Inki Lusansu Kele ya Kuluta Mbote?

Doktere Michael Rose kutubaka nde: “Mbefo yina bo mesala operasio kukonda kuvutula yandi menga mebaka lusansu mosi ya kuluta mbote mpenza.” Inki bametode mpi bankisi yina beto lenda tanga bonso “lusansu ya kukonda kusadila menga”? Nge fwete zaba yo na mpila nde nge kuka kubaka badesizio ya mbote na yina metala lusansu ti operasio. Tala bande video Pas de sang : la médecine relève le défi, mpi meka nzayilu na nge na nsadisa ya bangyufula yai melanda.​—⁠Noti: Sambu bande video yango kele ti bifwanisu ya kesonga bantu yina bo ke na kusala operasio, bibuti fwete sadila mayele sambu na kubaka lukanu kana bana na bo ya fyoti fwete tala yo to ve.

(1) Inki kele kikuma ya ntete ya Bambangi ya Yehowa kebuyilaka nde bo vutula bo menga? (2) Sambu na yina metala kusansa nitu, inki kevandaka mpusa ya Bambangi ya Yehowa? (3) Inki nswa ya mfunu bambefo kevandaka na yo? (4) Sambu na nki yo ke mayele mpi mbote na kubuya nde bo vutula nge menga? (5) Ntangu muntu mevidisa menga mingi na lere ya operasio, inki mambu zole ya mfunu minganga kesalaka kukonda kusukinina? (6) Tanga minsiku iya yina metadila bametode ya kusansa kukonda kuvutula menga. (7) Inki mutindu minganga lenda a) fyotuna kiteso ya menga yina muntu lenda vidisa na ntangu ya operasio, (b) bumba menga yina kele ti baselile ya mbwaki, (c) sala na mpila nde menga kukuma mingi nswalu na nitu ya mbefo, mpi d) vutula menga yina yandi vidisaka? (8) Tendula bametode ya bo kebingaka a) hémodilution mpi (b) récupération du sang épanché. (9) Inki mambu nge fwete sosa kuzaba na yina metala konso nkisi yina bo lenda sansila nge kukonda kuvutula nge menga? (10) Keti ba operasio ya ngolo mpi ya mpasi lenda salama kukonda kuvutula muntu menga? (11) Inki mutindu ya kusansa minganga mekuma kusadila sambu na kusansa bambefo yonso?

Kundima balusansu yankaka ya bo memonisa na video metadila desizio ya muntu yandi mosi na kuwakana ti kansansa na yandi yina melongamaka na Biblia. Keti nge meponaka lusansu ya kukonda kuvutula menga yina nge ti bana na nge tandima? Nge fwete zabisa mbote-mbote bantu ya dibuta na nge yina kele ve Bambangi badesizio na nge ti bikuma ya badesizio yango.​—⁠Tala “Bangyufula ya Batangi” na Nzozulu ya Nkengi ya Kifalansa ya Yuni 15, 2004 mpi ya Novembri 1, 2000.