Nzambi Kelomba Nge na Kukuma Nduku na Yandi

Nzambi kezola nde nge kuma nduku na yandi. Keti ke ti kilumbu nge meyindulaka ntete nde nge lenda kuma nduku ya Muntu mosi ya kuluta nene na inza? Abrahami, muntu ya kuzingaka na ntangu ya ntama, bo vandaka kubinga yandi nde nduku ya Nzambi. (Yakobo 2:23) Bantu yankaka ya bo ketubila na Biblia kuvandaka mpi banduku ya Nzambi yina kubakaka balusakumunu mingi. Bubu yai, bantu ya mekatuka na bandambu yonso ya ntoto mekumaka banduku ya Nzambi. Nge mpi lenda kuma nduku ya Nzambi.

Kuvanda nduku ya Nzambi kele mbote kuluta kuvanda nduku ya konso muntu yina. Nzambi kepesaka ve banduku na yandi ya kwikama nsoni ata fyoti. (Nkunga 18:25) Kuvanda nduku ya Nzambi kele mbote kuluta kuvanda nduku ya bimvwama. Kana mvwama mefwa, mbongo na yandi kekwendaka na bantu yankaka. Kansi, banduku ya Nzambi kele ti kimvwama yina muntu lenda baka bo yo ve.—Matayo 6:19.

Bantu yankaka lenda sosa kubuyisa nge na kulonguka mambu ya Nzambi. Banduku na nge yankaka ti bantu ya dibuta na nge lenda sala kima yai. (Matayo 10:36, 37) Kana bantu keseka nge to kepesa nge mpasi, kudiyula nde ‘Nani mu kezola kupesa kyese: bantu to Nzambi?’ Yindula dyambu yai: Kana muntu kuzabisa nge nde kudyaka dyaka ve, keti nge tawila yandi? Ata fyoti ve! Sambu nge kele na mfunu ya madya sambu na kuzinga. Kansi Nzambi lenda zingisa nge mvula na mvula! Yo yina, kupesa ve ata muntu mosi nzila ya kubuyisa nge na kulonguka mambu yina tasadisa nge na kuzaba nki mutindu nge lenda kuma nduku ya Nzambi.—Yoane 17:3.