Keti Nge Mezaba Bametode ya Kusansa Yina Nge Tapona?

Kusala operasio kukonda kuvutula menga mekuma kusalama na balupitalu mingi na nsi-ntoto ya mvimba. Keti nge mezaba mpenza bametode yina kesalamaka sambu na kusansa bambefo kukonda kuvutula menga? Nge fwete zaba yo na mpila nde nge kuka kubaka badesizio ya mbote na yina metala lusansu ti operasio. Tala bande video Pas de sang : la médecine relève le défi. Na nima, tadila na kisambu mambu ya nge melongukaka na nsadisa ya bangyufula yai kele awa.​—⁠Noti: Sambu bande video yango kele ti bifwanisu ya kesonga bantu yina bo ke na kusala operasio, bibuti fwete sadila mayele sambu na kubaka lukanu kana bana na bo ya fyoti fwete tala yo to ve.

(1) Inki kele kikuma ya ntete ya Bambangi ya Yehowa kebuyaka nde bo vutula bo menga? (2) Sambu na yina metala kusansa nitu, nki kevandaka mpusa ya Bambangi ya Yehowa? (3) Inki nswa ya mfunu bambefo kevandaka na yo? (4) Sambu na nki yo ke mayele mpi mbote na kubuya nde bo vutula nge menga? (5) Ntangu muntu mevidisa menga mingi na lere ya operasio, nki mambu zole ya mfunu minganga kesalaka kukonda kusukinina? (6) Tanga minsiku iya yina metadila bametode ya kusansa kukonda kuvutula menga. (7) Inki mutindu minganga lenda (a) fyotuna kiteso ya menga yina muntu lenda vidisa na ntangu ya operasio, (b) bumba menga yina kele ti baselile ya mbwaki, (c) sala na mpila nde menga kukuma mingi nswalu na nitu ya mbefo, mpi (d) vutula menga yina yandi vidisaka? (8) Tendula bametode ya bo kebingaka (a) hémodilution mpi (b) récupération du sang épanché. (9) Inki mambu nge fwete sosa kuzaba na yina metala konso nkisi yina bo lenda sansila nge kukonda kuvutula nge menga? (10) Keti ba operasio ya ngolo mpi ya mpasi lenda salama kukonda kuvutula muntu menga? (11) Inki mutindu ya kusansa minganga mekuma kusadila sambu na kusansa bambefo yonso?

Kundima balusansu yankaka ya bo memonisa na video metadila desizio ya muntu yandi mosi na kuwakana ti kansansa na yandi yina melongamaka na Biblia. Keti nge mebakaka desizio ya sikisiki na yina metala lusansu mpi bametode ya kusansa kukonda kuvutula menga yina nge ti bana na nge tandima, mpi na nima kufulusa karte DPA? Sambu na kuzaba dyaka mingi na yina metala mambu yai, tala “Bangyufula ya Batangi” na Nzozulu ya Nkengi ya Yuni 15, 2004 (ya Kifalansa) mpi ya Novembri 1, 2000. Na nima, sadila lutiti ya ngika ya Kisalu na Beto ya Kimfumu ya Novembri 2006, na ntu-dyambu “Inki Desizio Mono Fwete Baka na Yina Metala Kusadila Bima ya Fyotifyoti ya Menga mpi Bametode ya Kusansa Yina Kelombaka Kusadila Menga na Mono Mosi?”. Na nsuka, zikisa nde nge mesonika desizio na nge ya sikisiki na karte DPA na nge. Nge fwete zabisa mbote-mbote badesizio na nge na batemwe na nge ti na bantu ya dibuta na nge yina kele ve Bambangi.

[Lupangu ya kele na lutiti 3]

• Keti nge mepona lusansu mpi bametode ya kusansa kukonda kuvutula menga yina nge ti bana na nge tandima?

• Keti nge mefulusaka karte DPA na nge sambu yo sadisa nge ntangu dyambu mosi ya kintulumukina tabasika?