Manaka Sambu na Kuyedisa Mayele na Nge Bonso Mutubi mpi Longi

NGE vanda leke to mbuta, bakala to nkento, malongi yai lenda sadisa nge na kutuba mbote mpi na kukuma longi ya kufwana ya Ndinga ya Nzambi.

Nkengi ya nzo-nkanda muntu takabulaka badevware na bantu yina mesonikisaka na Nzo-Nkanda ya Kisalu ya Teokrasi. Na balutiti tatu yina kelanda, nge tamona lutiti na nge ya bandongisila. Bantalu yina kele na ntwala ya bikalulu ya mutubi kewakana ti masolo yina kele na balutiti ya kelanda. Na masolo yina nge takuta bantendula ya mambu yina nge fwete sala sambu na kuzaba mbote mambu yango ya ketadila kutuba mpi kulonga mpi sambu na nki konso kikalulu kele mfunu. Nge takuta mpi bandongisila ya mfunu yina kemonisa mutindu nge fwete sala mambu ya bo kelomba.

Bandonga ya kutula mikubu yina kele na lutiti ya bandongisila kemonisa bikalulu yina kekwenda nzila mosi ti devware yina kelomba (1) kutanga na ntwala ya bantu, (2) nsonga mosi ti bantu zole to bantu mingi, to (3) diskure na dibundu. Nkengi ya nzo-nkanda tapesa nge kikalulu ya mutubi yina nge tasala. Yo kele mbote na kusala kikalulu mosi mpamba na mbala mosi. Nge tabaka mambote mingi kana nge sala mambu yina bo kelomba nge na kusala na nsuka ya disolo yina bo mepesa nge. Kana nge monisa nde nge mesadila mbote ndongisila yina kele na dilongi ya bo songaka nge na kusala, muntu yina kepesa nge ndongisila tapesa nge kikalulu yankaka.

Kana nge fwete sala devware na nge bonso nsonga, nge tavanda ti mfunu ya kadre. Lisiti ya bakadre kele na lutiti 82, kansi nge fwete suka ve kaka na lisiti yai. Muntu yina kepesa nge ndongisila lenda lomba nge na kumeka kadre mosi sambu na kubaka eksperiansi, to yandi lenda bikila nge mukumba ya kupona kadre.

Kutanga mukanda yai mpi kusala mambu yina kele na kati ata na ntangu nge kebongisa ve badevware ya nzo-nkanda lenda sadisa nge na kuyela. Mbala yankaka, nge lenda longuka disolo mosi to masolo mingi konso mposo.

Ata nge mesonikisaka na nzo-nkanda to kesalaka kisalu ya bilanga banda ntama, mpila kele kaka ya kukwenda na ntwala. Beto kezola nde nge baka mambote mingi na malongi ya bo kepesa na Nzo-Nkanda ya Kisalu ya Teokrasi.