Kivuvu ya Kuswaswana!
“Muntu yina ke na moyo mpi me ndimaka mono, yandi ta fwa ve ata fioti.”—YOANE 11:26.
1. Bambidi ya bantu yina kele ya kufwa ntangu yai tafutumuka sambu na kuzinga na kisika ya inki mutindu?
NTANGU bambidi ya bantu tafutumuka, bau tavutuka ve sambu na kuzinga na ntoto ya kukonda bantu. (Bisalu 24:15) Ntangu bau tabasika, bau takuta kisika ya kutomisa kitoko mpenza mpi bau takuta bakartie, bilele, ti madya mingi mebongisamaka sambu na bau. Banani bantu tabongisa bima yai yonso? Yau kemonana pwelele nde, bantu tazinga na inza ya mpa na ntwala lufutumuku kusalama na ntoto. Kansi banani yango yina?
2-4. Inki kivuvu ya kuswaswana bayina kezinga na “bilumbu ya nsuka” kevingila?
2 Kulungana ya mbikudulu ya Biblia kemonisa nde beto kele na kuzinga “bilumbu ya nsuka” ya ngidika ya bima yai.a (2 Timoteo 3:1) Ntangu yai, kubika fyoti Yehowa Nzambi kekota na makambu ya bantu mpi yandi kekatula mambi na zulu ya ntoto. (Nkunga 37:10, 11; Bingana 2:21, 22) Na ntangu yina, inki takumina bantu yina kesadila Nzambi na kwikama yonso?
3 Yehowa tafwa ve bantu ya lunungu kumosi ti bantu ya mbi. (Nkunga 145:20) Yandi mesalaka ntete ve kima ya mutindu yina, mpi yandi tasala yau ve na ntangu yandi tayobisa ntoto na kukatula mambi yonso. (Fwanisa ti Kuyantika 18:22, 23, 26.) Ya kyeleka, mukanda ya nsuka ya Biblia ketubila “kibuka mosi ya nene, yina ata muntu mosi ve lungaka kutanga, bau katukaka na bansi yonso ti bikanda ti bantu ti bandinga,” bau kebasika na “mpasi ya nene.” (Kusonga 7:9-14, NW) Ee, mbidi ya nene ya bantu taguluka na mpasi ya nene yina tasukisa inza yai ya mbi, ebuna bau takota na inza ya mpa ya Nzambi. Kuna, bantu ya bulemfu lenda baka mpenza mambote ya ngidika ya kitoko ya Nzambi salaka sambu na kukatula bantu na kimpika ya disumu ti lufwa. (Kusonga 22:1, 2) Na mutindu yai, “kibuka ya nene” tafwa ve ata fyoti. Kivuvu yai kele ya kuswaswana mpenza!
4 Keti beto lenda tula ntima na kivuvu yai ya kuyituka? Ee! Yezu Kristu yandi mosi monisaka nde ntangu yina bantu tazinga nkatu kufwa dyaka tavanda. Mwa ntangu fyoti na ntwala ya kufutumuna nduku na yandi Lazare, Yezu tubilaka Marta nde: “Muntu yina ke na moyo mpi me ndimaka mono, yandi ta fwa ve ata fioti.”—Yoane 11:26.
Nge mpi Lenda Zinga Mvula na Mvula
5, 6. Kana nge kezola kuzinga mvula na mvula na Paladisu na ntoto, inki nge fwete sala?
5 Keti nge kezola kuzinga mvula na mvula na Paladisu na ntoto? Keti nge kele na mpusa ya ngolo ya kumona dyaka bantu ya nge kezolaka mingi? Kana mpidina nge fwete longuka sambu na kubaka nzayilu ya sikisiki ya luzolo ti balukanu ya Nzambi. Na kisambu mosi ya Yezu salaka na Nzambi, yandi tubaka nde: “Luzingu ya mvula na mvula kesongidila nde: bau longuka kuzaba nge, Nzambi mosi kaka ya kyeleka, mpi muntu yina ya nge tindaka, Yezu Kristu.”—Yoane 17:3, NW.
6 Luzolo ya Nzambi kele nde “bantu ya mitindu yonso kuguluka mpi bau kuma ti nzayilu ya sikisiki ya kyeleka.” (1 Timoteo 2:3, 4, NW) Ntangu yau yai ya kulonguka inki mutindu nge, kumosi ti mafuku ya bantu yina ke na kuyita kusala luzolo ya Nzambi, lenda zinga mvula na mvula na Paladisu na ntoto. Bambangi ya Yehowa tavanda na kyese na kusadisa nge na kulonguka mambu kuluta mingi sambu na yina metala Nzambi ti malombu na yandi. Sambu na inki nge kwenda ve kukutana ti bau na Nzo ya Kimfumu yina kele penepene ti nge to kusonika na adresi ya penepene yina kele na lutiti yina melanda?
[Noti na nsi ya lutiti]
a Tala mukanda Nzayilu ya Kenataka na Luzingu ya Mvula na Mvula, balutiti 98-107. Yau mebasisamaka na Watchtower Bible and Tract Society of New York, Inc.
[Kifwanisu ya kele na lutiti 31]
“Kibuka mosi ya nene” tafwa ve ata fyoti