Dilongi Ya 14

Mutindu Bambangi ya Yehowa Mebongisamaka

Bambangi ya Yehowa ya ntangu na beto kuyantikaka inki ntangu? (1)

Inki mutindu balukutakanu ya Bambangi ya Yehowa ketwadisamaka? (2)

Mbongo ya kesadilamaka kekatukaka wapi? (3)

Nani ketwadisaka konso dibundu? (4)

Inki balukutakanu ya nene kesalamaka konso mvula? (5)

Inki kisalu kesalamaka na nto-mbanza na bau mpi na bafiliale na bau? (6)

1. Bambangi ya Yehowa ya ntangu na beto kuyantikaka na 1870. Na luyantiku, bau vandaka kubingama Balongoki ya Biblia. Kansi na 1931, bau kubakaka zina ya Masonuku ya Bambangi ya Yehowa. (Yezaya 43:10) Tuka na baluyantiku mosi ya fyoti, organizasio meyelaka tii na bamilio ya Bambangi, yina kele ti kisalu mingi ya kusamuna na bansi kuluta 230.

2. Mabundu mingi ya Bambangi ya Yehowa kevandaka ti balukutakanu mbala tatu konso mposo. Nge mebingama na kukwenda kuvukana ti mosi na kati na yau. (Baebreo 10:​24, 25) Biblia kele lufulu ya mambu yonso yina kelongamaka kuna. Balukutakanu keyantikaka mpi kesukaka na kisambu. “Bankunga ya kimpeve” yina kekatukaka na ntima keyimbamaka mpi na balukutakanu mingi. (Efezo 5:​18, 19) Kukota na kati na yau kele ya ofele, mpi bamvukisa ya bambongo kesalamaka ve sambu na yau.​—⁠Matayo 10:⁠8.

3. Mabundu mingi kesalaka balukutakanu na kati ya Nzo ya Kimfumu. Yau kevandaka mbala mingi banzo kaka ya metungama na Bambangi ya luzolo ya mbote. Nge tamona ve ata kifwanisu mosi, kulunsi, to bima ya mutindu yina na kati ya Nzo ya Kimfumu. Mbongo ya kesadilamaka kekatukaka na makabu ya luzolo ya mbote. Sambu na bayina kezola kupesa makabu, kele ti kesi mosi sambu na makabu.​—⁠2 Korinto 9:⁠7.

4. Na kati ya konso dibundu, kele ti bankuluntu, to bankengi. Bau kebakaka lutwadisu na yina metala kulonga na kati ya dibundu. (1 Timoteo 3:​1-7; 5:17) Bau kesadisamaka na bansadi ya kisalu. (1 Timoteo 3:​8-10, 12, 13) Bantu yango kele ve ya kuzanguka na zulu ya bantu ya nkaka ya dibundu. (2 Korinto 1:24) Bau mebakaka ve batitere ya kuswaswana. (Matayo 23:​8-10) Bau kevandaka ve ti mvwatu ya kuswaswana ti bankaka. Bau kefutamaka mpi ve sambu na kisalu na bau. Bankuluntu kesungiminaka, na luzolo yonso, bansatu ya kimpeve ya dibundu. Bau lenda kupesa nsyamisa ti lutwadisu na bantangu ya mpasi.​—⁠Yakobo 5:​14-16; 1 Piere 5:​2, 3.

5. Bambangi ya Yehowa kesalaka mpi balukutakanu ya nene to ya distrike konso mvula. Na baokazio yango, mabundu mingi kevukanaka kumosi sambu na manaka ya sipesiali ya ndongolo ya Biblia. Mbotika ya bantu ya mpa kevandaka kitini mosi ya mfunu ya konso manaka ya lukutakanu ya nene to ya distrike.​—⁠Matayo 3:​13-17; 28:​19, 20.

6. Nto-mbanza ya inza ya mvimba ya Bambangi ya Yehowa kele na New York. Na kisika yango kezingaka Nto-kimvuka, kimvuka ya nene ya bankuluntu ya ngikana yina kekengilaka dibundu ya inza ya mvimba. Kele mpi ti bafiliale kuluta nkama mosi na kati ya inza. Na bisika yango, bantu ya luzolo ya mbote kesadisaka na kunyema mpi kutinda mikanda ya Biblia. Lutwadisu mpi kepesamaka sambu na lubongisu ya kisalu ya kusamuna. Sambu na inki kukonda kubongisa ntangu sambu na kwenda kutala filiale yina kele penepene na beno?