Ntendula ya Kyeleka ya Moyo
“Beno ta zaba mambu yina kele ya kieleka, ebuna mambu yina ta katula beno na kimpika.”—YOANE 8:32.
1. Sambu na inki yau kele mfunu na kufimpa balukwikilu na beto yina metala moyo ti lufwa?
BALUKWIKILU yina metala lufwa ti Bwala ya Bafwa kekatukaka mbala mingi na dibundu ya muntu ti luzingu yina yandi zingaka. Mutindu beto memona yau, yau kekatukaka na mabanza mingi. Bamosi kendimaka nde moyo kezabaka lukanu na yau ya nsuka na nima ya kubutukabutuka mbala mingi. Bankaka nde luzingu ya muntu kezingaka mbala mosi kemonisaka nkanu na yandi ya nsuka. Yau yina, muntu mosi lenda tula ntima nde yandi tazaba nsuka na ntangu yandi tafwa, yankaka nde yandi takuma na Nirvâna (luzingu ya katikati), ye yankaka dyaka nde yandi tabaka nsendo ya kukwenda na zulu. Ebuna, kyeleka kele nde nki? Sambu balukwikilu na beto kevandaka ti bupusi na zulu ya bankadilu, bisalu, ti banzengolo na beto, keti beto lenda kudibanza ve sambu na kubaka mvutu na ngyufula yai?
2, 3. (a) Sambu na inki beto lenda tula ntima na mambu yina Biblia ketubaka sambu na moyo? (b) Inki kyeleka Biblia ketuba sambu na moyo?
2 Mukanda mosi ya ntama kibeni, Biblia, keta nkenda ya muntu banda na ntangu moyo ya muntu ya ntete gangamaka. Yau kelongaka ve bafilozofi to bansiku ya bambuta ya bantu. Biblia ketuba kyeleka pwelele na yina metala moyo: Moyo na nge ke nge, bafwa kezingaka ve ata fyoti, mpi bayina kele na mabanza ya Nzambi tafutumuka kana ntangu ya yandi metulaka melunga. Kuzaba mambu yai lenda tendula inki sambu na nge?
3 Yezu Kristu tubilaka balandi na yandi nde: “Beno ta zaba mambu yina kele ya kieleka, ebuna mambu yina ta katula beno na kimpika.” (Yoane 8:32) Ee, kyeleka kekatulaka muntu na kimpika. Kansi kyeleka na yina metala moyo takatula beto na kimpika ya nki?
Kukatuka na Kimpika ya Boma ti Kukonda Kivuvu
4, 5. (a) Inki boma kyeleka na yina metala moyo kekatula? (b) Inki mutindu kivuvu ya lufutumuku pesaka kikesa na toko mosi yina vandaka kubela maladi ya lufwa?
4 Mukanda mosi, (The World Book Encyclopedia) ketuba nde: “Bantu mingi kebangaka lufwa mpi kesalaka ngolo na kubuya kuyindula yau.” Muntu mosi ya nkenda ketuba nde: “Na bansi ya mputu bantu ketubaka dyaka kibeni ve ngogo ‘lufwa.’ ” Mpi na babwala yankaka, sambu na kutuba nde muntu mefwa, bau ketubaka mbala mingi nde yandi “kele dyaka ve” to yandi “mekwenda.” Boma yai ya lufwa kevandaka mpenza boma ya kima ya bau zaba ve, sambu bantu mingi keyindulaka nde lufwa kele diswekamu. Kuzaba kyeleka sambu na yina metala mambu ya kesalamaka na ntangu ya beto kefwaka kefyotunaka boma yai.
5 Mu mbandu, tala mutindu ya kuyindula ya Michaelyn, mwana-nkento mosi ya bamvula 15. Yandi vandaka bela kansere ya menga, ebuna yandi kumaka penepene na lufwa. Mama na yandi, Paula, keyibuka nde: “Michaelyn tubaka nde yandi vandaka tula susi ve na kufwa sambu yandi zabaka nde lufwa yango vandaka ya ntangu fyoti. Beto vandaka tubila mingi mambu ya inza ya mpa ya Nzambi ti bantu yina ya tafutumuka na inza yango. Michaelyn vandaka ti lukwikilu ya ngolo na Yehowa Nzambi ti na lufutumuku—ata duti fyoti ve.” Kivuvu ya lufutumuku katulaka mwana-nkento yai ya kikesa na kimpika ya boma ya ngolo ya lufwa.
6, 7. Na inki kukonda kivuvu kyeleka yina ketadila moyo kekatula beto? Pesa mbandu.
6 Inki mutindu kyeleka vandaka na bupusi na zulu ya bibuti ya Michaelyn? Jeff, tata na yandi, ketuba nde: “Lufwa ya mwana na beto ya nkento vandaka kima mosi ya kuluta mpasi ya kubwilaka beto ntete ve. Kansi beto ketulaka kivuvu ya ngolo na lusilu ya Yehowa ya lufutumuku, mpi beto kevingila kilumbu ya beto tanata dyaka mwana na beto ya kuzolama Michaelyn na maboko na beto. Yau tavanda kukutana mosi ya kusakana ve!”
7 Ee, kyeleka na yina metala moyo kekatulaka muntu na kimpika ya kukonda kivuvu yina lufwa ya muntu ya beto kezolaka lenda natila beto. Ntembe kele ve nde, ata kima mosi ve lenda katula kimakulu mpasi ti mawa yina kekwisaka na ntangu muntu ya beto kezolaka mingi mefwa. Kansi, kivuvu ya lufutumuku, kelembikaka mawa mpi yau kekumaka pete mingi na kukangila mpasi yango ntima.
8, 9. Na inki boma kyeleka yina ketadila nkadilu ya bafwa kekatula beto?
8 Kyeleka ya Masonuku sambu na yina metala nkadilu ya bafwa kekatulaka beto mpi na kimpika ya kubanga bafwa. Banda bau melongukaka kyeleka yai, bantu mingi yina vandaka ntete na kimpika ya bibangabanga ya bansiku ya bambuta sambu na yina metala bafwa, bau kewaka dyaka ve boma ya kusingama, ya banganga, ya bankisi, ti ya bandoki, bau kepesaka mpi ve bimenga ya ntalu sambu na kulembika bankaka na bau mpi kukandikila bau na kuvutuka sambu na kukutana ti bantu yina kele na luzingu. Ntembe kele ve nde, sambu bafwa “kuzaba kima ve,” bisalu ya mutindu yina kele na mfunu ve ata fyoti.—Longi 9:5.
9 Kyeleka yina kele na Biblia sambu na yina metala moyo, kekatula mpenza bantu na kimpika mpi yau mefwana na kutudila ntima. Kansi, tala dyaka kivuvu ya kuswaswana yina Biblia kepesa nge.
[Bangogo sambu na kubenda dikebi ya kele na lutiti 29]
Kyeleka yina ketadila moyo kekatula nge na kimpika ya boma ya lufwa, boma ya bafwa, kukonda kivuvu sambu na lufwa ya muntu yina nge kezolaka