Keti Nge Kevutula na Nima Kilumbu ya Kufulusa Yo?

Inki yango? Kufulusa karte Instructions médicales (DPA) yina bo mebasisaka sambu na Bambangi yina mebakaka mbotika. Sambu “beno zaba ve nki mutindu luzingu na beno ta kuma mbasi,” yo kele mfunu na kubaka lukanu na ntwala mpi kumonisa na mukanda mosi mutindu ya lusansu ti ya bametode ya kusansila yina beno lenda ndima kana maladi ya kintulumukina kusimba beno. (Yak. 4:14; Bis. 15:​28, 29) Sambu na kusadisa beno, organizasio mebasisaka video Soigner sans transfuser : besoins et droits du patient. Beno tala video yango, mpi na nima ya kusala kisambu, beno vutukila kumosi mambu ya beno melonguka na nsadisa ya bangyufula yai kele awa.​—⁠Noti: Sambu bande video yango kele ti bifwanisu ya kesonga bantu yina bo ke na kusala operasio, bibuti fwete sadila mayele sambu na kubaka lukanu kana bana na bo ya fyoti fwete tala yo to ve.

(1) Sambu na nki baminganga yankaka ke na kutadila dyaka dyambu ya metala kuvutula bantu menga? (2) Pesa bambandu tatu ya ba operasio ya mpasi yina bo lenda sala kukonda kuvutula menga. (3) Badoktere mpi minganga ikwa yina kepasulaka bantu na nsi-ntoto ya mvimba memonisaka luzolo na bo ya kusansa bamaladi kukonda kuvutula menga? Sambu na nki bo kele na luzolo ya kusala mutindu yina? (4) Bansosa ya bo mesala ntama mingi ve na balupitalu memonisa nki sambu na yina metala kusadila menga? (5) Inki kele bigonsa yina lenda monana kana bo vutula muntu menga? (6) Bantu mingi ya mayele metubaka nki na yina metala mambote ya kusansa bantu kukonda kuvutula menga? (7) Inki kevandaka na kisina ya anémie? Tii na nki kiteso bantu lenda zinga ti anémie kukonda nde yo sala bo mbi? Inki bo lenda sala sambu na kufyotuna bigonsa na yo? (8) Inki mutindu bo lenda sala sambu baselile ya mbwaki ya mbefo kubuta mingi? (9) Inki bateknike bo ke na kusadila sambu na kufyotuna kiteso ya menga yina kebasikaka na ntangu bo kesala muntu operasio? (10) Keti bo lenda sansa bana ya fyoti to bantu yina kele ti maladi ya ngolo mpi ya kintulumukina yina ketula luzingu na bo na kigonsa kukonda kuvutula bo menga? (11) Inki kele munsiku mosi na kati ya minsiku ya ntetentete ya lusansu ya mbote? (12) Sambu na nki yo kele mfunu nde Bakristu kupona dezia na ntwala mutindu ya lusansu ya kukonda menga yina bo tandima? Inki mutindu beto lenda sala yo?

Kundima balusansu yankaka ya bo memonisa na video metadila desizio ya muntu yandi mosi na kuwakana ti kansansa na yandi yina melongamaka na Biblia. Keti nge mebakaka desizio ya sikisiki na yina metala lusansu mpi bametode ya kusansila ya kukonda kuvutula menga yina nge ti bana na nge tandima? Sambu na kuzaba dyaka mingi na yina metala mambu yai, tala “Bangyufula ya Batangi” na Nzozulu ya Nkengi ya Yuni 15, 2004 (ya Kifalansa) mpi ya Novembri 1, 2000, mpi lutiti ya ngika “Inki Desizio Mono Fwete Baka na Yina Metala Kusadila Bima ya Fyotifyoti ya Menga mpi Bametode ya Kusansa Yina Kelombaka Kusadila Menga na Mono Mosi?” na Kisalu na Beto ya Kimfumu ya Novembri 2006. Nge fwete zabisa mbote-mbote badesizio na nge na batemwe na nge ti na bantu ya dibuta na nge yina kele ve Bambangi.