya Novembri 2006. Na nsuka, zikisa nde nge mesonika bansola na nge na sikisiki yonso na karte DPA na nge. Nge fwete zabisa mbote-mbote badesizio na nge na batemwe na nge mpi na bantu ya dibuta na nge yina kele ve Bambangi.

[Lupangu ya kele na lutiti 3]

• Keti nge meponaka balusansu mpi bametode ya kusansila kukonda kuvutula menga yina nge ti bana na nge tandima?

• Keti nge ketambulaka ti karte DPA na nge sambu yo sadisa nge kana dyambu mosi ya kintulumukina mebasika?